Last updated on July 15th, 2025 at 10:00 am
ಒಡಿಪು, ಜು. 15: ಕಾರ್ಲದ ಉಮಿಕಲ್ಲ್ ಗುಡ್ಡೆದ ಪರಶುರಾಮ ಥೀಂ ಪಾರ್ಕ್ಡ್ ಉಂತಾದಿನ ಪರುಶುರಾಮನ ಒರು ಚೆಂಬುದ ಅತ್ತ್, ಪಿತ್ತಾಲೆರ್ದ್ ಮಲ್ದಿನವು ಪನ್ದ್ ಇತ್ತೆ ತೆರಿದ್ ಬೈದಿತ್ತ್ದ್, ಪೊಲೀಸೆರ್ ಪತ್ತ ಜಡ್ತೆ ಮಲ್ತ್ದ್, ದೋಷಾರೋಪ ಪಟ್ಟಿನ್ ನ್ಯಾಯಂತಡೆಕ್ ಸಂದಾದೆರ್.
ಕಾರ್ಲದ ಉಮಿಕಲ್ಲ್ ಗುಡ್ಡೆಡ್ ನಿರ್ಮಾಣ ಮಲ್ದಿನ ಪರಶುರಾಮ ಥೀಂ ಪಾರ್ಕ್ ವಿವಾದೊಗು ಸಂಬಂಧಿತ್ದ್ ಪೊಲೀಸೆರ್ ಜಡ್ತೆ ಮಲ್ತ್ದ್ ನ್ಯಾಯಂತಡೆಗ್ ದೋಷಾರೋಪ ಪಟ್ಟಿ ಸಂದಾದೆರ್. ಈ ದೋಷಾರೋಪ ಪಟ್ಟಿಡ್ ಪರಶುರಾಮನ ಒರು “ಪಿತ್ತಾಲೆ”ಡ್ ಮಲ್ದಿನವು ಪನ್ದ್ ಉಲ್ಲೇಖ ಮಲ್ದೆರ್.
ಶಿಲ್ಪಿ ಕೃಷ್ಣನಾಯ್ಕೆ ಮೇರ್ ಚೆಂಬುಡು ಪರಶುರಾಮನ ಒರು ಮಲ್ಪಂದೆ, ಕಮ್ಮಿದ ಪಿತ್ತಾಲೆಡ್ ಮಲ್ದಿನ ತಜ್ಞೆರೆ ಪರಿಶೀಲನಾ ವರದಿಡ್ ಅಂಚೆನೇ ಜಡ್ತೆಡ್ ಸಾಬೀತಾತ್ಂಡ್ ಪನ್ದ್ ದೋಷಾರೋಪ ಪಟ್ಟಿಡ್ ಪನ್ತೆರ್. ಆರೋಪಿಲಾಯಿನ ಶಿಲ್ಪಿ ಕೃಷ್ಣ ನಾಯ್ಕೆ, ಒಡಿಪು ನಿರ್ಮಿತಿ ಕೇಂದ್ರದ ಯೋಜನಾ ನಿರ್ದೇಶಕೆ ಅರುಣ ಕುಮಾರ್ ಬೊಕ್ಕ ಎಂಜಿನಿಯರ್ ಸಚಿನ್ ವೈ. ಕುಮಾರ್ ಮೊಕುಲು ನಂಬಿಕೆ ದ್ರೋಹ ಬೊಕ್ಕ ದಗೆ ಮಲ್ತ್ದ್, ಸಾಕ್ಷಿ ನಾಶ ಮಲ್ದೆರ್ ಪನ್ದ್ಲಾ ಬರೆತೆರ್.
ಅರುಣ ಕುಮಾರ್ ಬೊಕ್ಕ ಸಚಿನ್ ವೈ. ಕುಮಾರ್ ಮೊಕುಲು ಕಾರ್ಯಾದೇಶೊದ ಕಂಡೀಷನ್ ಪಾಲನೆ ಮಲ್ದಿಜ್ಜಂಡ್. 2023ತ ಅಕ್ಟೋಬರ್ 12 ತಾನಿ ಒರುತ ಸೊಂಟರ್ದ್ ಮಿತ್ತ್ದ ಭಾಗೊನು ಉಮಿಕಲ್ಲ್ ಗುಡ್ಡೆರ್ದ್ ಕೊನೊದು ಅಲೆವೂರು ಗ್ರಾಮೊದ ಪ್ರಗತಿ ನಗರೊದ ನಿರ್ಮಿತಿ ಕೇಂದ್ರೊದ ಶೆಡ್ಡ್ 2024ತ ಫೆಬ್ರವರಿ 25 ಮುಟ್ಟ ದೀವೊಂದೆರ್. ಮೂರ್ತಿದ ಸೊಂಟರ್ದ್ ಮಿತ್ತ್ದ ಭಾಗೊನು ಶಿಲ್ಪಿ ಕೃಷ್ಣ ನಾಯ್ಕಗ್ ಕೊರ್ದಿತ್ತ್ದ್, ಕೃಷ್ಣ ನಾಯ್ಕೆ ಅವೆನ್ ಬೆಂಗಳೂರ್ಗ್ ಕಡಪುಡ್ದೆರ್ ಪನ್ದ್ ಕಲುಒಲವು ಕೊರ್ತೆರ್ ಪನ್ದ್ಲಾ ಬರೆತೆರ್.
2023ತ ಜನವರಿ 27 ತಾನಿ ಪರಶುರಾಮ ಥೀಂ ಪಾರ್ಕ್ನ್ ಅಪಗದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಲೋಕಾರ್ಪಣೆ ಮಲ್ತಿತ್ತೆರ್. ಅವೆರ್ದ್ ಬೊಕ್ಕ ಅಲ್ಪ ಉಂತಾದಿನ ಪರಶುರಾಮನ ಒರುನು ಫೈಬರ್ಡ್ ಮಲ್ದೆರ್, ಕಂಚಿದ ಒರು ಅತ್ತ್ ಪನ್ದ್ ಕಾಂಗ್ರೆಸ್ ನಾಯಕೆರ್ ಬೊಕ್ಕ ಸಾರ್ವಜನಿಕೆರ್ ಆರೋಪ ಮಲ್ತಿತ್ತೆರ್.
ಈ ಬಗೆಟ್ 2024 ತ ಜೂನ್ 21 ಕ್ ಕೃಷ್ಣ ಶೆಟ್ಟಿ ಪನ್ಪಿನಾರ್ ಕಾರ್ಲ ನಗರ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತೆರ್. ಒಯಿಲ್ಡ್ “ಕ್ರಿಶ್ ಆರ್ಟ್ ವರ್ಲ್ಡ್ ಸಂಸ್ಥೆ ಚೆಂಬುದ ಪರಶುರಾಮ್ ಮೂರ್ತಿನ್ ತಾಪನೆ ಮಲ್ಪೆರ ಒಡಿಪು ನಿರ್ಮಿತಿ ಕೇಂದ್ರೊರ್ದು ಕಾಸ್ ಗೆತೊಂದಿತ್ತ್ಂಡ್. ಆಂಡ, ಆರೋಪಿ ಶಿಲ್ಪಿ ಕೃಷ್ಣ ನಾಯ್ಕೆ ಚೆಂಬುದ ಮೂರ್ತಿ ಮಲ್ಪಂದೇ ಡೂಪ್ಲಿಕೇಟ್ ಪರಶುರಾಮ ಮೂರ್ತಿನ್ ಮಲ್ತ್ದ್ ಸರಕಾರೊಗು ದಗೆ ಮಲ್ತ್ದೆ ಪನ್ದ್ ಒಯಿಲ್ಡ್ ಆರೋಪ ಮಲ್ತಿತ್ತೆರ್.