Last updated on May 5th, 2025 at 11:07 am
ಬೊಲ್ತೇರ್, ಮೇ 04: ಬ್ರಹ್ಮಕಲಶ ಉಚ್ಚಯದ ಲೇಸ್‌ಡ್ ಕೋಮು ಪಗೆತ ಭಾಷಣ ಮಲ್ದಿನ ಆರೋಪದ ಮಿತ್ತ್ ಶಾಸಕೆ ಹರೀಶ್ ಪೂಂಜೆರೆನ ಮಿತ್ತ್ ಎಫ್ಐಆರ್ ದಾಕಲಾತ್ಂಡೊ. ಗೋಪಾಲಕೃಷ್ಣ ದೇಲಂತಡೆ ಭಟ್ರೆಬೈಲ್ ತೆಕ್ಕಾರ್ ಮುಲ್ಪ ನಡತೊಂದುಪ್ಪುನ ಬ್ರಹ್ಮಕಲಶದ ಧಾರ್ಮಿಕ ಸಭೆತ ಮಿತ್ತರ್ಮೆಡ್ ಬಿಜೆಪಿ ಶಾಸಕೆ ಹರೀಶ್ ಪೂಂಜೆರ್ “ಗ್ರಾಮೊದ ಮುಸ್ಲಿಮೆರೆ ಬಗೆಟ್ ಮಾನಹಾನಿ ಆಪಿನಂಚಿನ ಅಂಚೆನೇ ಒಂಜಿ ಧರ್ಮೊದಕಲೆನ್ ಬೊಕ್ಕೊಂಜೆತ ಮಿತ್ತ್ ದೆರ್ತ್ ಕಟ್ಟುನಂಚಿನ ಪಗೆದಿಂಜಿ ಭಾಷಣ ಮಲ್ತ್‌ದೆರೊ” ಪನ್ದ್ ಆರೋಪ ಮಲ್ತ್‌ದ್, ಉಬಾರ್ ಪೊಲೀಸೆರೆಗ್ ದೂರು ಕೊರ್ತೆರ್. ಈ ಒಯಿಲ್‌ದ ಪ್ರಕಾರ ಪೊಲೀಸೆರ್ ಎಫ್ಐಆರ್ ದಾಕಲ್ತೊಂದೆರ್.
“ದೇಲಂತಡೆದ ಬ್ರಹ್ಮಕಲಶದ ಲೇಸ್‌ದ ಲೆಪ್ಪೋಲೆನ್ ಬ್ಯಾರ್ಲೆನ ಪಲ್ಲಿಗ್ ದಾಯೆ ಕೊರ್ತರ್? ನಮಕ್ಲಾ ಅಕ್ಲೆಗ್ಲಾ ದಾಲ ಸಂಬಂಧ ಇಜ್ಜಿ. ನಿಕುಲು ಬ್ಯಾರ್ಲೆಗ್ ಲೆಪ್ಪು ಕೊರ್ತಿನೆರ್ದಾವರನೇ ಅಕ್ಲು ಟ್ಯೂಬ್‌ಲೈಟ್ ಪುಡತ್‌ದೆರ್” ಪನ್ದ್ ಹರೀಶ್ ಪೂಂಜೆ ಪನ್ತೆರ್ ಪನ್ದ್ ಆರೋಪ ಮಲ್ತ್‌ದೆರ್.
“ಬಾರೀ ಸೂಕ್ಷ್ಮ ಪೊರ್ತುಡು ಶಾಸಕೆ ಹರೀಶ್ ಪೂಂಜೆರ್ ಪಗೆತ ಭಾಷಣ ಮಲ್ತ್‌ದ್ ಸಮಾಜೊಡು ಶಾಂತಿ ಕಲೆಂಕಾವೊಂದುಲ್ಲೆರ್” ಪನ್ದ್ ಮುಸ್ಲಿಂ ಮುಖಂಡೆ ಎಸ್ಎಂಎಸ್ ಇಬ್ರಾಹಿಂ ಮುಸ್ಲಿಯಾರ್ ಮೇರ್ ಉಬಾರ್ ಸ್ಟೇಶನ್‌ಡ್ ಒಯಿಲ್ ಬರೆಪಾದೆರ್.