Last updated on July 20th, 2025 at 12:49 pm
ಕುಡ್ಲ, ಜು. 20: ಡ್ರೈವರ್ನ ಅಂಕೆ ತತ್ತ್ದ್ ಕೆಎಸ್ಆರ್ಟಿಸಿ NURM ನಗರ ಬಸ್ ಶನಿವಾರ ಬಯ್ಯಡ್ ದೇರೆಬೈಲ್ ಮುಟ್ಟದ ಲ್ಯಾಂಡ್ಲಿಂಕ್ಸ್ ಟೌನ್ಶಿಪ್ಡ್ ಇಪ್ಪುನ ಒಂಜಿ ಇಲ್ಲದ ಪಾಗಾರ ಬೊಕ್ಕ ಮೊಟ್ಟುಗು ಎಡ್ತ್ದ್ಂಡ್. ದೇಬೆರೆ ದಯೆಟ್, ಒವ್ವೇ ಪಡಾಯಿ ಆತಿಜಿ.
ಶನಿವಾರ ಬಯ್ಯ 4:30 ತ ಅಂದಾಜಿಗ್ ಈ ನಡಕೆ ನಡತ್ದ್ಂಡ್. ಲ್ಯಾಂಡ್ಲಿಂಕ್ಸ್-ಬಜಾಲ್ಪಡ್ಪು ಸಾದಿಯೆ ಪೋಪುನ NURM ಬಸ್, ತನ್ನ ಅಕೇರಿದ ಉಂತಡೆಡ್ ಪ್ರಯಾಣಿಕೆರೆನ್ ಜಪುಡಾದ್ ಪಿರ ತಿರ್ಗೊಂದಿತ್ತ್ಂಡ್. ಈ ಪೊರ್ತುಡು ಡ್ರೈವರ್ನ ಅಂಕೆ ತತ್ತ್ದ್, ಬಸ್ ಅಲ್ಪದ ಒಂಜಿ ಇಲ್ಲದ ಕಾಂಪೌಂಡ್ ಪುಡತ್ದ್ ಟೆರೇಸ್ಗ್ ಪೋಪುನ ಮೊಟ್ಟುಲೆಗ್ ಎಡ್ತ್ದ್ಂಡ್.
ಎಡ್ತೆದ ಬರಸ್ಗ್ ಬಸ್ದ ಎದುರು ಮೆಯಿ ಞಕ್ಕೆ ಆತ್ಂಡ್, ಇಲ್ಲದ ಪಾಗಾರ ಬೊಕ್ಕ ಮೊಟ್ಟುಲಾ ಪೊಡಿ ಆತ್ಂಡ್. ನಡಕೆ ನಡತಿನ ಪೊರ್ತುಡು ಇಲ್ಲದಕುಲು ಬೇತೆ ಕಡೆಟ್ ಇತ್ತಿನೆರ್ದಾವರ ಇಲ್ಲ್ ಕಾಲಿ ಇತ್ತ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ನಡಕೆ ನಡತಿನ ಪೊರ್ತುಡು ಬಸ್ಡ್ ಡ್ರೈವರ್ ಬೊಕ್ಕ ಕಂಡಕ್ಟರ್ ಸೇರ್ದ್ ಕೆಲವೇ ಕೆಲವು ಜನ ಪ್ರಯಾಣಿಕೆರ್ ಇತ್ತೆರ್. ಪ್ರಯಾಣಿಕೆರೆಗ್ ಒವ್ವೇ ಗಡಿಕುಲಾತಿಜ ಪನ್ದ್ ತೆರಿದ್ ಬೈದ್ಂಡ್. ಪ್ರಕರಣೊನು ರಾಜಿಡ್ ದೆತ್ತ್ದಿತ್ತ್ದ್, ಒವ್ವೇ ಪೊಲೀಸ್ ಪ್ರಕರಣ ದಾಕಲಾತಿಜಿ ಪನ್ದ್ ಅಧಿಕಾರಿಲು ತೆರಿಪಾದೆರ್.