Last updated on June 19th, 2025 at 03:06 pm
ಬಿ.ಸಿ.ರೋಡ್, ಜೂನ್ 19: ಬೊಡೆದಿನ್ ಕೆರ್ದ್ ತಾನ್ಲಾ ಆತ್ಮಹತ್ಯೆ ಮಲ್ತೊಂದಿನಲೆಕ ಕಂಡನೆ-ಬೊಡೆದಿ ಇರ್ವೆರ್ ತೀರ್ದಿನ ಬೆಸರ್ದ ನಡಕೆ ಬಂಟ್ವಾಳ ಗ್ರಾಮಾಂತರ ಪೋಲೀಸ್ ಸ್ಟೇಷನ್ ಸೀಮೆದ ಬಡಗುಂಡಿ ಪನ್ಪಿನಲ್ಪ ಇನಿ ನಡತ್ದ್ಂಡ್.
ಸಜೀಪಮೂಡ ಗ್ರಾಮೊದ ಮಿತ್ತಮಜಲ್ ನಿವಾಸಿ ತಿಮ್ಮಪ್ಪ ರಾಮ ಮೂಲ್ಯೆರ್ (52) ಬೊಕ್ಕ ಆರೆನ ಬೊಡೆದಿ ಜಯಂತಿ (45) ತೀರ್ದಿನಕುಲು.
ಒವ್ವಾ ಕಿಞ್ಞ ನೆವನೊಡು ಲಡಯಿ ಆದ್, ಪಿಸ್ರ್ಡ್ ಬೊಡೆದಿ ಜಯಂತಿಗ್ ಆಕ್ದ್, ಕೆಕ್ಕಿಲ್ ಪೊಜೆಂಕ್ದ್ ಕೆರ್ತೆರ್, ಬೊಕ್ಕ ತಿಮ್ಮಪ್ಪೆರ್ಲಾ ಅಡ್ಪಿಲ್ಲ್ದ ಪಕ್ಕಾಸ್ಗ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್ ಪನ್ದ್ ತೆರಿದ್ ಬೈದ್ಂಡ್. ಈ ಬಗೆಟ್ ತೀರ್ದಿನ ತಿಮ್ಮಪ್ಪೆರೆನ ಮೆಗ್ಯೆ ವಿಶ್ವನಾಥೆರ್ ಬೊಕ್ಕ ತೀರ್ದಿನ ಜಯಂತಿ ಮೆರೆನ ಮೆಗ್ದಿ ಸುಜಾತ ಬಂಟ್ವಾಳ ಗ್ರಾಮಾಂತರ ಸ್ಟೇಷನ್ಡ್ ಕೊರ್ತಿನ ಒಯಿಲ್ದ ಪ್ರಕಾರ ಪ್ರಕರಣ ದಾಕಲಾತ್ಂಡ್.
ಗುರುವಾರ ಕಾಂಡೆ ಜಯಂತಿ ಮೆರೆನ ಪುನ ಅದೆಟ್ ಬೆಡ್ದ ಅಡಿಟ್ ಜೆತ್ತಿನ ಸ್ಥಿತಿಟ್ ಇತ್ತ್ಂಡ ತಿಮ್ಮಪ್ಪೆರ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ಸ್ಥಿತಿಟ್ ಇತ್ತಿನೆನ್ ಮುಟ್ಟದಕುಲು ತೂತೆರ್.
ಮದಿಮೆ ಆದ್ ಸುಮಾರ್ 16 ವರ್ಸ ಕರಿದ್ ಜಯಂತಿ ಮೇರ್ ಬಂಜಿನಾಲ್ ಆದಿತ್ತ್ದ್, ಜುಲೈ 2ಕ್ ಬಯಕೆಗ್ ದಿನ ದೀದಿತ್ತೆರ್. ಬಂಟ್ವಾಳ ಗ್ರಾಮಾಂತರ ಪೋಲೀಸ್ ಇನ್ಸ್ಪೆಕ್ಟರ್ ಶಿವಕುಮಾರ್ ಬತ್ತ್ದ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.