Last updated on May 17th, 2025 at 06:54 am
ಬಂಟ್ವಾಳ, ಮೇ 17: ಪಾಣೇರ್‌ದ ಅಕ್ಕರಂಗಡಿಡ್ ಶುಕ್ರವಾರ ರಾತ್ರೆ ಒರಿಯನ ಮಿತ್ತ್ ಮಾರಕಾಯುಧೊಲೆಡ್ ದಾಳಿ ಮಲ್ತ್‌ದ್, ಕೈಕಾರ್‌ಗ್ ಗಾತಿದ ಗಡಿಕಲುಲಾತಿನ ನಡಕೆ ನಡತ್‌ದ್ಂಡ್.
ಅಕ್ಕರಂಗಡಿ ನಿವಾಸಿ ಹಮೀದ್ ಯಾನೆ ಅಮ್ಮಿ ಪೆಟ್ಟಾತಿನಾರ್, ಕುಡ್ಲ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ಆರ್ ಸಾದೀಬರಿಟ್ ಉಂತುದುಪ್ಪುನಗ ಬೈಕ್‌ಡ್ ಬತ್ತಿನ ನಾಲ್ವೆಅ ದಾಳಿ ಮಲ್ತ್‌ದೆರ್ ಪನ್ದ್ ಪನೊಂದುಲ್ಲೆರ್. ಹಮೀದ್ ಪೈಂಟಿಂಗ್ ಬೇಲೆ ಮಲ್ತೊಂದಿತ್ತ್‌ದ್, ದಾಳಿ ಏರ್ ಮಲ್ದೆರ್, ದಾಯೆ ಮಲ್ದೆರ್ ಪನ್ದ್ ತೆರಿದ್ ಬೈದಿಜಿ. ಬಂಟ್ವಾಳ ನಗರ ಪೊಲೀಸೆರ್ ಜಾಗೆಗ್ ಬತ್ತ್‌ದ್ ಪರಿಶೀಲನೆ ಮಲ್ದೆರ್.
ಪೊಲೀಸ್ ಮೂಲೊಲೆನ ಪ್ರಕಾರ ಒಂಜೇ ಧರ್ಮೊಗು ಸಂಬಂಧಿತಿನ ವಿಚಾರೊರ್ದು ಈ ನಡಕೆ ನಡತ್‌ದ್ಂಡ್‌ಗೆ. ಆಂಡ ಈ ಬಗೆಟಾ ಒವ್ವೇ ವಿಚಾರ ಸ್ಪಷ್ಟ ಆತಿಜಿ. ಹಮೀದ್ ಒರಿಯೇ ಇಪ್ಪುನಗ ದಾಳಿ ಮಲ್ತಿತ್ತ್‌ದ್, ಒಂತೆ ಸಮೆಕ್ ದುಂಬು ಪಾಣೇರ್‌ದ ನೆಹರೂ ನಗರದ ಕೈತಲ್ ನಡತಿನ ಬೀಸತ್ತಿ ಪಾಡ್ದಿನ ಪ್ರಕರಣೊದ ದುಂಬರಿನ ಭಾಗ ಆದುಪ್ಪುನ ಅನುಮಾನೊಲು ಉಲ್ಲ. ಪ್ರಕರಣೊಗು ಸಂಬಂಧಿತ್‌ದ್ ಒರಿಯನ್ ವಶೊಕು ಗೆತೊಂದೆರ್ ಪನ್ಪಿನ ಒಲವು ತಿಕ್ಕ್‌ದಿತ್ತ್‌ದ್, ಆಯನ ವಿವರ ತಿಕ್ಕ್‌ದಿಜಿ. ದಾಳಿಡ್ ಪೆಟ್ಟಾತಿನ ಹಮೀದ್ ಪ್ರಾಣಾಪಾಯೊರ್ದು ಪಿದಯಿ ಉಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.
ಸುಹಾಸ್ ಶೆಟ್ಟಿನ್ ಕೆರ್ನೆರ್ದ್ ಬೊಕ್ಕ ಪಗೆತ ಪುಗೆ ಲಕ್ಕ್‌ದಿತ್ತಿನ ಜಿಲ್ಲೆ ಸಹಜ ಸ್ಥಿತಿಗ್ ಬರೊಂದುಪ್ಪುನಗ ಕುಡ ಈ ನಡಕೆ ನಡತ್‌ದ್ಂಡ್. ದಾಯೆ ಬೀಸತ್ತಿ ಪಾಡ್ದೆರ್ ಪನ್ದ್ ಜಡ್ತೆಡ್ ತೆರಿದ್ ಬರೊಡಾತೆ.