Last updated on April 17th, 2025 at 12:28 pm
ಕಟ್ಪಾಡಿ: ತುಳು ಶಾಸನ, ಲಿಪಿ ಕ್ಷೇತ್ರೊಡು ಬೆನ್ತಿನ, ಇರೆಮದೆತ ಕಾಯಿ ಲೆಕ ಇಪ್ಪುನ ಸುಭಾಸ್ ನಾಯಕ್ ಮೆರೆಗ್ ಎಪ್ರಿಲ್ 13 ತಾನಿ ನಡತಿನ ತುಳುನಾಡ್ ಕಾನ್‌ಕ್ಲೇವ್‌ಡ್ ವಾರ್ಷಿಕ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.
ನರಮಾನಿಯಾದ್ ಪುಟ್ಟುನ ಒಂಜಿ ಬೆರ್ಮೆರೆ ಬರೆತಿನ ನೆವನ. ಆ ನೆವನೊಡು ಜೀವನ ಕರಿಪುನಗ ಅಂಚಿ ಒಂತೆ ಇಂಚಿ ಒಂತೆ ಎಡ್ಡೆಪ್ಪು ಮಲ್ತ್ ಸಾದಕೊ ಬೆನೊಡಾಯಿನ ನಮ್ಮ ಪುಟ್ಟುಗು ಕೊರ್ಪಿನ ಅರ್ಥೊ. ಅಂಚಿತ್ತಿ ಒರಿ ತುಳುನಾಡ ಸಾದಕೊ ಬೆನ್ತಿನಕ್ಲೆಗ್ ಕೊರ್ಪಿನ ಪ್ರಶಸ್ತಿ ತುಳುನಾಡ್ ಕಾನ್ಕ್ಲೇವ್ ಪ್ರಶಸ್ತಿ. ದೇಶೊಡು ಮೇಲಾಯಿ ದೇಶ ಭಾರತೊಡು ಬಡಕಾಯಿ ಬೊಲ್ಲಿಲೆಕ್ಕ ಮೆನ್ಕೊಂದಿಪ್ಪುನ ರಾಜ್ಯೊ ಅವ್ ನಮ್ಮ ತುಳುವ ರಾಜ್ಯೊ. ಆ ತುಳುವ ರಾಜ್ಯದ ಬಡಕಾಯಿದ ಜಿಲ್ಲೆ ಒಡಿಪುದ ಒಂಜಿ ಊರು ಬಂಟಕಲ್ಲ್. ಈ ಬಂಟಕಲ್ಲ್ ಡ್ ಪುಟ್ಟಿನ ಸುಭಾಸ್ ನಾಯಕೆರೆಗ್ 2025ದ ತುಳುನಾಡ್ ಕಾನ್ಕ್ಲೇವ್ ಪ್ರಶಸ್ತಿ.
24 ಎಪ್ರೀಲ್ 1993ಕ್ಕ್ ಶ್ರೀ ವಿಠ್ಠಲ ನಾಯಕ್ ಬೊಕ್ಕ ಶ್ರೀಮತಿ ಪದ್ಮಾವತಿ ಮೆರೆನ ಕಡೀರ ಮಗೆ ಆದ್ ಪುಟ್ಟಿನ ಮೇರ್ ಪ್ರಾಥಮಿಕ ಶಿಕ್ಷಣೊನು ದುರ್ಗಾಪರಮೇಶ್ವರಿ ದೇವಸ್ಥಾನ ಶಾಲೆ ಬಂಟಕಲ್ಲ್ ಡ್ ಅಂಚೆನೆ ಮಾಧ್ಯಮಿಕ ಬೊಕ್ಕ ಪದವಿ ಪೂರ್ವ ಶಿಕ್ಷಣೊನು ಎಸ್.ವಿ.ಎಚ್ ಇನ್ನಂಜೆಡ್ ಮಲ್ತೆರ್. ದುಂಬುದ ಎಚ್ಚಿನ ವಿದ್ಯಾಭ್ಯಾಸೊನು ಎಂ.ಎಸ್.ಆರ್.ಸಿ ಕಾಲೇಜ್ ಶಿರ್ವಡ್ ಕರಿತ್ ಅಲ್ಪ ಬಿ.ಎ ಅಂಚೆನೆ ಎಂ.ಎ ಇತಿಹಾಸ ಬೊಕ್ಕ ಪುರಾತತ್ವದ ವಿಷಯೊಡು ಮಲ್ತೆರ್. ಕಲ್ಪಿನೆಟ್ಟ್ 2 ಬಂಗಾರ್ದ ಪದಕೊ ಅಂಚೆನೆ ರಡ್ಡನೇ ರ್ಯಾಂಕ್ ದೆತೊನ್ದು ಪೆರ್ಮೆ ಕನದೆರ್. ಈತ್ ಮಾತ್ರ ಅತ್ತಂದೆ ಶಿವಮೊಗ್ಗದ ಕುವೆಂಪು ವಿಶ್ವವಿದ್ಯಾಲಯೊಡು ಪುರಾತತ್ವ ಅಂಚೆನೆ ವಸ್ತುಸಂಗ್ರಹಾಲಯೊದ ವಿಷಯೊಡು ಡಿಪ್ಲೊಮಾ ಪದವಿಲಾ ಪಡೆಯೊಂದೆರ್.
ತುಳು ಲಿಪಿತ ಬಗೆಟ್ ವಿಶೇಷ ಆಸಕ್ತಿ ದೀವೊಂದು ಸಂಶೋಧನೆ, ಅಧ್ಯಯನ ಮಲ್ದಿನ ಸುಭಾಸ್ ನಾಯಕೆರ್ ತುಳು ಲಿಪಿಕ್ ಸಂಬಂದೊಡು Central Institute of Indian Language ಡ್ ತಜ್ಞೆರೆ ಸಮಿತಿದ ಸದಸ್ಯೆರಾದ್, ತುಳು ಲಿಪಿಕ್ ಸರಕಾರೊದ ಅಧಿಕೃತ ಮಾನಾದಿಗೆ ತಿಕ್ಕರೆ ಪುನೆದಿನಾರ್. ಅವೇತೋ ಮದೆಟಿತ್ತಿನ ತುಳು ಶಾಸನೊಲೆನ್ ನಾಡ್ ಪತ್ತ್ ದ್, ಓದುದು ಎಸ್.ಎ ಕೃಷ್ಣಯ್ಯ ಮೆರೆನ ಪ್ರಧಾನ ಸಂಪಾದಕತ್ವೊಡು, ಡಾ।ರಾಧಾಕೃಷ್ಣ ಬೆಳ್ಳೂರು ಮೆರೆನ ಒಟ್ಟುಗು ಸೇರ್ದ್ ತುಳು ಶಾಸನಗಳು ಪನ್ಪಿನ ಸಂಶೋಧನಾ ಮಸ್ತಿರೆ ಬರೆತೆರ್.
ಕೃಷಿಕೆರಾದ್, ಪ್ರಗತಿಪರ ಕೃಷಿದಂಚಿ ದಂಗಿನ ಸುಭಾಸೆರ್ ತುಳು ಶಾಸನೊಲೆನ ಸಂಶೋಧನೆ, ಅಧ್ಯಯನ, ಪಿರಾಕ್ದ ಇತಿಹಾಸೊದ ನಿಲೆಕುಲೆನ ಬಗೆಟ್ ಅಧ್ಯಯನ, ಪಾದೆ ಚಿತ್ರೊಲೆನ ಬಗೆಟ್ ಸಂಶೋಧನೆ, ಅಧ್ಯಯನದ ಬಗೆಟ್ ಮಸ್ತ್ ಉಮೇದ್ ದೀವೊಂದೆರ್.
ಎಲ್ಯ ಪ್ರಾಯೊಡೇ ತುಳುತ ವಿಷಯೊಡು ಮಲ್ಲ ಸಾದಕೊ ಬೆನ್ತಿನ, ತುಳು ಲಿಪಿತ ಶಾಸನಾತ್ಮಕ ದಾಖಲೆಲೆನ್ ಒಟ್ಟು ಮಲ್ತ್ ತುಳು ಲಿಪಿನ್ ಸಾರ ವರ್ಸೊರ್ದು ದುಂಬೇ ಜನಕುಲು ಗಲಸೊಂದಿತ್ತೆರ್, ತುಳು ಬಾಸೆ ರಾಜ್ಯಾಡಳಿತದ ಬಾಸೆ ಆದಿತ್ತ್ಂಡ್ ಪನ್ದ್ ಸಂಶೋಧನೆಡ್ ತೆರಿಪಾಯಿನ ಸುಭಾಸ್ ನಾಯಕೆರೆ ಸಾದಗೊನು ಗುರ್ತ ಪತ್ತ್‌ದ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್(ರಿ.) ಕೊರ್ಪಿನ ತುಳುನಾಡ್ ಕಾನ್ಕ್ಲೇವ್ – 2025ತ್ತ ವಾರ್ಷಿಕ ಪ್ರಶಸ್ತಿನ್ ಕಟ್ಪಾಡಿ ವಿಶ್ವನಾಥ ಕ್ಷೇತ್ರೊಡು 2025 ಎಪ್ರೀಲ್ 13 ತಾರೀಕ್ ಗ್ ನಡತಿನ ಯುವ ಸಮಾವೇಶೊಡು ಕೊರ್ದು ಅರ್ತಿ ಪಿರ್ತಿಡ್ ಮಾನಾದಿಗೆ ಸಂದೈತ ಮಲ್ದೆರ್. ತುಳುನಾಡೊರ್ಮೆದ ದೈವ ದೇವೆರ್ ನನಲಾತ್ ಇರೆಗ್ ಎಡ್ಡೆಪ್ಪು ಕೊರ್ದು ಸಮಾಜಮುಖಿ ಬೇಲೆ ಮಲ್ಪರೆ ಸತು ಕೊರಡ್ ಪನ್ದ್ ನಟ್ಟೊಂಡೆರ್.