Last updated on July 24th, 2025 at 09:02 am
ಉಬಾರ್, ಜು. 24: ರಾಜಹಂಸ ಬಸ್ದ ಡ್ರೈವರ್ ಹಾರ್ನ್ ಪಾಡ್ಯೆ ಪನ್ಪಿ ನೆವನೊಡು, ಬೈಕ್ಡ್ ಬತ್ತಿನ ಇರ್ವೆರ್ ಬೈಕ್ನ್ ಬಸ್ಗ್ ಅಡ್ಡ ದೀದ್, ಬಸ್ ಡ್ರೈವರ್ಗ್ ಆಕ್ದ್ ಅವೆನ್ ಪ್ರಶ್ನೆ ಮಲ್ತಿನ ಒರಿ ಪ್ರಯಾಣಿಕಗ್ಲಾ ಹೆಲ್ಮೆಟ್ಡ್ ಆಕ್ದಿನ ನಡಕೆ ಕೋಡೆ, ಬುದಾರದಾನಿ ಉಬಾರ್ಡ್ ನಡತ್ದ್ಂಡ್.
ಬೆಂಗಳೂರ್ರ್ದ್ ಕುಡ್ಲಗ್ ಬರೊಂದಿತ್ತಿನ ಕೆ.ಎಸ್.ಆರ್.ಟಿ.ಸಿ ದ ರಾಜಹಂಸ ಬಸ್ದ ಡ್ರೈವರ್ ರಿಯಾಜ್ ಅಹಮ್ಮದ್ ಪನ್ಪಿನಾರ್, ಬಸ್ಸ್ಗ್ ಅಡ್ಡಡ್ಡ ಪೋವೊಂದಿತ್ತಿನ ಬೈಕ್ಗ್ ಸಾದಿ ಬುಡ್ದು ಕೊರ್ಯೆರ ಹಾರ್ನ್ ಪಾಡ್ದೆರ್.
ಉಂದೆರ್ದ್ ಪಿತ್ತ್ ಗೆಜಲಿನ ಬೈಕ್ಡ್ ಇತ್ತಿನ ಇರ್ವೆರ್ ಬಸ್ಸ್ನ್ ಅಡ್ಡಕಟ್ಟ್ದ್ ಬಸ್ ಡ್ರೈವರ್ ಗ್ ಆಕ್ದೆರ್. ಉಂದೆನ್ ಪ್ರಶ್ನೆ ಮಲ್ತ್ದ್, ಆಕುನೆನ್ ತಪ್ಪಾಯೆರೆ ಬತ್ತಿನ ಬಸ್ಸ್ದ ಪ್ರಯಾಣಿಕೆ ಅವಿನಾಶ್ ಪನ್ಪಿನಾರೆಗ್ಲಾ ಬೈಕ್ಡ್ ಇತ್ತಿನಕುಲು ಹೆಲ್ಮೆಟ್ಡ್ ಆಕ್ದೆರ್. ಅವಿನಾಶ್ರೆನ ತರೆಕ್ ಗಾತಿದ ಪೆಟ್ಟಾತ್ಂಡ್ ಪನ್ದ್ ತೆರಿದ್ ಬೈದ್ಂಡ್. ಈ ಬಗೆಟ್ ಬಸ್ ಡ್ರೈವರ್, ಬೈಕ್ದ ನಂಬರ್ ತೂದು ಪೊಲೀಸೆರೆಡ ಒಯಿಲ್ ಬರೆಪಾದೆರ್.
ಬಯ್ಯಡ್ 3:30 ತ ಅಂದಾಜಿಗ್ ನಡತಿನ ಈ ನಡಕೆದ ಬಗೆಟ್ ಒಯಿಲ್ ಗೆತೊಂಡಿನ ಉಬಾರ್ ಪೊಲೀಸ್ ಸ್ಟೇಶನ್ ಪೊಲೀಸ್ ಉಪ ನಿರೀಕ್ಷಕೆ ಗುರುನಾಥ್ ಹಾದಿಮನಿ, ರಪಕ್ಕ ಕಾರ್ಯಾಚರಣೆ ಮಲ್ತ್ದ್ ಒಂಜಿ ಗಂಟೆದುಲಯಿ ಇರ್ವೆರ್ ಆರೋಪಿಲೆನ್ಲಾ ಪತ್ತ್ದೆರ್. ಕೈದಾತಿನ ಆರೋಪಿಲೆನ್ ಉಬಾರ್ ಗ್ರಾಮೊದ ಮಠ ನಿವಾಸಿ ಇಬ್ರಾಹಿಂ ಬ್ಯಾರಿ ಪನ್ಪಿನಾರೆನ ಮಗೆ ಜುನೈದ್ (24) ಬೊಕ್ಕ ಅಬ್ದುಲ್ ಲತೀಫ್ ಪನ್ಪಿನಾರೆನ ಮಗೆ ಹಿಷಾಮ್ (18) ಪನ್ದ್ ಗುರ್ತ ಪತ್ತ್ದೆರ್.
ಕೈದಾತಿನಕಲೆನ ಮಿತ್ತ್ ಸರಕಾರಿ ಬೇಲೆಗ್ ತಲೆಪು ಬೊಕ್ಕ ಸಾರ್ವಜನಿಕ ಶಾಂತಿ ಭಂಗ ಆರೋಪಡ್ ಪ್ರಕರಣ ದಾಕಲ್ತೊಂದೆರ್.