Last updated on June 18th, 2025 at 08:18 am
ಅಪ್ರಾಪ್ತ ಆಣನ ಕಿಡ್ನಾಪ್ ಪ್ರಕರಣೊಡು ಪಾಲ್ಪಡೆತಿನ ಆರೋಪಡ್ ತಮಿಳ್ನಾಡ್ದ ಎಚ್ಚಿಗೆದ ಪೊಲೀಸ್ ಮಹಾನಿರ್ದೇಶಕನ್ (ಎಡಿಜಿಪಿ) ಸೋಮವಾರ ಪೊಲೀಸೆರ್ ಕೈದ್ ಮಲ್ದೆರ್. ಈ ಪ್ರಕರಣೊಗು ಸಂಬಂಧಿತ್ದ್ ಮದ್ರಾಸ್ ಹೈಕೋರ್ಟ್ ನಿರ್ದೇಶನೊದ ಬೆರಿಟೇ ಪೊಲೀಸೆರ್ ಎಡಿಜಿಪಿನ್ ಕೈದ್ ಮಲ್ದೆರ್.
ಅವೆರ್ದ್ ಬೊಕ್ಕ ತಿರುವಳ್ಳೂರು ಜಿಲ್ಲೆದ ತಿರುವಲಂಕಡು ಪೊಲೀಸ್ ಸ್ಟೇಶನ್ಗ್ ಲೆತೊಂದು ಪೋತೆರ್.
ಮೋಕೆ ಮಲ್ತ್ದ್ ಮದಿಮೆ ಆತಿನ ಜೋಡಿಲೆನ್ ಬೇತೆ ಮಲ್ಪೆರ ರೌಡಿಲೆಗ್ ತನ್ನ ಕಾರ್ ಕೊರ್ತಿನ ಆರೋಪಲಾ ಇತ್ತಿನ ಎಡಿಜಿಪಿನ್ ಸಸ್ಪೆಂಡ್ ಮಲ್ತ್ದ್ ಕೈದ್ ಮಲ್ದೆರ್.
ಪ್ರಕರಣೊಡು ಶಾಸಕೆರೆನಲಾ ಕೈ!!
ಈ ಪ್ರಕರಣೊಡು ಕೈದಾಪಿನ ಸಾಧ್ಯತೆ ಉಂಡು ಪನ್ದ್ ಆರೋಪ ಮಲ್ತ್ದ್ ಶಾಸಕೆ ಎಂ.ಜಗನ್ ಮೂರ್ತಿ ನಿರೀಕ್ಷಣಾ ಜಾಮೀನ್ಗ್ ಅರ್ಜಿ ಪಾಡ್ದಿತ್ತೆರ್. ಅರ್ಜಿದ ವಿಚಾರಣೆ ಮಲ್ತಿನ ನ್ಯಾಯಮೂರ್ತಿ ಪಿ. ವೇಲ್ಮುರುಗನ್ ಕೈದ್ ಮಲ್ಪೆರೆ ನಿರ್ದೇಶನ ಕೊರ್ಪುನೆತ ಒಟ್ಟುಗು ಶಾಸಕೆರ್ ದಾಯೆ ಈ ಪ್ರಕರಣೊಡು ಪೋಲೀಸೆರೆರ್ದ್ ಬಲ್ಪೆರ ತೂವೊಂದುಲ್ಲೆರ್ ಪನ್ದ್ ಪ್ರಶ್ನೆ ಮಲ್ದೆರ್. ಅಂಚೆನೇ ಕಿಡ್ನಾಪ್ ಪ್ರಕರಣೊಡು ಪೊಲೀಸೆರೆ ಒಡ್ತೆಗ್ ಸಹಕರಿಪೊಡು ಪನ್ದ್ ಸೂಚನೆ ಕೊರ್ದು, ಶಾಸಕನ ಅರ್ಜಿನ್ ತಿರಸ್ಕಾರ ಮಲ್ದೆರ್.
ತಮಿಳುನಾಡ್ದ ತಿರುವಳ್ಳೂರ್ ಜಿಲ್ಲೆದ ನಾನ್ಕಾಡ್ದ ತನುಷ್ ಪನ್ಪಿನಾಯೆ ತಮಿಳುನಾಡ್ದ ತೇಣಿ ಜಿಲ್ಲೆದ ವಿಜಯಶ್ರೀ ಪನ್ಪಿನ ಪೊಣ್ಣಡ ಇನ್ಸ್ಟಾಗ್ರಾಮ್ಡ್ ಗುರ್ತ ಆದ್ ಒರಿಯನೊರಿ ಮೋಕೆ ಮಲ್ತೊಂದಿತ್ತೆರ್. ಇಂಚಿ ಮಗಲ್ ವಿಜಯಶ್ರೀನ ಮೋಕೆದ ವಿಚಾರ ತೆರಿನ ಅಪ್ಪೆಅಮ್ಮೆ ಆಲೆನ್ ಬೇತೆ ಏರೆಗೋ ಮದಿಮೆ ಮಲ್ತ್ ಕೊರ್ಯೆರ ಪಿದಡ್ದೆರ್.
ಈ ವಿಚಾರ ತೆರಿದ್ ವಿಜಯಶ್ರೀ ಇಲ್ಲರ್ದ್ ಬಲ್ತ್ದ್, ಮೇ 15ತಾನಿ ತನುಷ್ನ ಒಟ್ಟುಗು ವಿಜಯಶ್ರೀ ರಿಜಿಸ್ಟರ್ಡ್ ಮದಿಮೆ ಆತ್ಂಡ್. ಉಂದೆರ್ದಾವರ ಪಿಸಿರಾತಿನ ಪೊಣ್ಣನ ಇಲ್ಲದಕುಲು ತಿರುವಾಳಂಗಾಡ್ದ ಕಳಪ್ಪಾಕ್ಕಂ ದ ತನುಷ್ನ ಇಲ್ಲಗ್ ಪೋದು, ಅಲ್ಪರ್ದ್ ತನುಷ್ನ ಮೆಗ್ಯನ್ ಗಾಡಿಡ್ ಕಿಡ್ನಾಪ್ ಮಲ್ತ್ ಲೆತೊಂದು ಪೋತೆರ್ ಪನ್ದ್ ತನುಷ್ನ ಅಪ್ಪೆ ಪೊಲೀಸೆರೆಗ್ ಒಯಿಲ್ ಕೊರ್ತೆರ್
ಪ್ರಕರಣ ದಾಕಲ್ತೊಂದಿನ ತಿರುವಾಳಂಗಾಡ್ದ ಪೊಲೀಸೆರ್ ವಿಚಾರಣೆ ಮಲ್ತ್ದ್ ವಿಜಯಶ್ರೀನ ಅಪ್ಪೆ ಸೇರ್ದ್ ಮೂವೆರೆನ್ ಕೈದ್ ಮಲ್ದೆರ್. ಈ ಕಿಡ್ನಾಟ್ಡ್ ಪುರಚಿ ಭಾರತಂ ಪಕ್ಷೊದ ನಾಯಕೆ ಬೊಕ್ಕ ಶಾಸಕೆಲಾ ಆದುಪ್ಪುನ ಪಿವೈ ಜಗನ್ಮೂರ್ತಿ ಪಾಲ್ಪಡೆತೆರ್ ಪನ್ದ್ ಕೇನ್ದ್ ಬತ್ತಿತ್ತ್ದ್ ಕೆ.ವಿ.ಕುಪ್ಪಂ ಶಾಸಕೆ ಜಗನ್ಮೂರ್ತಿ ಸೇರ್ದ್ ಬೇತೆ ಒಂತೆ ಜನತ ಮಿತ್ತ್ ಕೇಸ್ ಪಾಡ್ದೆರ್.