Last updated on June 9th, 2025 at 08:27 am
ಕಡಬ ಜೂನ್ 09: ರೈಲ್ವೆ ಟ್ರ್ಯಾಕ್‌ಡೆ ಪಲಯನ್ ಮೆಗ್ಯೆ ಬೆರಿ ಪತೊಂದು ಪೋದು, ಕೈಕ್ ತಿಕ್ಕಿನೇ ಪೆಟ್ರೋಲ್ ಮೈತ್‌ದ್ ಸೂ ಕೊರ್ತಿನ ನಡಕೆ ಕಡಬದ ಕೋಡಿಂಬಾಳದ ಕೋರಿಯಾರ್‌ದಲ್ಪ ನಡತ್‌ದ್ಂಡ್‌. ಪೊತ್ತುದು ಗಾತಿದ ಸ್ಥಿತಿಟ್ ಇಪ್ಪುನ ಆಂಜೊವುನು ಆಸ್ಪತ್ರೆಗ್ ದಾಕಲ್ತ್‌ದೆರ್.
ಗಡಿಕುಲಾತಿನಾರೆನ್ ಹನುಮಪ್ಪೆ ಪನ್ದ್ ಗುರ್ತ ಪತ್ತ್‌ದೆರ್, ಪೆಟ್ರೋಲ್ ಮೈತಿನಾಯೆ ಆರೆನ ಮೆಗ್ಯೆ ನಿಂಗಪ್ಪೆ ಪನ್ದ್ ತೆರಿದ್ ಬೈದ್ಂಡ್. ಗದಗ ಮೂಲೊದ ಮೆಗ್ಯೆ-ಪಲಯರ್ಲು ಪುತ್ತೂರುಡ್ ಬೇಲೆ ಮಲ್ತೊಂದಿತ್ತೆರ್‌ಗೆ. ಜೂನ್ 8 ದಾನಿ ಮಧ್ಯಾಹ್ನ ಕುಡ್ಲ- ಬೆಂಗಳೂರು ರೈಲ್ ಮಾರ್ಗೊಡೆ ಪೋಪಿನ ಪ್ಯಾಸೆಂಜರ್ ರೈಲ್‌ಡ್ ಬತ್ತ್‌ದ್ ಬಜಕರೆ ರೈಲ್ ಉಂತಡೆಡ್ ಇರ್ವೆರ್ಲಾ ಜತ್ತಿತ್ತೆರ್.
ರೈಲ್ ಪೋಯಿ ಬೊಕ್ಕ ಸುಮಾರ್ 500 ಮೀ ದುಂಬು ಲೆತೊಂದು ಪೋದು ಮೆಗ್ಯೆ ನಿಂಗಪ್ಪೆ ಒರರ್ದ್ ಒರಾನೆ ತನ್ನ ಕೈಟ್ ಇತ್ತಿನ ಪೆಟ್ರೋಲ್‌ನ್ ಹನುಮಪ್ಪನ ಮಿತ್ತ್ ಚೇತ್‌ದ್ ಸೂ ಕೊರ್ತೆ ಪನ್ದ್ ಪನೊಂದುಲ್ಲೆರ್. ಸೂ ಪೊತ್ತೊಂದಿತ್ತಿ ಲೆಕನೆ ಹನುಮಪ್ಪೆ ಬರಿಟ್ ನೀರಿತ್ತಿನ ಕಣಿಕ್ ಲಾಗಿನೆರ್ದಾವರ ಸೂ ತೆಕ್ಕ್‌ದ್ಂಡ್. ಜೋರು ಕಲ್ಕುನೆನ್ ಕೇನ್ದ್ ಅಡೆ ಬಲ್ತೊಂದು ಬತ್ತಿನ ಮುಟ್ಟದಕುಲು ಪೊತ್ತುದು ಪೋತಿನ ಗಡಿಕುಲೆನ್ ತೂತೆರ್. ಅಪಗನೇ ಆರೆನ್ ಕಡಬ ಸಮುದಾಯ ಆಸ್ಪತ್ರೆಡ್ ಪ್ರಾಥಮಿಕ ಮರ್ದ್‌ಗ್ ದಾಕಲ್ತ್‌ದ್ ಎಚ್ಚಿನ ಮರ್ದ್‌ಗ್ ಕುಡ್ಲಗ್ ಲೆತೊಂದು ಪೋತೆರ್.
ಜಾಗೆಗ್ ಬತ್ತಿನ ಕಡಬ ಪೊಲೀಸೆರ್ ಸೂ ಪಾಡ್ದಿನ ಮೆಗ್ಯೆ ನಿಂಗಪ್ಪನ್ ವಶೊಕು ಗೆತೊಂದೆರ್. ರೈಲೇ ಪಟ್ಟೆಡ್ ಈ ನಡಕೆ ನಡತಿನೆರ್ದಾವರ ಪೊಲೀಸೆರ್ ರೈಲ್ವೇ ಪೊಲೀಸೆರೆಗ್ ಕೇಸ್ ಪಗಪುನ ಸಾಧ್ಯತೆ ಉಂಡು. ಈ ನಡಕೆಗ್ ಪತ್ತ ನೆವನ ನನ ಜಡ್ತೆರ್ದ್ ತೆರಿದ್ ಬರೊಡಾತೆ.