Last updated on May 21st, 2025 at 07:46 am
ಜೈಪುರ, ಮೇ 20: ಮದಿಮೆದ ಪುದರ್ಡ್ 25 ಮದಿಮಯನಕ್ಲೆಗ್ ಲಕ್ಷಾಂತರ ದಗೆ ಮಲ್ದಿನ ಆರೋಪಡ್ ಪೊಂಜೊವು ಒರ್ತಿನ್ ಸವಾಯಿ ಮಾಧೋಪುರ್ ಪೊಲೀಸೆರ್ ಕೈದ್ ಮಲ್ದೆರ್.
ಅನುರಾಧ ಪಾಸ್ವಾನ್, 25 ಅಮಾಯಕ ಆಣುಲೆನ್ ಮಂಗೆ ಮಲ್ತ್ದ್ ಲಕ್ಷಗಟ್ಲೆ ಮೌಲ್ಯೊದ ಬಂಗಾರ್ ಬೊಕ್ಕ ಕಾಸ್ ಕಂಡ್ದ್ ಪದ್ರಾಡಾದಿತ್ತಲ್. ಅನುರಾಧ ಬಜಿ ಪಾಪದ ಇಲ್ಲರ್ದ್ ಬೈದಿನಾಲ್, ಪಲಯರ್ಲುಲಾ ಬೇಲೆದಾಂತೆ ಉಲ್ಲೆರ್. ಕಾಸ್ದ ಬಂಙೊರ್ದಾವರ ಇಲ್ಲ್ ನಡಪಾಯೆರೆ ಬಂಙ ಆದಿತ್ತ್ಂಡ್. ಅಂಚಾದ್, ಅನುರಾಧ ದಗೆತ ಸಾದಿ ಪತ್ತ್ದಲ್. 32 ವರ್ಸ ಪ್ರಾಯೊದ ಮೋಲು ಮದಿಮಲೆ ಲೆಕ ನಟನೆ ಮಲ್ತ್ದ್ ಅಮಾಯಕ ಆಣುಲೆನ್ ಮಂಗೆ ಮಲ್ತೊಂದಿತ್ತಲ್.
ಆಲೆನ ಗ್ಯಾಂಗ್ದಕುಲು ಆಲೆನ ಫೋಟೋ ಬೊಕ್ಕ ಪ್ರೊಫೈಲ್ನ್ ಆಣುಲೆಗ್ ತೋಜಾದ್ ಮದಿಮೆ ನಿಗಂಟ್ ಮಲ್ಪೆದೆರ್. ಮಾತೆರ್ಲಾ ಒತ್ತೊಂದು ಸಂಪ್ರದಾಯ ಪ್ರಕಾರ ಒವ್ವಾಂಡಲಾ ದೇಲಂತಡೆಡ್ ಮದಿಮೆ ಆಪೆದೆರ್. ಅವೆರ್ದ್ ಬೊಕ್ಕ ಮೋಲೆನ ಗೊಬ್ಬು ಸುರು ಆಪೆದ್ಂಡ್.
ಕಂಡನ್ಯನ ಇಲ್ಲಡ್ ಮಾತೆರೆಡಲಾ ಬಾರೀ ಎಡ್ಡೆಡ್ ಇತ್ತಿಲೆಕ ಮಲ್ಪೆದಲ್. ಪಾಪದಾಲೆಲೆಕ ಮಾತೆರೆನ್ಲಾ ನಂಬಾವೆದಲ್. ಇಂಚ, ಮದಿಮೆ ಆಯಿನ ಒಂತೆ ದಿನೊಟೆ ತೆನಸ್ಡ್ ಅಮಲ್ ಬರ್ಪಾವುನ ಸೊತ್ತು ಬೆರಕೆ ಮಲ್ತ್ದ್ ಕಂಡನ್ಯನ ಇಲ್ಲದಕ್ಲೆಗ್ ಕೊರ್ಪೆದಲ್. ಬೊಕ್ಕ ಇಲ್ಲಡಿತ್ತಿನ ಕಾಸ್, ಬಂಗಾರ್ ಮಾತಾ ಪೂಜೊಂದು ಪೋಪೆದಲ್. ಈ ಬಗೆಟ್ ಮಂಗೆ ಆತಿನ ಆಣುಲು ಪೊಲೀಸ್ ಸ್ಟೇಷನ್ಡ್ ಒಯಿಲ್ ಬರೆಪಾದಿತ್ತೆರ್. ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ಆರೋಪಿ ಪೊಂಜೊವುನು ಕೈದ್ ಮಲ್ದೆರ್.