Last updated on May 15th, 2025 at 08:29 am
ಬಂಟ್ವಾಳ, ಮೇ 14: ತೀರ್ದಿನ ತನ್ನ ಕಂಡನ್ಯನ ಮರಣ ಉಪದಾನ ಮಲ್ತ್ ಕೊರ್ಯೆರೆ ಲಂಚ ಕೇನ್ಡ್‌ದ್, ಲಂಚ ಗೆತೊನುನ ಪೊರ್ತುಡು ಇರ್ವೆರ್ ಅಧಿಕಾರಿಲು ಲೋಕಾಯುಕ್ತ ಪೊಲೀಸೆರೆ ಬೇಪುಗು ಬೂರ್ದೆರ್.
ಲೋಕಾಯುಕ್ತ ಪೊಲೀಸೆರ್ ಕೊರ್ತಿನ ಒಲವುದ ಪ್ರಕಾರ ಒಯಿಲ್ ಕೊರ್ತಿನ ಪೊಂಜೊವುನ ಕಂಡನೆ ಬಂಟ್ವಾಳ ತಾಲೂಕ್‌ದ ಗ್ರಾಮ ಪಂಚಾಯತ್ ಒಂಜೆಟ್ ಕಾರ್ಯದರ್ಶಿ ಪೋಸ್ಟ್‌ಡ್ ಇತ್ತೆರ್, 2023ತ ಅಕ್ಟೋಬರ್ ತಿಂಗೊಲುಡು ರಿಟೈರ್ಡ್ ಆದಿತ್ತೆರ್. ಬೊಕ್ಕ ಆರೆನ ಕಂಡನೆ ಜೂನ್ 2024 ತಾನಿ ತೀರ್ದೆರ್.
ಅವೆರ್ದ್ ಬೊಕ್ಕ ಪೊಂಜೊವು ಬಂಟ್ವಾಳ ತಾಲೂಕ್ ಖಜಾನೆದ ಮುಖ್ಯ ಲೆಕ್ಕಿಗೆ ಭಾಸ್ಕರ್ ಮೆರೆಡ ಆರೆನ ಕಂಡನ್ಯನ ಮರಣ ಉಪದಾನೊದ ಬಗೆಟ್ ರಡ್ಡ್ ಸರ್ತಿ ಪೋದು ಕೇಂಡಲಾ ಬೇಲೆ ಆತಿಜಿ. ಒಂತೆ ಸಮೆ ಕರಿದ್ ಒಯಿಲ್ ಕೊರ್ತಿನ ಪೊಂಜೊವುನ ಅಕೌಂಟ್‌ಗ್ ಕಂಡನ್ಯನ ಮರಣ ಉಪದಾನೊನು ಜಮೆ ಮಲ್ದಿನೆಕ್ ಬೋಡಾದ್ ಬಂಟ್ವಾಳ ತಾಲೂಕ್ ಖಜಾನೆದ ಮುಖ್ಯ ಲೆಕ್ಕಿಗೆ ಭಾಸ್ಕರ್ ರೂ. 5000/- ಅಂಚೆನೇ ಬಂಟ್ವಾಳ ಖಜಾನೆದ ಎಫ್.ಡಿ.ಎ ಬಸವೇಗೌಡೆ ಬಿ.ಎನ್. ರೂ. 5000/- ಲಂಚಗ್ ಕಾಯೆಸ್ ಮಲ್ದೆರ್.
ಈ ಬಗೆಟ್ ಪೊಂಜೊವು ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್‌ಡ್ ಒಯಿಲ್ ಬರೆಪಾದಿತ್ತ್‌ದ್ ಬಂಟ್ವಾಳ ತಾಲೂಕು ಖಜಾನೆದ ಮುಖ್ಯ ಲೆಕ್ಕಿಗೆ ಭಾಸ್ಕರ್ ಬೊಕ್ಕ ಬಂಟ್ವಾಳ ಖಜಾನೆದ ಎಫ್.ಡಿ.ಎ ಬಸವೇಗೌಡನ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಕೋಡೆ 14.05.2025 ತಾನಿ ಬಂಟ್ವಾಳ ತಾಲೂಕ್ ಖಜಾನೆದ ಮುಖ್ಯ ಲೆಕ್ಕಿಗೆ ಭಾಸ್ಕರ್ ಪಿರ್ಯಾದಿದಾರೆರೆರ್ದ್ ರೂ. 5000/- ಅಂಚೆನೇ ಬಂಟ್ವಾಳ ಖಜಾನೆದ ಎಫ್.ಡಿ.ಎ ಬಸವೇಗೌಡೆ ರೂ. 5000/- ಲಂಚದ ಕಾಸ್ ಗೆತೊನೊಂದುಪ್ಪುನಗ ಲೋಕಾಯುಕ್ತ ಪೊಲೀಸೆರೆ ಬೇಪುಗು ಬೂರ್ದೆರ್. ಈ ಅಧಿಕಾರಿ ಬೊಕ್ಕ ಸಿಬ್ಬಂದಿನ್ ವಶೊಕು ಗೆತೊಂದು ಜಡ್ತೆ ಮಲ್ತೊಂದುಲ್ಲೆರ್.