Last updated on July 10th, 2025 at 03:52 pm
ಕುಡ್ಲ, ಜು. 10: 2018 ರ್ದ್ 2023 ತ ನಡುಟು 359 ಕಾಂಟ್ರಾಕ್ಟ್ ಬೊಕ್ಕ ಟೆಂಪರರಿ ಸಿಬ್ಬಂದಿಲೆನ ಅನಧಿಕೃತ ನೇಮಕಾತಿರ್ದಾವರ ಸುಮಾರ್ 26 ಕೋಟಿ ರೂ.ದಾತ್ ಆರ್ಥಿಕ ನಷ್ಟ ಆತ್ಂಡ್ ಪನ್ದ್ ಆಂತರಿಕ ವರದಿ ಒಂಜಿ ತೋಜಾಯಿ ಬೊಕ್ಕ ಮಂಗಳೂರು ವಿಶ್ವವಿದ್ಯಾಯದ ಬಗೆಟ್ ಆಕ್ರೋಶ ತೋಜಿದ್ ಬರೊಂದುಂಡು. ಸಿಂಡಿಕೇಟ್ ಅತ್ತ್ಂಡ ರಾಜ್ಯ ಸರ್ಕಾರೊದ ಅನುಮೋದನೆದಾಂತೆ ಮಲ್ದಿನ ಲೆಕ್ಕೊರ್ದು ಎಚ್ಚಿನ ನೇಮಕಾತಿಲೆನ್ ಇಂಚಿಪ ಸರ್ಕಾರಿ ಲೆಕ್ಕಪರಿಶೋಧನೆದ ಪೊರ್ತುಡು ನಾಡ್ಪತ್ತ್ದೆರ್.
ಈ ವಿಷಯೊನು ಪ್ರಸ್ತಾಪ ಮಲ್ತಿನ ಸಿಂಡಿಕೇಟ್ ಸದಸ್ಯೆ ರಘುರಾಜ್, “ನಿಜವಾಯಿನ ಆರ್ಥಿಕ ನಷ್ಟ 30 ಕೋಟಿ ರೂ.ರ್ದ್ಲಾ ಮಿತ್ತಿಪ್ಪು” ಪನ್ದ್ ಪನ್ತೆರ್. “ನನದ ಸಿಂಡಿಕೇಟ್ ಇನಯೊಡು ಕುಡ ಲೆಕ್ಕಾಚಾರ ಮಲ್ತ್ದ್ ಪೊಸ ವರದಿನ್ ಮಂಡನೆ ಮಲ್ಪೆರೆ ಹಣಕಾಸು ಇಲಾಖೆನ್ ಕೇನ್ದ. ನೇಮಕಾತಿಲೆಗ್ ಮೂಲ ಸಿಂಡಿಕೇಟ್ ಅನುಮೋದನೆ ಆದೇಶೊನ್ಲಾ ಎಂಕುಲು ಕೇನ್ದ. ಈ ವಿಷಯೊದ ಬಗೆಟ್ ಜಡ್ತೆ ಮಲ್ಪೆರ ಪನ್ಪ” ಪನ್ದ್ ಆರ್ ಪನ್ತೆರ್.
ಲೆಕ್ಕಪರಿಶೋಧನೆರ್ದ್ ಬೊಕ್ಕ, ಸರ್ಕಾರ ಸಿಬ್ಬಂದಿಲೆನ್ ಕಮ್ಮಿ ಮಲ್ಪೆರೆ ವಿಶ್ವವಿದ್ಯಾಲಯೊಗು ಸೂಚನೆ ಕೊರ್ದಿತ್ತ್ಂಡ್. ಅಂಚಾದ್144 ಟೆಂಪರರಿ ಬೇಲೆದಕ್ಲೆನ್ ವಜಾ ಮಲ್ತ್ಂಡ್. ಕಾರ್ಯಾಚರಣೆಗ್ ಬೋಡಾಪುನ ಕಾಲಿ 230 ಕಾಂಟ್ರಾಕ್ಟ್ ಬೊಕ್ಕ ಟೆಂಪರರಿ ಸಿಬ್ಬಂದಿಲು ಮಾತ್ರ ಇತ್ತೆ ಉಲ್ಲೆರ್.