Last updated on April 17th, 2025 at 11:10 am
“ಒಂಜಿ ಕನ”ಕ್ ಸಬಿದೇಸೆ
ಯಿಂಚಿಪ್ಪ ತುಲುವಪ್ಪೆಗ್ ಸಂದೈತ ಆಯಿನ ತುಲು ಕಬಿತೆಲೆ ಮಸ್ತಿರೆ ‘ಒಂಜಿ ಕನ’, ಬರೆತಿನಾರ್ ಹರ್ಷಾ ಬೇಲಾಡಿ. ಮಸ್ತಿರೆದ ಪಾಲೆ ಬುಡ್ಪಾವೊಂದು ಪೋನಗ ತುಲು ಲಿಪಿ ಬೊಕ ಕನ್ನಡ ಲಿಪಿ ಟ್ ಅಚ್ಚಿ ಆಯಿನ ತೂನಗ ಸಂತೋಸು ಆಂಡ್, ನೆತ್ತ ಉಲಯಿ ಒಂಜಿ ಕನ ಅತ್ತ್ ಒಂಜಾತ್ ಕನೊಕುಲು ದಿಂಜಿದುಲ್ಲ. ಸಾಜವಾದ್ ನರಮಾನಿ ಜೋಕುಲಾಟಿಗೆ ಕರಿದ್ ಜವನಾದಿಗೆಗ್ ಪಜ್ಜೆ ದೀನಗ ಪ್ರತೀ ಒರಿಲಾ ಒರಾಂಡಲಾ ಕಬಿಕುಲಾಪೆರ್. ಅವು ಪೊರ್ತೇ ಅಂಚಿನ, ಅವು ಕನಕುಲು ಪುಟ್ಟುನ ಕಾಲ, ದಿನಾಲ ತೂಪುನ ಸೊತ್ತುಲಾ ಪೊಸತಾದ್ ತೋಜುನ, ಉಡಲ್‌ಡ್ ಪೊಸ ಪೊಸ ಅಂಗಲ್ಪುಲು ಪುಟ್ಟುನ ಪೊರ್ತು, ಆ ಅಂಗ್ ಅಂಗಲ್ಪುನು ಕಬಿತೆದ ಒರುಟು ಮೊಡೆದ್ ದೀಪುನವು ಮಾತೆರೆರ್ದ್ ಆವಂದ್. ಅಂಚಿನ ಬೇಲೆನ್ ಹರ್ಷಾ ಬೇಲಾಡಿ ಮಂತ್‌ದೆರ್.
ತುಲುನಾಡ್, ತುಲು ಭಾಷೆಗಾದ್ ಈ ಒಂಜಿ ಜನ್ಮ, ಅಪ್ಪೆ ಅಯಿನ್ ತುಲುನಾಡ್‌ಡ್ ಕೊರ್ಯಲ್, ಅವು ಎನ್ನ ಪುಣ್ಯ ಪನೊಂದು ತುಳುನಾಡ್, ಭಾಷೆದ ಮಿತ್ತ್‌ದ ಮೋಕೆನ್ ಪದೊಟು ಕಟ್ಟ್‌ದ್ ತೂಪಾದೆರ್, ಪೊರ್ಲು ದ ಬದ್ಕ್ ಗ್ ಎಂಚವುಪ್ಪೊಡು, ಕಾಲದೊಟ್ಟುಗು ನಾಟಕ ಗೊಬ್ಬಂದೆ ನಿಮುರ್ತಿ ಇಜ್ಜಿ, ತೆಲಿಪೊಡು ದಾಯೆ ಇಂಚ ಒಂಜಾತ್ ಜೂವನದ ಒಂಜಿ ಮರ್ಗಿಲ್‌ದ ಮೋನೆ ತೂಪಾವುನ ಕಬಿತೆಲು ಈ ಮಸ್ತಿರೆಟ್ ಉಲ್ಲ. ಅಯಿಟ್ಲಾ ಎಂಕ್ ದಿಂಜ ಕೊಸಿಕೊರ್ನ ಕಬಿತೆ ‘ಎನ್ನ ಊರು’, ಅಂದ್ ನಂಕ್ ಮಾತೆರೆಗ್ಲಾ ನಮ್ಮ ನಮ್ಮ ಊರು ಪಂಡ ದಿಂಜ ಮೋಕೆ, ಮಲ್ಲ ಪೆರ್ಮೆ. ಆಂಡ ಊರುದ ಬಗ್ಗೆ ಕವಿತೆ ಬರೆಪುನಕುಲು ಕಮ್ಮಿ. ಬೇಲಾಡಿದ ಕೋಂಟು ಕೋಂಟುನು ತಿರ್ಗ್‌ದ್ ಬತ್ತಿಲೆಕಾಪುಂಡು ಕಬಿತೆ ಓದುನಗ. ಊರುದ ಬಗ್ಗೆ ಪೆರ್ಮೆ ಆಪುಂಡು.
ಪೊಸ ದೇಕಿನ್ ತುಂಬೊಂದು ಬೈದಿನ ಒಂಜಿ ಕನ ಪೊರ್ಲು ದ ಮೋನೆ ಪಟ, ಅಪ್ಪೆ ಭಾಷೆ ಡೇ ಬರೆಪೆ ಪನ್ಪುನ ನಿರ್ಧಾರದ ಬರೆತಿನಾರೆನ ಪಾತೆರ ಓದುನಗ ಎಂಕೊಂಜಿ ಜತೆ ತಿಕ್ಕ್ಂಡ್ ಪನ್ಪುನ ಪೆರ್ಮೆ ಆಪುಂಡು, ಪುಣ್ಣಮೆ ಪಬ್ಲಿಕೇಶನ್ಸ್ ದ ನಿಶ್ಚಿತ್ ಜಿ ರಾಮಕುಂಜ ಮೆರೆನ ಉಮೇದ್ ದಿಂಜಾವುನ ಪಾತೆರೊ ಒಟ್ಟಾರೆ ಪನ್ಪುಂಡ ತುಲುವಪ್ಪೆನ ಸಿರಿತುಪ್ಪೆಗೊಂಜಿ ಲತ್ತ್ ಪೊಸ ಕುರಲ್ ಸೇರ್ಂಡ್, ತುಲುವೆರೆನ ಉಮೇದ್‌ದ ಬೆರಿಸಾಯ ಇತ್ತ್ಂಡ ಲತ್ತ್ ಕುಲಾಲ್ ಪೇರ್ ದಿಂಜಿದ್, ತಿರ್ಲಾದ್ ಪೊರ್ಲಾಪುನೆಟ್ ರಡ್ಡ್ ಪಾತೆರ ಇಜ್ಜಿಪನೊಂದು, ಹರ್ಷಾ ಬೇಲಾಡಿ ಇರೆನ ಗೇನದ ಕಂಡೊಡು ನನಲಾತ್ ದಡ್ಡ್‌ದಾಂತಿನ ಸಿರಿಕುರಲ್ ಪಯ ಆವಡ್, ತುಲುವಪ್ಪೆನ ಸಿರಿತುಪ್ಪೆಗ್ ಸಂದಾಯ ಆವಡ್ಂದ್ ಉಡಲರ್ತಿದ ಎಡ್ಡೆಪ್ಪು ಬಾಮಿವೆ.
ಕುವಿಕು ಕಣ್ವತೀರ್ಥ
16-04-2025