ಪಿಲಿಕುಳಡ್ ನಿಗೂಢವಾದ್ ಸಯ್ಯೊಂದುಲ್ಲ ಮುರ್ಗಪಕ್ಕಿಲು

Last updated on July 5th, 2025 at 09:56 am

ಕುಡ್ಲ, ಜು. 05: ಕುಡ್ಲದ ಪಿಲಿಕುಳ ಜೈವಿಕ ಉದ್ಯಾನವನೊಡು ಮುರ್ಗೊಲು ನಿಗೂಢವಾದ್ ಒಂಜೊಂಜೆ ಸಯ್ಯೋಂದುಲ್ಲ. ಕಾಲಿ ಒಂಜಿ ವಾರೊದುಲಯಿ ಪಿಲಿಕುಳ ಜೈವಿಕ ಉದ್ಯಾನವನೊಡು ಒರ್ಮ್ಬ ಮುರ್ಗೊಲು ಸೈದಿನ ಬಗೆಟ್ ಒಲವು ತಿಕ್ಕ್‌ದ್ಂಡ್. 2 ಕೃಷ್ಣಮೃಗ, 5 ಬೆರು, 1 ಬೊಲ್ಯ ಗುಮ್ಮೆ ಬೊಕ್ಕ 1 ಬರಿಂಕೆ ಸೇರ್ದ್ ಒಟ್ಟು 9 ಮುರ್ಗಪಕ್ಕಿಲು ತೀರ್ದ ಪನ್ದ್ ತೆರಿದ್ ಬೈದ್ಂಡ್.

ಇಂಚಿಪ ಪಿಲಿಕುಳ ಜೈವಿಕ ಉದ್ಯಾನವನೊದುಲಯಿ ನೀರ್ ಪೊಗ್ಗುದು, ಕಂಪೌಂಡ್ ಜರಿದ್ ಮುರ್ಗೊಲೆಗ್ ಉಪದ್ರ ಆದಿತ್ತ್ಂಡ್. ಈ ಬಗೆಟ್ ವನ್ಯಜೀವಿ ಸಂರಕ್ಷಕೆ ಭುವನ್ ದೇವಾಡಿಗ ಮೇರ್ ಸೆಂಟ್ರಲ್ ಝೂ ಅಥಾರಿಟಿಗ್ ಒಯಿಲ್ ಬರೆದಿತ್ತೆರ್.‌ ಈ ಒಯಿಲ್‌ದ ಮಿತ್ತ್ ಮುಖ್ಯ ವನ್ಯಜೀವಿ ವಾರ್ಡನ್‌ಗ್ ಶೋಕಾಸ್ ನೋಟಿಸ್ ಕೊರ್ದಿತ್ತೆರ್. ಉಂದಾದ್ ವಾರೊದುವಯಿ ಪಿಲಿಕುಳಡ್ ಒರ್ಮ್ಬ ಮುರ್ಗೊಲು ತೀರ್ದಿನ ಒಲವು ತಿಕ್ಕ್‌ದ್ಂಡ್.

ಪಿಲಿಕುಳ ಅಭಿವೃದ್ಧಿ ಪ್ರಾಧಿಕಾರೊದ ಪ್ರಭಾರ ಆಯುಕ್ತೆ ಡಾ. ಅರುಣ್ ಕುಮಾರ್ ಶೆಟ್ಟಿ ಮೇರಾ ಜಾಗೆದ ಪರಿಶೀಲನೆ ಮಲ್ತಿತ್ತ್‌ದ್, ಇಂಚಿಪ ಉದ್ಯಾನವನೊಟು ಬೇತೆ ಬೇತೆ ನೆವನೊರ್ದಾವರ ಮುರ್ಗಪಕ್ಕಿಲು ಸಯ್ಯೊಂದುಲ್ಲ. ಆಜಿ ಬೆರುಕ್ಲೆಡ್, ಐನ್ ಬೆರುಕುಲು ಕರಿನ ನಾಲ್ ದಿನೊಟು ತೀರ್ದ. ಕುಡ ಕರಿನ ಶುಕ್ರವಾರ ಮಲ್ಲ ಚನಿಲ್ ತೀರ್ದ್ಂಡ್ ಪನ್ದ್ ಪನ್ಡೆರ್.