Last updated on June 4th, 2025 at 01:50 pm
ಹೆಬ್ರಿ ಜೂನ್ 04: ಒಂಜಿ ಸರ್ತಿ ದೈವಸ್ಥಾನೊದ ಡಬ್ಬಿ ಲಕ್ಕಾದಿನ ಕಲ್ವೆ ಕುಡೊರ ಅವ್ವೇ ದೈವಸ್ಥಾನೊದ ಕಾಣಿಗೆ ಡಬ್ಬಿ ಕಂಡೆರೆ ಬತ್ತ್‌ದ್ ತಿಕ್ಕ್‌ದ್ ಬೂರ್ದಿನ ನಡಕೆ ಮುದ್ರಾಡಿ ಗ್ರಾಮೊದ ನಾಟ್ಕದೂರು ಆದಿಶಕ್ತಿ ಶ್ರೀ ಕ್ಷೇತ್ರೊಡು ನಡತ್‌ದ್ಂಡ್. ದುಂಬು ಕಂಡ್‌ದ್ ಪೋತಿನ ಪೊರ್ತುಡು ದೈವ ಕೊರ್ದಿತ್ತಿನ ಅಭಯೊದ ಪ್ರಕಾರ ಕಲ್ವೆ ತಿಕ್ಕ್‌ದ್ ಬೂರ್ದಿತ್ತ್‌ದ್ ದೈವೊದ ಕಾರಣಿಕ ಪನ್ದ್ ಜನ ನಂಬುದೆರ್.
ಮುದ್ರಾಡಿ ಗ್ರಾಮೊದ ನಾಟ್ಕದೂರು ಅಭಯಹಸ್ತೆ ಆದಿಶಕ್ತಿ ಶ್ರೀ ಕ್ಷೇತ್ರೊಡು ದೇಬೆರೆ ಕಾಣಿಗೆ ಡಬ್ಬಿ ಬೊಕ್ಕ ಕಲ್ಕುಡ ಕಲ್ಲುರ್ಟಿನ ಕಾಣಿಗೆ ಡಬ್ಬಿರ್ದ್ ಮೇ 25ತಾನಿ ರಾತ್ರೆ ಕಲ್ವೆ ಆದಿತ್ತ್ಂಡ್, ಕಲ್ವೆ ಒರಿ ದೈವಸ್ಥಾನೊದ ಕಾಣಿಗೆ ಡಬ್ಬಿ ಕಂಡ್‌ದಿತ್ತೆ, ಬೊಕ್ಕ ಕುಡ ಜೂನ್ 2 ತಾನಿ ನಡೀರ್ ಕುಡ ಅವ್ವೇ ದೈವಸ್ಥಾನೊದ ಡಬ್ಬಿ ಲಕ್ಕಾಯೆರ ಬತ್ತ್‌ದಿತ್ತ್‌ದ್, ಈ ಪೊರ್ತುಡು ಸಾದಿಯೆ ಕಾರ್‌ಡ್ ಪೋವೊಂದಿತ್ತಿನಕುಲು ಕಲ್ವನ್ ತೂತೆರ್. ಅಪಗನೇ ಕಾರ್ ಉಂತಾದ್ ಪಿರ ಬತ್ತ್ ತೂನಗ ಆಯೆ ಮದೆಲ್ ಲಾಗಿದ್ ಬೈಕ್‌ಡ್ ಪದ್ರಾಡಾತೆ. ಕಾರ್‌ಡ್ ಬತ್ತಿನಕುಲು ಮುಟ್ಟದ ಇಲ್ಲದಕ್ಲೆಗ್ ವಿಷಯ ತೆರಿಪಾದ್ ಅಕ್ಲೆನ ಒಟ್ಟು ಸೇರ್ದ್ ಕಲ್ವನ ಬೆರಿಪತ್ತ್‌ದೆರ್. ಒಟ್ಟುಗು ಸೋಮೇಶ್ವರ ಬೊಕ್ಕ ಆಗುಂಬೆ ಚೆಕ್‌ಪೋಸ್ಟ್‌ಗ್ ಒಲವು ಕೊರ್ತೆರ್. ಕಲ್ವೆ ಆಗುಂಬೆ ಎತ್ತ್‌ನಗ ಪೊಲೀಸೆರೆ ಕೈಕ್ ತಿಕ್ಕ್‌ದ್ ಬೂರ್ದೆ. ಇಯನ್ ವಿಚಾರಿಪುನಗ ದಾವಣಗೆರೆ ಹರಿಹರದ ಸಲ್ಮಾನ್‌ ಪನ್ದ್ ಪನ್ಡೊನ್ದೆ. ಹೆಬ್ರಿ ಪೊಲೀಸೆರ್ ಆಯನ್ ಕೈದ್ ಮಲ್ತ್‌ದೆರ್.
ಕಾಣಿಗೆ ಡಬ್ಬಿ ಕಂಡ್‌ದಿನ ಬಗೆಟ್ ಕ್ಷೇತ್ರೊದ ಧರ್ಮದರ್ಶಿ ಸುಕುಮಾರ್‌ ಮೋಹನ್‌ ಮೆರ್ ಮೇ 30ದಾನಿ ನಡತಿನ ನೇಮೊಡು ಕಲ್ಕುಡ ಕಲ್ಲುರ್ಟಿ ಬೊಕ್ಕ ಕೊರಗ ತನಿಯ ದೈವೊಲೆಡ ಅರಿಕೆ ಮಲ್ತೊಂದೆರ್. 9 ದಿನೊತುಲಯಿ ಆಯನ್ ಯಾನ್ ಲೆಪ್ಪುಡಾವೆ ಪನ್ದ್ ದೈವ ಅಭಯ ಕೊರ್ದಿತ್ತ್ಂಡ್. ಆ ಪ್ರಕಾರ ಕಾಲಿ 3 ದಿನೊತ ಉಲಯಿ ಅವ್ವೇ ಕಲ್ವೆ ಕುಡ ಕೊರಗಜ್ಜ ದೈವೊದ ಗುಂಡೊದ ಎದುರು ತಿಕ್ಕ್‌ದ್ ಬೂರ್ದಿನ ದೈವೊದ ಕಾರಣಿಕ ಪನ್ದ್ ಜನ ಪನೊಂದುಲ್ಲೆರ್.