Last updated on April 30th, 2025 at 05:44 pm
ನಮ್ಮ ಕನಸು ಬ್ಯಾನರ್‌ಡ್ ಕೆ. ಸುರೇಶ್ ಮೇರ್ ನಿರ್ಮಾಣ ಮಲ್ದಿನ, ರಮೇಶ್ ಶೆಟ್ಟಿಗಾರ್ ಬರೆದ್, ರಾಷ್ಟ್ರಪ್ರಶಸ್ತಿ ಗೆಂದಿನ ನಿರ್ದೇಶಕೆ ಸಂತೋಷ್ ಮಾಡ ನಿರ್ದೇಶನೊಡು ಮೂಡ್‌ದ್ ಬೈದಿನ ತುಳು ಸಿನಿಮಾ ‘ಪಿದಾಯಿ’ ಮೇ 9ಗ್ ತುಳುನಾಡೊರ್ಮೆ ಬುಡುಗಡೆ ಆವರೆ ಉಂಡು ಪನ್ದ್ ಚಿತ್ರ ತಂಡ ಪತ್ರಿಕಾ ಭವನೊಡು ನಡತಿನ ಪತ್ರಿಕಾಗೋಷ್ಠಿಡ್ ಒಲವು ಪಟ್ಟೊಂಡು.
ನಿರ್ದೇಶಕೆ ಸಂತೋಷ್ ಮಾಡ ಪಾತೆರ್ದ್, ‘ಪಿದಾಯಿ’ ಚಿತ್ರ ಕೊಲ್ಕತ್ತ, ಶಿಮ್ಲಾ, ಜಾರ್ಖಂಡ್‌ ಬೊಕ್ಕ ಕ್ಯಾಲಿಫೋರ್ನಿಯಾ ಅಂತರಾಷ್ಟ್ರೀಯ ಚಲನಚಿತ್ರೋತ್ಸವೊಲೆಡ್ ಅಧಿಕೃತವಾದ್ ಅಜತ್ ಬರ್ಪಿನೆತ ಒಟ್ಟುಗು, 16ನೇ ಬೆಂಗಳೂರು ಅಂತರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಕಡೀರ ಸರ್ತಿ ತುಳು ಸಿನಿಮಾ ಒಂಜಿ ಭಾರತೀಯ ಚಲನಚಿತ್ರ ಬೊಕ್ಕ ಕನ್ನಡ ಚಲನಚಿತ್ರ ಇಂಚ ರಡ್ಡ್ ವಿಭಾಗೊಲೆಡ್ ಪಂತೊಡು ಇತ್ತ್‌ದ್, ರಡ್ಡನೇ ಅತ್ಯುತ್ತಮ ಚಿತ್ರ ಪ್ರಶಸ್ತಿನ್ ಗೆಂದ್‌ದ್ಂಡಾ. ಈ ಚಿತ್ರೊದ ಮುಖ್ಯ ಪಾತ್ರೊಡು ಮಹಾಮಾಯಿ ಪಾತ್ರಿಯಾದ್ ಕನ್ನಡೊದ ಪುಗರ್ತೆದ ನಟೆ ಶರತ್ ಲೋಹಿತಾಶ್ವ ಮೇರ್ ಅಭಿನಯ ಮಲ್ದೆರ್. ಮೆರೆನ ಒಟ್ಟುಗು ದೀಪಕ್ ರೈ ಪಾಣಾಜೆ, ಪುಷ್ಪರಾಜ್ ಬೋಳಾರ್, ರೂಪಶ್ರೀ ವರ್ಕಾಡಿ, ಇಳಾ ವಿಟ್ಲ, ದೇವಿ ನಾಯರ್, ಪ್ರೀತೇಶ್, ಅನಿಲ್ ರಾಜ್ ಉಪ್ಪಳ, ರವಿ ವರ್ಕಾಡಿ, ಬೊಕ್ಕ ಬಾಲ ಪ್ರತಿಭೆರಳಲು ಮೋನಿಶ್, ತ್ರಿಷ, ದ್ರುವ, ನಿಹಾ, ಖುಷಿ ಡಿಬಿಸಿ ಶೇಖರ್, ಅನಿತಾ ಚಂದ್ರಶೇಖರ್ ಮೊಕುಲು ಮಾತ ಅಭಿನಯ ಮಲ್ದೆರ್. ಈ ಸಿನಿಮಾದ ಛಾಯಾಗ್ರಾಹಣೊನು ಉಣ್ಣಿ ಮಾಡವೂರ್‌ ಮಲ್ತಿತ್ತ್‌ದ್, ರಡ್ಡ್ ಸರ್ತಿ ರಾಷ್ಟ್ರ ಪ್ರಶಸ್ತಿ ಗೆಂದ್‌ದ್, ಮಾತೆರೆರ್ದ್ ಎಚ್ಚ ಸಿನಿಮಾ ಸಂಕಲನ ಮಲ್ದಿನ ಸುರೇಶ್ ಅರಸ್ ಈ ಸಿನಿಮಾದ ಸಂಕಲನಕಾರೆ ಆದುಲ್ಲೆರ್. ಡೈಲಾಗ್‌ನ್ ರಮೇಶ್ ಶೆಟ್ಟಿಗಾರ್ ಬೊಕ್ಕ ಡಿ.ಬಿ.ಸಿ ಶೇಖರ್ ಬರೆತೆರ್. ಚಿತ್ರೊನು ಕುಡ್ಲ ಜಿಲ್ಲೆದ ಮುಡಿಪು ಬೊಕ್ಕ ಮಂಜೇಶ್ವರಡೆ ಶೂಟಿಂಗ್ ಮಲ್ದೆರ್.
ಪದ್ಮಶ್ರೀ ಕೈತಪ್ರಮ್ ದಾಮೋದರನ್ ನಂಬೂದಿರಿ, ಸುಧೀರ್ ಅತ್ತಾವರ, ತುಳು ಅಕಾಡೆಮಿ ಪ್ರಶಸ್ತಿ ಗೆಂದಿನ ಕುಶಾಲಾಕ್ಷಿ ಕಣ್ವತೀರ್ಥ ಮೆರೆನ ಸಾಹಿತ್ಯ ಇತ್ತ್‌ದ್, ಅಜಯ್ ನಂಬೂದಿರಿ ಸಂಗೀತ ಕೊರ್ತೆರ್.
ಪುಗರ್ತೆದ ಪದಪನ್ಪಿನಾರ್ ಸಂಗೀತ ವಿದ್ಯಾನಿಧಿ ಡಾಕ್ಟರ್ ವಿದ್ಯಾಭೂಷಣ್ ಕಡೀರ ಸರ್ತಿ ಸಿನಿಮಾ ಒಂಜೆಕ್ ಪದ ಪನ್ತೆರ್ ಪನ್ಪಿನ ಕುಡೊಂಜಿ ವಿಶೇಷತೆ. ಒಟ್ಟುಗು ಪಿರನಿಲೆ ಗಾಯಕೆರಾಯಿನ ಮೇಧ ವಿದ್ಯಾಭೂಷಣ್, ವಿಜೇಶ್ ಗೋಪಾಲ್ ಮೊಕುಲುಲಾ ಪದ ಪನ್ತೆರ್. ಪಿರನಿಲೆ ಸಂಗೀತೊನು ಕೇರಳ ರಾಜ್ಯ ಪ್ರಶಸ್ತಿ ಗೆಂದಿನ ಸಂಗೀತಕಾರೆ ದೀಪಾಂಕುರನ್ ಕೊರ್ತೆರ್. ಚಿತ್ರೊದ ಕಲಾನಿರ್ದೇಶಕೆರಾದ್ ರಾಜೇಶ್ ಬಂದ್ಯೋಡು, ಕಾಸ್ಟ್ಯೂಮ್ ಡಿಸೈನರ್ ಆದ್ ಮೀರಾ ಸಂತೋಷ್, ಮೇಕಪ್ ಮ್ಯಾನ್‌ ಆಗಿ ಬಿನೋಯ್ ಕೊಲ್ಲಮ್, ಮುಖ್ಯ ಸಹನಿರ್ದೇಶಕೆರಾದ್ ವಿಘ್ನೇಶ್ ಕುಲಾಲ್, ಸಹ ನಿರ್ದೇಶಕೆರಾದ್ ಗಿರೀಶ್ ಆಚಾರ್ ಸುಳ್ಯ, ಪ್ರದೀಪ್ ರಾವ್, ವಿಶ್ವ ಮಂಗಲ್ಪಾಡಿ, ಕೂಟೊದ ಮ್ಯಾನೇಜರ್ ಆದ್ ರವಿ ವರ್ಕಾಡಿ ಬೊಕ್ಕ ಸ್ಟಿಲ್ ಫೋಟೋಗ್ರಾಫರ್ ಆದ್ ದೀಪಕ್ ಉಪ್ಪಳ ಬೇಲೆ ಮಲ್ದೆರ್.
ತುಳುನಾಡ್‌ದ ವಿಶೇಷತೆ ಆಯಿನ ನಲಿಕೆ ಭಜನೆನ್ಲಾ ಸಿನಿಮಾಡಾ ಪ್ರಯೋಗ ಮಲ್ದೆರ್. ಸಂದೀಪ್ ಬಲ್ಲಾಳ್ ಸಂಗೀತ ಕೊರ್ತಿನ ನಲಿಕೆಭಜನೆಗ್ ಸಾಹಿತ್ಯ ಬರೆತಿನಾರ್ ಯೋಗೀಶ್ ಅಡಕಳಕಟ್ಟೆ. ಪುಗರ್ತೆದ ಕಬಿ ಅಡ್ವೋಕೇಟ್ ಶಶಿರಾಜ್ ಕಾವೂರ್ ಬರೆತಿನ ಕುಡೊಂಜಿ ನಲಿಕೆ ಭಜನೆಗ್ ಶಿನೋಯ್ ಜೋಸೆಫ್ ಸಂಗೀತ ಕೊರ್ತೆರ್.
ಈ ಚಿತ್ರೊಡು “ಯತ್ರ ನಾರ್ಯಸ್ತು ಪೂಜ್ಯಂತೇ ರಮಂತೇ ತತ್ರ ದೇವತಾಹಃ” ಪನ್ಪಿನ ಉಲ್ಲೇಖೊಡು ಭೋಜಣ್ಣೆ ಪನ್ಪಿನ ಮಹಮ್ಮಾಯಿ ಪಾತ್ರಿಲೆನ ಇಲ್ಲಗ್ ಕಲ್ತಿನಾಲ್ ಒರ್ತಿ ಮರ್ಮಲ್ ಆದ್ ಬನ್ನಗ, ‘ಪಿದಾಯಿ’ ಆಪಿನ ಪೊರ್ತುಡು ಪೊಂಜೊವುಲೆನ್ ನಡಪಾವುನ ರೀತಿನ್ ತೂದು ಆಲ್ ನಡಪಾವುನ ಸಾತ್ವಿಕ ಸಂಘರ್ಷ ಬೊಕ್ಕ ಪೊಂಜೊವುಲೆನ ಘನತೆನ್ ದೆರ್ತ್ ಪತ್ತೆರೆ ಭೋಜಣ್ಣೆ ಗೆತೊನುನ ದೃಢನಿರ್ಧಾರೊಲು ಕಥೆತ ಸೊತ್ತು. ಬೆಂಗಳೂರು ಅಂತರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಪ್ರದರ್ಶನ ಆನಗ ಈ ಸಿನಿಮಾನ್ ಮಾತೆರ್ಲಾ ಬಾರೀ ಪುಗರ್ದೆರ್ ಪನ್ದ್ ಪನ್ಡೆರ್.