Last updated on April 30th, 2025 at 03:45 pm
ಕುಡ್ಲ, ಏ.30 : ಪೇಂಟೆದ ಪ್ರೈವೇಟ್ ಕಾಲೇಜಿದ ಪಿರವುದ ಗೋಡೌನ್‌ಡ್ ಅಕ್ರಮವಾದ್ ರಾಶಿ ದೀದಿತ್ತಿನ ಸುಮಾರ್ 500 ಕ್ವಿಂಟಾಲ್ ಅರಿನ್ ತೆನಸ್ ಬೊಕ್ಕ ನಾಗರಿಕ ಸರಬರಾಜು ಇಲಾಖೆದ ಅಧಿಕಾರಿಲು ವಶೊಕು ಗೆತೊಂದೆರ್.
ಸಾರ್ವಜನಿಕೆರೆರ್ದ್ ಬತ್ತಿನ ಒಯಿಲ್‌ಲೆನ ಆಧಾರೊಡು, ಇಲಾಖೆದ ಒತ್ತು ನಿರ್ದೇಶಕಿ ಅನಿತಾ ವಿ. ಮಡ್ಲೂರು ಮೆರೆನ ಮುತಾಲಿಕೆಡ್ ದಾಳಿ ಮಲ್ತ್‌ದೆರ್.
“ಬಾಡಾಯಿದ ಗೋಡೌನ್‌ಡ್ ಬಾಸ್ಮತಿ, ಸೋನಾ ಮಸೂರಿ, ಜೀರಾ ರೈಸ್ ಬೊಕ್ಕ ತೌಡು ಅರಿ ಸೇರ್ದ್ ಬೇತೆ ಬೇತೆ ಬ್ರಾಂಡ್‌ಲೆನ ಅರಿತ ಗೋಣಿಲು ಇತ್ತ. ಅವೆತ ಒಟ್ಟುಗು, ಒವ್ವೇ ಬ್ರಾಂಡಿಂಗ್‌ದಾಂತಿನ ಬೊಲ್ದು ಗೋಣಿಲೆಡ್ಲಾ ಮಲ್ಲ ಪ್ರಮಾಣೊದ ಅರಿನ್ ದೀದಿತ್ತೆರ್. ಉಂದೆಟ್ ಸಾರ್ವಜನಿಕ ವಿತರಣಾ ವ್ಯವಸ್ಥೆ (ಪಿಡಿಎಸ್) ಗ್ ಮೀಸಲಾತಿನ ಅರಿಲಾ ಆದುಪ್ಪು ಪನ್ಪಿನ ಡೌಟ್‌ಗ್ ನೆವನ ಆತ್ಂಡ್. ಮಾತಾ ಅರಿನ್ ವಶೊಕು ಗೆತೊಂದ ಅಂಚೆನೇ ಅಗತ್ಯ ಸೊತ್ತುಲೆನ ಕಾಯ್ದೆದಡಿಟ್ ಪ್ರಕರಣ ದಾಕಲ್ತೊಂದ” ಪನ್ದ್ ಅನಿತಾ ವಿ. ಮಡ್ಲೂರ್ ತೆರಿಪಾದೆರ್.
“ಉತ್ತರ ಕರ್ನಾಟಕೊದ ಅನ್ನ ಭಾಗ್ಯ ಯೋಜನೆದ ಅರಿನ್ ಅಕ್ರಮವಾದ್ ಕನತ್‌ದ್, ಪಾಲಿಶ್ ಮಲ್ತ್‌ದ್, ರಿಬ್ರಾಂಡ್ ಮಲ್ತ್‌ದ್ ಲೋಕಲ್ ಮಾರ್ಕೆಟ್‌ಡ್ ಮಾರುವೆರ್ ಪನ್ಪಿನ ಒಯಿಲ್‌ಲಾ ಬೈದ್ಂಡ್. ವಶೊಕು ಗೆತೊಂದಿನ ಅರಿತ ಸ್ಯಾಂಪಲ್‌ನಾ ಪರೀಕ್ಷೆಗ್ ಪ್ರಯೋಗಾಲಯೊಗು ಕಡಪುಡ್ದ. ಈತ್ ಮಲ್ಲ ಪ್ರಮಾಣೊದ ಅರಿನ್ ಸ್ಟೋರ್ ಮಲ್ಪೆರ ಗೋಡೌನ್‌ಗ್ ಬೋಡಾಪಿನ ಲೈಸೆನ್ಸ್ ಉಂಡಾ ಪನ್ಪಿನೆನ್ಲಾ ಸಹ ಪರಿಶೀಲನೆ ಮಲ್ಪರೆ ಉಂಡು” ಪನ್ದ್ ಪನ್ಡೆರ್.