Last updated on June 30th, 2025 at 01:22 pm
ಬೆಂಗಳೂರು, ಜೂ. 30: ಬೆಂಗಳೂರ್ದ ಚನ್ನಮ್ಮನಕೆರೆ ಸ್ಟೇಶನ್ ಸೀಮೆದ ಸ್ಕೇಟಿಂಗ್ ಗ್ರೌಂಡ್ದ ಕೈತಲ್ ನಡತಿನ ಕೊಲೆತ ಗುಟ್ಟುನ್ ಪಿದಯಿ ಕನಪುನೆಟ್ ಪೊಲೀಸೆರ್ ಯಶಸ್ವಿ ಆತೆರ್. ಇರ್ವೆರ್ ಜೋಕುಲೆನ ಅಪ್ಪೆನ ಒಟ್ಟುಗು, ಲಿವಿಂಗ್ ಟುಗೆದರ್ಡ್ ಇತ್ತಿನಾಯೆನೇ ಕೆರ್ತೆ ಪನ್ಪಿನ ವಿಚಾರ ತೆರಿದ್ ಬತ್ತಿತ್ತ್ದ್, ಆರೋಪಿ ಸಂಶುದ್ದೀನ್ ಪನ್ಪಿನಾಯನ್ ಕೋಡೆ, ಐತಾರ ರಾತ್ರೆ ಕೈದ್ ಮಲ್ದೆರ್.
ಸಿಸಿಟಿವಿ ದೃಶ್ಯ ಪರಿಶೀಲನೆ ಮಲ್ತ್ದ್ ಆರೋಪಿನ್ ಕೈದ್ ಮಲ್ತಿನ ಚನ್ನಮ್ಮನಕೆರೆ ಅಚ್ಚುಕಟ್ಟು ಪೊಲೀಸೆರ್ ಕೊಲೆತ ಗುಟ್ಟುನು ಪಿದಯಿ ಕನತ್ದೆರ್. ತೀರ್ದಿನ ಪೊಂಜೊವುನು ಆಶಾ ಪನ್ದ್ ಗುರ್ತ ಪತ್ತ್ದೆರ್.
ಆಶಾ, ಸಂಶುದ್ದೀನ್ನ ವಿಚಿತ್ರ ಲವ್ ಸ್ಟೋರಿ:
ಕೊಲೆ ಆರೋಪಿ ಸಂಶುದ್ದೀನ್ ಅಸ್ಸಾಂದಾಯೆ. ಆಯಗ್ ಬೊಡೆದಿ ಬೊಕ್ಕ ರಡ್ಡ್ ಜೋಕುಲು ಉಲ್ಲೆರ್. ಬೊಡೆದಿ ಜೋಕುಲು ಅಸ್ಸಾಂಡೇ ಇತ್ತ್ದ್, ಸಂಶುದ್ದೀನ್ ಬೆಂಗಳೂರ್ಡ್ ಬೇಲೆ ಮಲ್ತೊಂದಿತ್ತೆ. ಕಂಪೆನಿ ಒಂಜೆಟ್ ಬೇಲೆ ಮಲ್ಪುನಗ ಆಶಾನ ಗುರ್ತ ಆತ್ಂಡ್. ಆಶಾನ ಕಂಡನೆ ತೀರ್ದಿತ್ತ್ದ್, ಇರ್ವೆರ್ ಜೋಕುಲುಲಾ ಉಲ್ಲೆರ್. ಆಶಾ ಬೊಕ್ಕ ಸಂಶುದ್ದೀನ್ನ ನಡುಟು ಮೋಕೆ ಪುಟ್ಟುದಿತ್ತ್ದ್, ಪುಳಿಕುಕ್ಕು(ಹುಳಿಮಾವು)ಡ್ ಇಲ್ಲ್ ಮಲ್ತ್ದ್ ಲಿವಿಂಗ್ ಟುಗೆದರ್ಡ್ ಇತ್ತೆರ್.
ಲಿವಿಂಗ್ ಟುಗೆದರ್ಡ್ ಇತ್ತಿನ ಆರೋಪಿ ಸಂಶುದ್ದೀನ್ ಬೊಕ್ಕ ಆಶಾ ಸುರು ಸುರುಕು ಎಡ್ಡೆಡೇ ಇತ್ತೆರ್. ಬೊಕ್ಕ ಬೊಕ್ಕ ಆಶಾ ಗಡೀಗಡೀ ಲಡಯಿ ಮಲ್ಪೆರ ಪತ್ತ್ದಲ್ ಪನ್ದ್ ಪನ್ತೆರ್. ಶನಿವಾರ ಲಡಯಿ ಜೋರಾದ್, ಆಶಾನ ಕೆಕ್ಕಿಲ್ ಪೊಜೆಂಕ್ದ್ ಸಂಶುದ್ದೀನ್ ಕೆರ್ತೆ.
ಅವೆರ್ದ್ ಬೊಕ್ಕ ಪುನನ್ ಬೈಕ್ಡ್ ದೀವೊಂದು ಬತ್ತಿನ ಆರೋಪಿ ಅವೆನ್ ಚನ್ನಮ್ಮನಕೆರೆ ಸ್ಟೇಷನ್ ಸೀಮೆದ ಸ್ಕೇಟಿಂಗ್ ಗ್ರೌಂಡ್ ಕೈತಲ್ ಕಜವುದ ಲಾರಿಗ್ ದಕ್ಕ್ದ್ ಪದ್ರಾಡಾತೆ. ಶನಿವಾರ ರಾತ್ರೆ, ಮುಟ್ಟದಾರ್ ಒರಿ ಕಜವು ಪಾಡ್ರೆ ಬನ್ನಗ ಲಾರಿಡ್ ಪೊಂಜೊವುನ ತರೆ ಕುಜಲ್ ತೋಜಿದ್ಂಡ್. ಆರ್ ಪೊಲೀಸ್ ಸ್ಟೇಶನ್ಗ್ ಒಲವು ಕೊರ್ತೆರ್. ಜಾಗೆಗ್ ಬತ್ತಿನ ಪೊಲೀಸೆರ್ ಪುನನ್ ಗಂಟ್ ಕಟ್ಟ್ದ್ ದಕ್ಕಿನ ಸ್ಥಿತಿಟ್ ತೂತೆರ್. ಬೊಕ್ಕ ಪ್ರಕರಣ ದಾಕಲ್ತೊಂಡಿನ ಚನ್ನಮ್ಮನಕೆರೆ ಅಚ್ಚುಕಟ್ಟು ಪೊಲೀಸೆರ್, ಕೆಂಗುಡೆರೆಗ್ ಬೋಡಾದ್ ನಾಡುನ ಬೇಲೆಗ್ ಜತ್ತೆರ್. ಸಿಸಿಟಿವಿ ಫೂಟೇಜ್ಲೆನ್ ತೂದು ಕಾರ್ಯಾಚರಣೆ ಮಲ್ತಿನ ಪೊಲೀಸೆರೆ ಕೈಕ್ ಕೆರ್ತಿನಾಯೆ ತಿಕ್ಕ್ದ್ ಬೂರ್ದೆ.