Last updated on June 20th, 2025 at 02:39 pm
ಯಕುಂದಾಪುರ, ಜೂನ್ 20: ಬೊಡೆದಿ ಏಪೊಲಾ ಮೊಬೈಲ್ ತೂವೊಂದುಪ್ಪುವಲ್ ಪನ್ದ್ ಕಂಡನೆ ಪಿಸ್ರ್ಡ್, ಬೊಡೆದಿನ್ ಕತ್ತಿಡ್ ಕಡ್ತ್ದ್ ಕೆರ್ತಿನ ನಡಕೆ ಬೆರ್ಮಾವರ ತಾಲೂಕು ಹಿಲಿಯಾಣ ಗ್ರಾಮೊದ ಹೊಸಮಠ ಪನ್ಪಿನಲ್ಪ ಜೂನ್ 19 ದ ರಾತ್ರೆ 11.30ಕ್ಕ್ ನಡತ್ದ್ಂಡ್.
ಸೈದಿನಾರೆನ್ ಹೊಸಮಠ ನಿವಾಸಿ ರೇಖಾ(27) ಪನ್ದ್ ಗುರ್ತ ಪತ್ತ್ದೆರ್. ಕೆರ್ತಿನ ಆರೋಪಿ, ಆರೆನ ಕಂಡನೆ ಕೊಳಂಬೆ ಗ್ರಾಮೊದ ನಿವಾಸಿ ಗಣೇಶ ಪೂಜಾರಿ(42) ಪನ್ಪಿನಾಯನ್ ಶಂಕರನಾರಾಯಣ ಪೊಲೀಸೆರ್ ಕೈದ್ ಮಲ್ದೆರ್. ಆರೋಪಿ ಗಣೇಶ್ ಪೂಜಾರಿ ಮಲ್ಲ ಕುಡ್ಚೆಲೆ ಆದಿತ್ತೆ. ಬೊಡೆದಿ ಎಚ್ಚಾದ್ ಮೊಬೈಲ್ ಗಲಸುವಲ್ ಪನ್ದ್ ಪಿಸ್ರ್ಡ್, ತಾರಾಮರ ಪರ್ದ್ ಇಲ್ಲಗ್ ಬತ್ತ್ದ್ ಗುರುವಾರ ರಾತ್ರೆ ಕತ್ತಿಡ್ ಕಡ್ತ್ದ್ ಕೆರ್ತೆ.
ಪೈಂಟಿಂಗ್ ಬೇಲೆಗ್ ಪೋಪುನ ಗಣೇಶ್ ಬೊಕ್ಕ ರೇಖಾಗ್ 8 ವರ್ಸೊಗು ದುಂಬು ಮದಿಮೆ ಆದಿತ್ತ್ದ್ ಇರ್ವೆರ್ ಜೋಕುಲು ಉಲ್ಲೆರ್. ರೇಖಾ ಪೆಟ್ರೋಲ್ ಬಂಕ್ ಒಂಜೆಟ್ ಬೇಲೆ ಮಲ್ತೊಂದಿತ್ತೆರ್. ಇಂಚಿಪ ಇಂಚಿಪ ಗಣೇಶ್ ಮೊಬೈಲ್ ವಿಚಾರೊಡು ಅಪಗಪಗ ಲಡಯಿ ಮಲ್ತೊಂದಿತ್ತೆ ಪನ್ದ್ ತೆರಿದ್ ಬೈದ್ಂಡ್.
ಗುರುವಾರ ರಾತ್ರೆ ಇಲ್ಲಗ್ ಬತ್ತ್ದ್ ಎಲ್ಯ ನೆವನೊಗು ಬೊಡೆದಿಡ ಲಡಯಿ ಮಲ್ತ್ದೆ. ಬೊಕ್ಕ ಪಿಸ್ರ್ಡ್ ಕತ್ತಿಡ್ ಕಡ್ತ್ದಿತ್ತ್ದ್, ಗಾತಿದ ಗಡಿ ಆದ್ ರೇಖಾ ಅಲ್ಪನೇ ತೀರ್ದೆರ್ ಪನ್ದ್ ತೆರಿದ್ ಬೈದ್ಂಡ್. ನಡಕೆರ್ದ್ ಬೊಕ್ಕ ಇಲ್ಲರ್ದ್ ಪದ್ರಾಡಾದಿತ್ತಿನ ಆರೋಪಿ ಗಣೇಶನ್ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್. ಈ ಬಗೆಟ್ ಶಂಕರನಾರಾಯಣ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.