Last updated on June 23rd, 2025 at 08:37 am
ಮಣಿಪಾಲ, ಜೂನ್ 23: ಪೆದ್ದಿನಪ್ಪೆನೇ ಕೆರ್ದ್ ಉಸಾರ್ತತ್ತ್ದ್ ಅಪ್ಪೆ ತೀರ್ದೆರ್ ಪನ್ದ್ ಮಗೆ ಒರಿ ಕಥೆ ಕಟ್ಟ್ದೆ. ಆಂಡ ಮರಣೋತ್ತರ ಪರೀಕ್ಷೆಡ್ ಕೆರ್ತಿನವು ತೆರಿದ್ ಬೈದ್ಂಡ್. ಆತ್ತೆ ಕೆಂಗುಡೆ ಮಗನ್ ಪೊಲೀಸೆರ್ ಕೈದ್ ಮಲ್ದೆರ್.
ಕೊಲೆ ಆತಿನಾರೆನ್ ಮಣಿಪಾಲದ ಪದ್ಮಾಬಾಯಿ (45 ವರ್ಸ) ಪನ್ದ್ ಗುರ್ತ ಪತ್ತ್ದೆರ್. ಕೆರ್ತಿನ ಆರೋಪಿ ಈಶ ನಾಯಕ್ ನ್ ಮಣಿಪಾಲ ಪೊಲೀಸೆರ್ ಕೈದ್ ಮಲ್ತಿತ್ತ್ದ್, ವಿಚಾರಣೆ ಮಲ್ತೊಂದುಲ್ಲೆರ್.
ಪದ್ಮಾಬಾಯಿ ಮೇರ್ ಸೊಂಟ ಬೇನೆಡ್ ಕೂರೊಂದಿತ್ತೆರ್. ಅಂಚಾದ್ ಜೂನ್ 18 ದಾನಿ ಒಡಿಪುದ ಅಜ್ಜೆರೆಕಾಡ್ದ ಸರಕಾರಿ ಜಿಲ್ಲಾಸ್ಪತ್ರೆಡ್ ಮರ್ದ್ ಗೆತೊಂದಿತ್ತೆರ್. ಆನಿ ರಾತ್ರೆ ಪದ್ಮಬಾಯಿ ತನ್ನ ಸಂಗಡಿ ಶಿಲ್ಪಾ ಮೆರೆಗ್ ಕಾಲ್ ಮಲ್ತ್ದ್ ಉಸಾರಿಜ್ಜಂದಿನ ಬಗೆಟ್ ತೆರಿಪಾದಿತ್ತೆರ್.
ರಾತ್ರೆ ಪದ್ಮಾಬಾಯಿ ಮೆರೆನ ಮಗೆ ಈಶ ನಾಯಕ್ ಶಿಲ್ಪಾ ಮೆರೆಗ್ ಕಾಲ್ ಮಲ್ತ್ದ್ ಅಪ್ಪೆಗ್ ಉಸಾರಿಜ್ಜಿ, ಆರೆನ್ ಆಸ್ಪತ್ರೆಗ್ ಲೆತೊಂದು ಪೋಯೆರ ಕಾಸ್ ಕೊರ್ಲೆ ಪನ್ದ್ ಕೇನ್ದೆ. ಆಂಡ ಜೂನ್ 19 ದಾನಿ ಕಾಂಡೆ ಈಶ ನಾಯಕ್ ಶಿಲ್ಪ ಮೆರೆಗ್ ಕಾಲ್ ಮಲ್ತ್ದ್ ಅಪ್ಪೆ ತೀರ್ದಿನ ವಿಚಾರ ತೆರಿಪಾದೆ.
ಒಡಿಪುದ ಜಿಲ್ಲಾಸ್ಪತ್ರೆಗ್ ಬತ್ತ್ದ್ ತನ್ನ ಪಲಿನ್ ತೂನಗ ಶಿಲ್ಪಾ ಮೆರೆಗ್ ಡೌಟ್ ಬತ್ತ್ದ್ಂಡ್. ಪದ್ಮಾಬಾಯಿನ ಕೆಕ್ಕಿಲ್ಡ್ ಗಡಿತ ಗುರ್ತು ಇತ್ತ್ಂಡ್. ಅಪಗನೇ ಮಣಿಪಾಲ ಪೊಲೀಸೆರೆಗ್ ಶಿಲ್ಪಾ ಒಯಿಲ್ ಕೊರ್ತೆರ್.
ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾಯಿನೇ ಖಾಸಗಿ ಆಸ್ಪತ್ರೆಡ್ ಮರಣೋತ್ತರ ಪರೀಕ್ಷೆ ಮಲ್ದೆರ್. ಫಾರೆನ್ಸಿಕ್ ವಿಭಾಗೊದ ವೈದ್ಯಾಧಿಕಾರಿಲು ಉಂದೊಂಜಿ ಸಹಜ ತೀರ್ದಿನ ಅತ್ತ್, ಕೆರ್ತೆರ್ ಪನ್ಪಿನ ಬಗೆಟ್ ಪ್ರಾಥಮಿಕ ವರದಿನ್ ಕೊರ್ದಿತ್ತೆರ್.
ಜೂನ್ 18ದ ರಾತ್ರೆರ್ದ್ ಜೂನ್ 19ದ ನಡುಟು ಪೊಂಜೊವುನು ಕೆರ್ತೆರ್ ಪನ್ದ್ ಮರಣೋತ್ತರ ಪರೀಕ್ಷೆಡ್ ತೆರಿದ್ ಬೈದ್ಂಡ್. ಅಪಗನೇ ಮಣಿಪಾಲ ಪೊಲೀಸೆರ್ ಮಗೆ ಈಶ ನಾಯಕ್ನ ವಿಚಾರಣೆ ಮಲ್ಪುನಗ ಕೆರ್ತೆ ಪನ್ದ್ ತೆರಿದ್ ಬೈದ್ಂಡ್.
ಆರೋಪಿ ಈಶ ನಾಯಕ್ನ್ ಕೈದ್ ಮಲ್ದಿನ ಪೊಲೀಸೆರ್, ನ್ಯಾಯಂತಡೆಗ್ ಹಾಜಿರಿ ಮಲ್ತ್ದೆರ್. ಕಾಸ್ಗ್ ಅಂಚೆನೇ ಇಲ್ಲದ ಕೊಲಲೊರ್ದಾವರ ಕೆರ್ದಿಪ್ಪೊಡು ಪನ್ದ್ ಪನೊಂದುಲ್ಲೆರ್. ಆಂಡ ಸತ್ಯಾಂಶ ಪೊಲೀಸೆರೆ ಜಡ್ತೆರ್ದೇ ತೆರಿದ್ ಬರೊಡಾತೆ.