Last updated on June 25th, 2025 at 02:20 pm
ಕುಡ್ಲ ಜೂ. 25: ಬೇತೆ ಬೇತೆ ಆ್ಯಪ್ಲೆಡ್ ಕಡ ಗೆತೊಂದು ಆರ್ಥಿಕ ಸಮಸ್ಯೆರ್ದಾವರ ಬೆಸರ್ಡ್ ಜವನೆ ಒರಿ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ನಡಕೆ ಕೋಡಿಕಲ್ಡ್ ನಡತ್ದ್ಂಡ್.
ತೀರ್ದಿನಾರೆನ್ ಕೋಡಿಕಲ್ ನಿವಾಸಿ ನಿಖಿಲ್ ಪೂಜಾರಿ (30) ಪನ್ದ್ ಗುರ್ತ ಪತ್ತ್ದೆರ್. ಸೋಮವಾರ ಕಾಂಡೆ ತನ್ನ ಇಲ್ಲಡ್ ತೆನಸ್ ತಿನ್ದ್ದ್ ನಿಖಿಲ್ ಪೂಜಾರಿ ಅದೆ ಸೇರ್ದಿತ್ತೆರ್. ಬಯ್ಯ ಮುಟ್ಟ ಜೆಪ್ಪುನ ಅಭ್ಯಾಸ ಇತ್ತಿನೆರ್ದಾವರ ಇಲ್ಲದಕುಲು ನಿಖಿಲ್ನಂಚಿ ಆತ್ ಗೇನ ಕೊರ್ತುಜೆರ್. ಬಯ್ಯಾನಗ ಬಾಕಿಲ್ ಬೊಟ್ಟ್ಂಡಲಾ ಓಪನ್ ಮಲ್ಪಂದಿನೆರ್ದಾವರ ಫೋನ್ ಮಲ್ತ್ದೆರ್. ಆಂಡ ಫೋನ್ಲಾ ರಿಸೀವ್ ಮಲ್ತ್ದಿಜೆರ್. ಅಂಚಾದ್ ರಾತ್ರೆ 8:15ತ ಅಂದಾಜಿಗ್ ಬಾಕಿಲ್ದ ಇಡೆರ್ದ್ ತೂನಗ ನಿಖಿಲ್ ಆತ್ಮಹತ್ಯೆ ಮಲ್ತೊಂದಿನ ತೆರಿದ್ ಬೈದ್ಂಡ್. ಅಪಗನೇ ಬಾಕಿಲ್ ಪುಡತ್ದ್ ಉಲಯಿ ಪೊಗ್ಗುದು ತೂನಗ ಆತ್ಮಹತ್ಯೆ ಮಲ್ತೊಂದಿನ ತೋಜಿದ್ ಬೈದ್ಂಡ್.
ಬೇತೆ ಬೇತೆ ಆ್ಯಪ್ಲೆಡ್ ನಿಖಿಲ್ ಕಡ ಗೆತೊಂದಿತ್ತ್ದ್, ಉಂದೆರ್ದಾವರ ಆರ್ಥಿಕ ಸಮಸ್ಯೆಲಾ ಆದಿತ್ತ್ಂಡ್. ಅಪ್ಪೆಗ್ ಉಸಾರಿಜ್ಜಿ ಪನ್ದ್ ಒಂಜಿ ವಾರೊರ್ದಿಂಚಿ ಬೇಲೆಗ್ ರಜೆ ಪಾಡ್ದಿತ್ತೆಗೆ. ಈ ಬಗೆಟ್ ಉರ್ವ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.