Last updated on April 2nd, 2025 at 08:31 am
ಕುಡ್ಲ, ಎ, 02: ಕುಡ್ಲದ ಕರ್ಪಿಲ್ಲ್‌ಡ್ ಪಾಡ್ದಿನ ಮೊಬೈಲ್ ಜಾಮರ್‌‌ರ್ದಾವರ ಸಾರ್ವಜನಿಕೆರೆಗ್ ಬಾರೀ ಬಂಙ ಆವೊಂದಿತ್ತ್‌ದ್ ಸಂಬಂಧಿತಿನಕುಲು ಎಂಕ್ಲೆನ ಕಾಯೆಸ್‌ಗ್ ಕೆಬಿ ಕೊರೊಂದಿಜ್ಜೆರ್ ಪನ್ದ್ ಶಾಸಕೆ ವೇದವ್ಯಾಸ್ ಕಾಮತ್ ತೆರಿಪಾಯೆರ್.
ಮೊಬೈಲ್ ಜಾಮರ್‌ರ್ದ್ ಆವೊಂದುಪ್ಪುನ ಸಮಸ್ಯೆದ ಬಗೆಟ್ ಇತ್ತೆನೇ ಸಂಬಂಧಿತಿನ ಅಧಿಕಾರಿಲೆಡ ಪಾತೆರ್ದೆ. ಕುಡ್ಲ ಕರ್ಪಿಲ್ಲ್‌ಗ್ ದಾಯೆ ಮೊಬೈಲ್ ಜಾಮರ್ ಪನ್ದ್ ಪ್ರಶ್ನೆ ಮಲ್ತಿನ ಆರ್ ಜೈಲ್‌ಡ್ ಕೈದಿಲೆಗ್ ಮೊಬೈಲ್ ಕೊರ್ಪುನಕುಲು ಏರ್ ಪನ್ದ್ ಕೇನ್ಡೆರ್. ಕಾಂಗ್ರೇಸ್ ಸರಕಾರ ಬತ್ತಿಬೊಕ್ಕ ಕರ್ಪಿಲ್ಲ್‌ಡ್ ಇಪ್ಪುನ ಕೈದಿಲೆಗ್ಲಾ ತಪ್ಪು ಮನ್ಪೆರ ತಂಕ ಬೈದ್ಂಡ್. ಆಡಳಿತ ಪಕ್ಷ ಕಾಂಗ್ರೇಸ್ ಮಲ್ಲ ಮಲ್ಲ ತಪ್ಪು ಮಲ್ದಿನಕ್ಲೆನ ಕೇಸ್‌ಲೆನ್ ಪಿರ ಗೆತೊಂದ್ಂಡ್. ಜೈಲ್‌ದ ಅಧಿಕಾರಿಲೆಗ್ ಸಮ ಬೇಲೆ ಮನ್ಪೆರ ಕಾಂಗ್ರೇಸ್ ಮಂತ್ರಿಲು ಬೊಕ್ಕ ಆಡಳಿತ ವ್ಯವಸ್ಥೆ ಬುಡೊಂದಿಜ್ಜಿ ಪನ್ದ್ ಆರೋಪ ಮಲ್ತೆರ್.
ಸಮಸ್ಯೆಗ್ ಪಿರಿಕಟ್ಟ್ ಮಲ್ಪೆರ ಜೈಲ್ ಅಧಿಕಾರಿಲು ಕುಡ್ಲಗ್ ಬೈದೆರ್ ಪನ್ಪಿನ ಒಲವು ಉಂಡು, ಅಂಚಾದ್ ಏಪ್ರಿಲ್ 3 ತ ಉಲಯಿ ಜೈಲ್‌ದ ಜಾಮರ್ ಸಮಸ್ಯೆ ಸಮ ಆವೊಡು. ಆಯಿಜಿಂಡ ಏಪ್ರಿಲ್ 4 ತಾನಿ ಸಾರ್ವಜನಿಕೆರೆ ಪರವಾದ್ ಬಿಜೆಪಿ ಕಾರ್ಯಕರ್ತೆರ್ ಮಾತೆರ್ಲಾ ಸೇರೊಂದು “ರಾಸ್ತಾ ರೋಕೋ” ಮಲ್ತ್‌ದ್, ಜೈಲ್‌ದುಲಯಿ ಪೊಗ್ಗುದ್ ಜಾಮರ್ ಒಯ್ತ್ ದಕ್ಕೊಡಾಪುಂಡು ಪನ್ದ್ ಶಾಸಕೆ ವೇದವ್ಯಾಸ ಕಾಮತ್ ಎಚ್ಚರ್ಗೆ ಕೊರ್ತೆರ್.