Last updated on May 8th, 2025 at 09:07 am
ಕುಡ್ಲ ಮೇ 07: ಜಿಲ್ಲೆಡ್ ಕರಿನ ಪತ್ತ್ ಪದಿನೈನ್ ದಿನೊರ್ದಿಂಚಿ ನಡತಿನ ನಡಕೆಲು ಜನ ತರೆತಗ್ಗಾವುಲೆಕ ಮಲ್ದ್ಂಡ್ ಪನ್ದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್ ಪೂಜಾರಿ ಪನ್ಡೆರ್. ಕುಡ್ಲದ್ ಸುದ್ದಿಗೋಷ್ಠಿಡ್ ಪಾತೆರ್ನ ಆರ್ ಜಿಲ್ಲೆಡ್ ಇಂಚಿನ ನಡತಿನ ನಡಕೆಲು ಕುಡ್ಲನ್ ಪಿರವು ಕೊನೊವೊಂದುಲ್ಲ. ಈ ರೀತಿದ ನಡಕೆಲೆರ್ದಾವರ ಜಿಲ್ಲೆಡ್ ಬುಲೆಚ್ಚಿಲ್ ಪಿರ ಒರಿಪುಲೆಕ ಮಲ್ದ್ಂಡ್ ಪನ್ದ್ ಪನ್ಡೆರ್.
ಕುಡುಪುಡ್ ಒರಿಯನ್ ಕೆರ್ನವು ಜನ ತರೆತಗ್ಗಾವುನಂಚಿನವು. ಇದಮುಟ್ಟ ಇಂದೆಕ್ ನೆವನ ದಾದ ಪನ್ದ್ ನನಲ ತೆರಿದಿಜಿ. ಈ ನಡಕೆಡ್ 21 ಜನನ್ ಕೈದ್ ಮಲ್ದೆರ್, 17 ಜನಕ್ ನೊಟೀಸ್ ಕೊರ್ದು ಜಡ್ತೆ ಮಲ್ತೊಂದುಲ್ಲೆರ್.
ಬಜ್ಪೆಡ್ ಕೆರ್ನವು, ಅಂಚೆನೇ ಅವೆತ ಬೆರಿಟ್ ನಡತಿನ ನಡಕೆರಲು ಜಿಲ್ಲೆಗ್ ಕಪ್ಪು ಚುಕ್ಕಿ. ಈ ಕೊಲೆ ಆಯಿ ಬೊಕ್ಕ ಬಿಜೆಪಿ ನಾಯಕೆರ್ ಹಿಂದೂ ಕಾರ್ಯಕರ್ತೆ ಪನ್ದ್ ರಾಜ್ಯ ಮಟ್ಟೊಡು ಗೊಂದಲ ಉಂಡು ಮಲ್ದೆರ್. ಹಿಂದೂ ಧರ್ಮ ಪನ್ದ್ ಪಗೆ ಸಾದ್ಯುನ ಬೇಲೆ ಮಲ್ತೊಂದುಲ್ಲೆರ್. ಭಯೋತ್ಪಾದನೆ ಮುಸ್ಲಿಂ, ಹಿಂದೂ ರಡ್ಡೆಟ್ಲಾ ಅವ್ಂದುಂಡು. ಅವೆನ್ ಧರ್ಮೊದ ಪುದರ್‌ಡ್ ತೂಪುನ ಸಮ ಅತ್ತ್ ಪನ್ದ್ ಪನ್ಡೆರ್.
ಸಾಮಾಜಿಕ ಬಲೆತ್ತಾನೊಡು ಕಮೆಂಟ್ ಮಲ್ಪುನಕುಲು ತನ್ಕುಲೆ ಅಪ್ಪೆಅಮ್ಮೆನ ಗೌರವ ಎಚ್ಚ ಮಲ್ಪುಲೆಕ ಇಪ್ಪಡ್. ಅವು ಬುಡ್ದು ಸಾಮಾಜೊದ ಎದುರು ತರೆ ತಗ್ಗಾವುಲೆಕ ಮಲ್ಪಡೆ ಪನ್ದ್ ಪನ್ಡೆರ್.
ಬೊಲ್ತೇರ್ ಶಾಸಕೆ ಹರೀಶ್ ಪೂಂಜಾನ ಪಾತೆರೊನು ದೇಬೆರ್ ಮೆಚ್ಚುವೆರಾ…? ಶಾಸಕೆ ಆತಿನಕುಲು ಬೇತೆಕ್ಲೆಗ್ ಮಾದರಿ ಆವೊಡು… ದೇಲಂತಡೆಡ್ ನಡತಿನ ಕಾರ್ಯಕ್ರಮೊಡು ಇಂಚಿನ ಪಾತೆರೊಲು ಏತ್ ಸಮ. ಈ ವಿಚಾರೊನು ಬಿಜೆಪಿ ನಾಯಕೆರ್ ಒಪ್ವೆರಾ…? ಪನ್ದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್ ಪೂಜಾರಿ ಪ್ರಶ್ನೆ ಮಲ್ದೆರ್.