Last updated on April 17th, 2025 at 03:28 pm
ಕಡಬ: ಕಾಡ ಪಂಜಿದ ಮಾಸ ಕೊರ್ಪೆ ಪನ್ಡ್‌ದ್ ಕಾಸ್ ದೆತೊಂದು ಮಂಗೆ ಮಲ್ತೊಂದಿತ್ತಿನಾಯೆ ಕಡೇಕ್ಲಾ ಅರೆಸ್ಟ್ ಆತೆ.
ಕುಲ್ಕುಂದಡ್ ಎ.15 ತಾನಿ ಕಾಡ ಪಂಜಿದ ಮಾಸ ಕೊರ್ಪೆ ಪನ್ದ್ ಕಾಸ್ ದೆತೊನೊಂದುಪ್ಪುನಗ ಆಯನ್ ಊರುದಕುಲೇ ಪತ್ತ್‌ದ್ ಪೊಲೀಸೆರೆಗ್ ಒಪ್ಯಾದೆರ್.
ಮಧ್ಯಾಹ್ನದ ಪೊರ್ತುಡು ಕುಲ್ಕುಂದಡ್ ಬಸ್ಸ್‌ಗ್ ಕಾತೊಂದಿತ್ತಿನ ಪೊಂಜೊವು ಒರ್ತಿಗ್ ಕಾಡ ಪಂಜಿ ಉರ್ಲುಗು ಬೂರ್ದ್ಂಡ್ ಮಾಸ ಬೋಡಾಂಡ ಪನ್ಲೆ ಪನ್ದ್ ಆಯೆ ಪನ್ದಿತ್ತೆ. ಪೊಂಜೊವು ಬೊರ್ಚಿ ಪನ್ಡ್‌ದ್ ಅಲ್ಪದ ಮುಟ್ಟದಕಲೆಗ್ ಒಲವು ಕೊರ್ದಿತ್ತೆರ್. ಈ ಪೊರ್ತುಡು ದುಂಬು ಕಾಸ್ ಕೊರ್ದು ಮಂಗೆ ಆತಿನಾಯೆ ಒರಿ ಬತ್ತ್‌ದೆರ್. ಆರ್ ಉಂಬ್ಯನ್ ಪ್ರಶ್ನೆ ಮಲ್ತ್‌ದೆರ್. ಬೊಕ್ಕ ಪೊಲೀಸೆರೆಗೆಯ್ ಒಲವು ಕೊರ್ತೆರ್.
ಪೊಲೀಸೆರೆ ವಿಚಾರಣೆಡ್ ಉಂಬ್ಯೆ ಕಡಬ ತಾಲೂಕ್‌ದ ಮರ್ದಾಳದಾಯೆ ಪನ್ದ್ ತೆರಿದ್ ಬೈದ್ಂಡ್. ಪಾಕ ಜನಕ್ ಪಾಕ ನಮೂನೆಡ್ ದಗೆ ಮಲ್ದಿನ ತೆರಿದ್ ಬೈದ್ಂಡ್. ಏರ್ಲಾ ಒಯಿಲ್ ಬರೆಪಾವಂದಿನೆರ್ದಾವರ ಆಯನ್ ವಿಚಾರಿತ್‌ದ್ ಬುಡ್ತ ಪನ್ದ್ ಸುಬ್ರಹ್ಮಣ್ಯ ಪೊಲೀಸೆರ್ ಒಲವು ಕೊರ್ತೆರ್. ಉಂಬ್ಯೆ ಕನಕ್ ಉಂಡು ಪನ್ಡ್‌ದ್ ಕುಲ್ಕುಂದ ದವೆಟೆಲಾ ಅಡ್ವಾನ್ಸ್ ಕಾಸ್ ದೆತೊಂದಿತ್ತೆಗೆ.
ಇತ್ತೆ ಆಯನ ಪೋಟೋನ್ ಸಾಮಾಜಿಕ ಬಲೆತ್ತಾನೊಡು ಪಾಕ ಜನ ಪಟ್ಟೊಂದು ಮಂಗೆ ಆವೊಡ್ಚಿ ಪನ್ದ್ ಎಚ್ಚರ್ಗೆ ಕೊರ್ತೆರ್.