Last updated on August 5th, 2025 at 02:52 pm
ಬೆಂಗಳೂರು, ಆ. 04:ರಾಜಬೂಡು ಬೆಂಗಳೂರುಡು ಜೈ ತುಲುನಾಡ್ (ರಿ.) ಬೆಂಗಳೂರು ಎಗ್ಗೆದ ಮುತಾಲಿಕೆಡ್ ಭೀಮಾ ಜ್ಯುವೆಲ್ಲರ್ಸ್ ಪ್ರಾಯೋಜಕತ್ವಡ್ ಕೋಡೆ, 03-08-2024ನೇ ಐತಾರ, ಬೆಂಗಳೂರುದ ಬಿಳೇಕಹಳ್ಳಿದ ಮುಲ್ಕಿ ಸುಂದರ್ ರಾಮ್ ಶೆಟ್ಟಿ ನಗರೊದ ಮುಲ್ಕಿ ಸುಂದರ್ ರಾಮ್ ಶೆಟ್ಟಿ (MSRS) ಸಭಾಂಗಣೊಡು ಅಂಚೆನೇ ಅವೆತ ಆವರೊಣೊಡು ಸುಮಾರ್ ಪತ್ತ್ ಸಾರೊರ್ದು ಎಚ್ಚ ಜನ ಸೇರುನ ಮುಕೇನ ಬಾರೀ ಗರ್ದ್ಡ್ ನಡತ್ಂಡ್.
ಸ್ಥಳೀಯ ಶಾಸಕೆರಾಯಿನ ಸತೀಶ್ ರೆಡ್ಡಿ ಮೇರ್ ಅಯ್ಯಪ್ಪ ಸ್ವಾಮಿ ದೇಲಂತಡೆರ್ದ್ ಸುರು ಆಯಿನ ತುಳು ದಿಬ್ಬಣಡ್ ಸೇರೊಂದು ದೇಬೆರೆನ್ ಸುಗಿತ್ದ್ ಲೇಸ್ಡ್ ಪಾಲ್ ಪಡೆಯೆರ್.
ಚೆಂಡೆ ವಾದನೊದ ಒಟ್ಟುಗು ಪೊಂಜೊವುನಕುಲು ಕಳಸ ಪತೊಂದು ತುಳುವಪ್ಪೆನ ಒರುನು ಪೂ ಸಿಂಗಾರೊದ ಐತೊಡು ಅಯ್ಯಪ್ಪ ಸ್ವಾಮಿ ದೇಲಂತಡೆರ್ದ್ ಸಭಾಂಗಣ ಮುಟ್ಟ ಮೆರವಣಿಗೆಡ್ ಲೆತೊಂದು ಬತ್ತ್ದ್ ಶಾಸಕೆರ್, ಮುಲ್ಕಿ ಸುಂದರ್ ರಾಮ್ ಶೆಟ್ಟಿ ಲೇಔಟ್ದ ಪ್ರಮುಖೆರ್ ರಮಾಕಾಂತ್ ಶೆಟ್ಟಿ, ಕರ್ನಲ್ ಎ.ಜೆ ಭಂಡಾರಿ, ಶಂಕರ್ ಶೆಟ್ಟಿ, ಪ್ರಮೋದ್ ಶೆಟ್ಟಿ, ಉದ್ಯಮಿ ತೇಜಸ್ ಸುಧಾಕರ್, ವೀರೇಂದ್ರ ಶೆಟ್ಟಿ, ಜೈ ತುಲುನಾಡ್ ಕೂಟದ ಪ್ರಮುಖೆರ್ ಚಾವಡಿಡ್ ತುಲುವಪ್ಪೆನ ಒರುಕು ಪೂ ಅರ್ಚನೆ ಮಲ್ಪುನ ಮುಕೇನ ಲೇಸ್ದ ಉದಿಪನ ಮಲ್ತೆರ್.
ತುಲುವ ನೇಸರೆ ಎಸ್. ಆರ್. ಬಂಡಿಮಾರ್ ಚಾವಡಿಡ್ ವಾಲಗ ಆತಿನ ಮಾತೆರೆನ್ಲಾ ಪೂಜಾ ಬಂಗೇರ ಮೇರ್ ಮೋಕೆಡ್ ಎದ್ಕೊಂಡೆರ್. ಜೈ ತುಲುನಾಡ್ ಸಂಘಟನೆ ಬುಲೆದ್ ಬತ್ತಿನ ಸಾದಿನ್ ವಿಡಿಯೋ ಮುಕೇನ ಬತ್ತಿನ ಮಾತೆರೆಗ್ಲಾ ತೋಜಾಯೆರ್. ಬೊಕ್ಕ ಪಾತೆರ್ನ ಶಾಸಕೆ ಸತೀಶ್ ರೆಡ್ಡಿ ತುಳುವೆರ್ ದೇಶ, ಸಮಾಜೊನು ಅರ್ಥ ಮಲ್ತೊಂದಿನಕುಲು, ತುಲುನಾಡ ಆಟಿ ಲೇಸ್ಡ್ ಪಾಲ್ ಪಡೆಪುನ ಬಾರೀ ಕುಸಿ ಆಂಡ್ ಪನ್ದ್ ಪನ್ಡೆರ್. ಎ.ಜೆ ಭಂಡಾರ್ಲು ಪೊರ್ಲುದ ರಡ್ಡ್ ಪಾತೆರ ಪಾತೆರ್ಯೆರ್. ಜೈ ತುಲುನಾಡ್ ಸಂಘಟನೆದ ಗುರ್ಕಾರ್ಲು ಉದಯ ಪೂಂಜಾ ಪಾತೆರ್ದ್ ಸಂಘಟನೆರ್ದ್ ಮಲ್ದಿನ ಬೇಲೆಲೆನ ಬಗೆಟ್ ಪನೊಂದು ಜನಗಣತಿದ ಪೊರ್ತುಡು ಅಪ್ಪೆಬಾಸೆ ತುಳು ಪನ್ದೇ ಪಾಡ್ಲೆ ಪನ್ದ್ ಬತ್ತಿನಕ್ಲೆಡ ಬಿನ್ನಪು ಮಲ್ತೆರ್. ಜೈ ತುಲುನಾಡ್ ರಿ. ಬೆಂಗಳೂರು ಎಗ್ಗೆದ ಗುರ್ಕಾರ್ಲು ನಿಧೀಶ್ ಶೆಟ್ಟಿ ಟೈಮ್ಸ್ ಆಫ್ ಕುಡ್ಲ ತಾಪಕೆರಾಯಿನ ಶಶಿ ಬಂಡಿಮಾರ್ ಮೆರೆನ್ ನೆನೆತೊಂದು ಪಾತೆರ್ದ್ ರಾಜಕೀಯ ಇಚ್ಛಾಶಕ್ತಿ ಒಟ್ಟುಗು ಇತ್ತ್ಂಡ ಆಯಿನಾತ್ ಬೇಗ ತುಳು ಭಾಷೆಗ್ ಮಾನಾದಿಗೆ ತಿಕ್ಕುಂಡು ಪನ್ದ್ ಪನ್ಡೆರ್. ಕಾವ್ಯ ಆಚಾರ್ಯ ಸುಗಿಪುದ ಪದ ಪನ್ಡೆರ್. ಉದಿಪನದ ಲೇಸ್ದ ಅಕೇರಿಗ್ ಸುಧೀರ್ ದೇವಾಡಿಗೆರ್ ಸೊಲ್ಮೆ ಸಂದಾಯೆರ್.
ಅವೆರ್ದ್ ಬೊಕ್ಕ ಅಯ್ಯಪ್ಪ ಭಜನಾ ಮಂಡಳಿ ಬಿಳೇಕಹಳ್ಳಿ ಬೊಕ್ಕ ಯಕ್ಷ ಸ್ಪಂದನ ಕರಾವಳಿ ಮಿತ್ರ ಕೂಟ, ಕುಮಾರಸ್ವಾಮಿ ಲೇಔಟ್ ಮೊಕಲು ತುಲು ಭಜನೆನ್ ಭಕ್ತಿ ಶ್ರದ್ಧೆಡ್ ನಡಪಾದ್ ಕೊರಿಯೆರ್. ಕರಾವಳಿ ಒಕ್ಕೂಟ ಜೆಪಿ ನಗರೊದ ಕೂಟೊರ್ದು ಯೋಗಾಸನ ಪ್ರದರ್ಶನ ನಡತ್ಂಡ್. ಪಂಚಮಿ ಮಾರೂರ್ ಮೆರೆನ ಗುರ್ಕಾರ್ಮೆದ ಶ್ರೀ ಪರಂಪರಾ ಹೆಜ್ಜೆಗೆಜ್ಜೆ ವೈಪಿ ಆರ್ಟ್ ಫೌಂಡೇಷನ್ ದಕುಲು ಭರತನಾಟ್ಯ ನಡಪಾದ್ ಕೊರ್ಯೆರ್. ವಿದುಷಿ ಚೈತ್ರಾ ಎಚ್ ಎನ್ ಮೆರೆನ ರುಕ್ಮಿಣಿ ನೃತ್ಯಶಾಲೆದ ಜೋಕುಲು, ಯಶಸ್ವಿ ಡಾನ್ಸ್ ಗ್ರೂಪ್ ಕುಡ್ಲ, ತೃಪ್ತಿ, ಅದಿತಿ ಡಿ ಆಚಾರ್ಯ, ಕೃತಿಕಾ ಎಚ್, ಆದ್ಯಾ ಎಸ್, ಆದ್ಯಾ ರೈ, ಶ್ರೇಯಾ ಎಲ್ ಪುತ್ರನ್, ಮೇಘಶ್ರೀ, ಪೂರ್ವಿ, ಅನಘಾ, ಅನುಷಾ, ರಶ್ಮಿ ಬೊಕ್ಕ ಕೂಟದಕುಲು, ಪ್ರಜ್ಞಾ ಭಂಡಾರಿ, ದಿವ್ಯಶ್ರೀ, ವಿಮಲ ಮೊಕುಲು ತುಳುನಾಡ ಸಂಸ್ಕೃತಿದ ಪೊಲಬು ಕೊರ್ಪುನ ನಲಿಕೆ ತೂಪಾಯೆರ್.
ಪಾಣಾರ ಯಾನೇ ನಲಿಕೆ ಸಮಾಜದ ಜಿಲ್ಲಾಧ್ಯಕ್ಷೆರ್ ಜನಾರ್ದನ್ ಬುಡೋಳಿ ಮೇರ್ ತುಳುನಾಡ ದೈವಾರಾಧನೆದ ಬಗೆಟ್ ಪೊಲಬು ಕೊರ್ಯೆರ್. ಗುರುರಾವ್ ಮೇರ್ ಪದರಂಗಿತ ನಡಪಾದ್ ಕೊರ್ಯೆರ್.
ರಾಜಶ್ರೀ ಕುಡ್ಲ ಮೊಕ್ಲೆನ ಕುಸಲ್ದ ಎಸಲ್ ಬತ್ತಿನಕ್ಲೆನ್ ಬಂಜಾರ ತೆಲಿಪಾಂಡ್. ಶ್ರೀಮತಿ ಅರ್ಪಿತಾ ಪ್ರಶಾಂತ್ ಶೆಟ್ಟಿ ಕಟಪಾಡಿ ಆಟಿದ ಬಗೆಟ್ ಪೊಲಬು ಪಟ್ಯೆರ್. ಪ್ರಶಾಂತ್ ಪಾವಂಜೆ ಪೊರ್ಲುದ ತುಳು ಪದ ಪನ್ಡೆರ್. ತುಳುನಾಡ ರ್ಯಾಪರ್ ಹರ್ಷಿತ್ ತುಳು ರ್ಯಾಪ್ ಪದ ಪನ್ಡೆರ್.
ಸಭಾಂಗಣೊದ ಪಿದಯಿ ಬತ್ತಿನ ಮಾತಾ ಜೋಕುಲು, ಜವನೆರ್, ಪ್ರಾಯೊದಕುಲೆಗ್ ಪಾಕ ಗೊಬ್ಬುಲೆನ ಅಟ್ಟನೆ ಆದಿತ್ತ್ಂಡ್. ಜೋಕುಲೆಗ್ ವಿಷತ ಪರ್ನ್ದ್, ಕಪ್ಪೆ ಬಲಿಪು, ಬಾಲ್ ಬಕೆಟ್, ಚಿತ್ರ ತೂದು ತುಳುಟು ಪನ್ಪುನು, ಮಸ್ತಿರೆ ಬ್ಯಾಲೆನ್ಸ್, ಸಂಗೀತ ಕುರ್ಚಿ, ಲಿಂಬೆಚಮ್ಚದ ಬಲಿಪು, ತುಳುಟು ಪುದರ್ ಬರೆಪುನ ಪಂತೊಲು ಇತ್ತ. ಆಂಜೊವು ಪೊಂಜೊವುನಕ್ಲೆಗ್ ಮೂಜಿ ಕಾರ್ಡ್ ಬಲಿಪುನು, ಗೋಣಿ ಚೀರಾವುಡು ಬಲಿಪುನು, ತುಳುಟು ಪುದರ್ ಬರೆಪುನ, ಕಾಸ್ರೋಡ್-ಬೀಸ್ರೋಡ್, ಬಲ್ಲ್ ಒಯ್ಪುನ, ಲಿಂಬೆಚಮ್ಚದ ಬಲಿಪು, ತುಳು ಲಿಪಿ ಬರೆಪುನು, ಸಂಗೀತ ಕುರ್ಚಿ, ರಸ ಪ್ರಶ್ನೆಲು ಇಂಚಿನ ಪಂತೊಲು ಇತ್ತ. ಜೋಡಿ ಪಕ್ಕಿಲೆಗ್ ಬೆರಿಟ್ ಪುಗ್ಗ, ಮೋಕೆದ ತುತ್ತು, ಊರು ನಾಡ್ಲೆ, ಅದಲ್-ಬದಲ್ ಗೊಬ್ಬುಲೆನ ಅಟ್ಟನೆ ಆದಿತ್ತ್ಂಡ್.
ಮದ್ಯಾನದ ಆಟಿದ ವನಸ್ಡ್ ಉರ್ಪೆಲ್ ನುಪ್ಪು, ಗಂಜಿ ಪಾಯ್ಸ, ಮುಡಿ ಕುಕ್ಕುದ ಉಪ್ಪಡ್, ಕುಡುತ ಚಟ್ನಿ, ಲತ್ತಂಡೆ ಪಲ್ಯ, ಉಪ್ಪಡ್ ಪಚ್ಚೀರ್ ಸೇಟ್ಲೆ, ತೆಕ್ಕರೃದ ತಲ್ಲಿ, ಗುಜ್ಜೆ ಬದನೆ ಕೊದ್ದೆಲ್, ತಿಮರೆದ ಚಟ್ನಿ, ಪತ್ರೊಡೆ, ನೀರ್ತೆಲ್ಲಾವು, ಮಣ್ಣಿ, ಮುಂಚಿ ಇಂಚ ಕೊಡೆಕ್ಕೆನೆ ತೆನಸ್ ಇತ್ತ್ಂಡ್.
ಬಯ್ಯಡ್ ನಡತಿನ ಮುಗಿತಲ ಲೇಸ್ದ ಸುರುಟು ಜೈ ತುಲುನಾಡ್ (ರಿ.) ಬೆಂಗಳೂರು ಎಗ್ಗೆದ ಕಾರ್ಯಂತೆರ್ ವಿನಯ್ ಮಣಿಯನ ಮೇರ್ ಪ್ರಾಸ್ತಾವಿಕ ಭಾಷಣ ಮಲ್ತೆರ್. ಶೀರೂರು ಮಠೊಂತ ದಿವಾನೆರ್ ಶ್ರೀ ಉದಯ ಸರಳತ್ತಾಯೆರ್ ಪಾತೆರ್ದ್ ಸಂತೆರೆಗ್ ಚಾತುರ್ಮಾಸ್ಯ ಇತ್ತಿಲೆಕ ಬೆನ್ನಿದಕ್ಲೆಗ್ ಆಟಿ, ತುಳುವೆರೆನಾತ್ ಭಾಷಾಭಿಮಾನ ಏರೆಗ್ಲಾ ಇಜ್ಜಿ ಪನ್ದ್ ಪನ್ಡೆರ್. ನವೀನ್ ಭಂಡಾರ್ಲು ಪಾತೆರ್ದ್ ಎಂಕ್ಲು ಎಲ್ಯೆ ಇಪ್ಪುನಗ ಆಟಿ ಬಾರೀ ಬಂಙೊದ ಕಾಲ, ಇತ್ತೆದ ಜೋಕುಲೆಗ್ ಆ ಬಂಙೊದ ಅಂದಾಜಿ ಆವಂದ್, ಬೆಂಗಳೂರುಡು ಈತ್ ಜನ ತುಳುವೆರ್ ಸೇರ್ದಿನೆನ್ ತೂಯೆರ ಕುಸಿ ಆಪುಂಡು ಪನ್ದ್ ಪನ್ಡೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆ ಆಕಾಶ್ರಾಜ್ ಜೈನ್ ಪಾತೆರ್ದ್ ಮುಲ್ಪ ತುಳು ಲೇಸ್ಗ್ ಸೇರುನಾತ್ ಜನ ಊರುಡು ತುಳುತ ಲೇಸ್ ಆನಗ ಸೇರುಜೆರ್, ಊರುಡು ಈತ್ ಜನ ಸೇರ್ಯೆರ್ನ್ಡ ನಮ್ಮ ರಾಜಕಾರಣಿಲೆಗ್ ಎಡ್ಡೆ ಸಂದೇಶ ಪೋಪುಂಡು, ತುಳುನಾಡ್ದ ಇತಿಹಾಸ, ತುಳು ಭಾಷೆದ ಇತಿಹಾಸದ ಬಗೆಟ್ ಸದನೊಡು ಚರ್ಚೆ ಆವೊಡು, ಕಾಸ್ರೋಡ್ಡ್ ಕನ್ನಡೊನು ಒರಿಪಾದಿನಿ ತುಳುವೆರ್, ಪಿದಯಿ ದೇಶೊಡು ಕನ್ನಡ ಸಂಘಟನೆ ಕಟ್ಟಿನಿ ತುಳುವೆರ್, ಬೇಗೊಡು ತುಳು ರಾಜ್ಯೊದ ಎಚ್ಚಿಗೆದ ಅಧಿಕೃತ ಭಾಷೆ ಆವಡ್, ತುಳು ಲಿಪಿ ಮೊಬೈಲ್ಡ್ ಟೈಪ್ ಮಲ್ಪುಲೆಕ ಆವಡ್ ಪನ್ದ್ ಪನ್ಡೆರ್. ಬೊಲ್ತೇರ್ದ ಧಾರ್ಮಿಕ ಮುಖಂಡೆರ್ ಶ್ರೀ ಕಿರಣ್ ಚಂದ್ರ ಡಿ ಪುಷ್ಪಗಿರಿ ಮೇರ್ ಪಾತೆರ್ದ್ ಭಾಷೆ ಒರಿಂಡ ಮಾತ್ರ ಸಂಸ್ಕೃತಿ ಒರಿಪುಂಡು, ಜಾತಿ, ಧರ್ಮ, ಮತ ಬೇಧ ಬುಡ್ದು ಮಾತಾ ಒಟ್ಟಾವೊಡು, ಪ್ರಕೃತಿಡ್ ದೇವೆರೆನ್ ತೂತಿನಕುಲು ತುಳುವೆರ್ ಪನ್ದ್ ಪನ್ಡೆರ್. ಜಯಕರ್ನಾಟಕ ಜನಪರವೇದಿಕೆದ ಒತ್ತುಗುರ್ಕಾರ್ಲು ಉದಯ್ ಶೆಟ್ಟಿ ಪಾತೆರ್ದ್ ಪಿದಯಿ ಊರುಡು ತುಳು ಕೇನ್ನಗ ನಮ್ಮಕುಲು ಪನ್ಪಿ ಭಾವನೆ ಬರ್ಪುಂಡು, ತುಳು ಭಾಷೆಗ್ ಮಲ್ಪುನ ಪೊರ್ಮ್ಬಾಟ ಉಂತೆರೆ ಬಲ್ಲಿ ಪನ್ದ್ ಪನ್ಡೆರ್. ಶ್ರೀಕ್ಷೇತ್ರ ಮುಳ್ಳುಗುಡ್ಡೆದ ಧರ್ಮದರ್ಶಿಲು ಪುನೀತ್ ಶೆಟ್ಟಿ ಪಾತೆರ್ದ್ ಒವ್ವೇ ವಿಚಾರೊನು ವಿಮರ್ಶೆ ಮಲ್ಪಂದೆ ಪಾತೆರ್ರೆ ಬಲ್ಲಿ, ನಮ ನಮ್ಮ ಊರುದಕ್ಲೆಡ ತುಳುಟೇ ಪಾತೆರೊಡು ಪನ್ದ್ ಪನ್ಡೆರ್.
ಬಿಗ್ ಬಾಸ್ ಪುಗರ್ತೆದ ಶೈನ್ ಶೆಟ್ಟಿ ಪಾತೆರ್ದ್ ಎನ್ನ ಅಪ್ಪೆ ಭಾಷೆ ಕನ್ನಡ ಆದುಪ್ಪು ಆಂಡ ಎನ್ನ ವ್ಯಾವಹಾರಿಕ ಭಾಷೆ ತುಳು, ಯಾನ್ ಇನಿ ಓಲು ಉಲ್ಲೆನಾ ಅಲ್ಪ ಇಪ್ಪೆರ ಕಾರಣ ತುಳುವೆರ್ ಪನ್ದ್ ಪನ್ಡೆರ್. ಶಂಕರ್ ಎಲೆಕ್ಟ್ರಿಕಲ್ಸ್ದ ರಾಜೇಶ್ ಶೆಟ್ಟಿ ಪಾತೆರ್ದ್ ನಮ ಓಲೇ ಇಪ್ಪಡ್ ನಮ್ಮ ಇಲ್ಲಡ್ ತುಳು ಪಾತೆರುನ ಸಂಕಲ್ಪ ಮಲ್ಪೊಡು, ಕಟೀಲ್ದಪ್ಪೆ ಉಲ್ಲಾಲ್ದಿನೆರ್ದಾವರ ಎನ್ನ ಕೈರ್ದ್ ಮಲ್ಲ ಮಲ್ಲ ಬೇಲೆಲು ಆಪಿಲೆಕ ಆಂಡ್, ಎನ್ನ ಕಂಪೆನಿಗ್ ತುಳುನಾಡ್ದ ಜವನೆರ್ ಬರ್ಪೆರ್ನ್ಡ ಅಕ್ಲೆಗ್ ಇಂಟರ್ವ್ಯೂ ಬೈಪಾಸ್ ಮಲ್ಪುನ ವ್ಯವಸ್ಥೆ ಮಲ್ಪುನ ಪನ್ದ್ ಪನ್ಡೆರ್. ಈ ಪೊರ್ತುಡು ಮಿತ್ತರ್ಮೆಡ್ ಉದ್ಯಮಿ ಗಣೇಶ್ ರಾವ್, ಅಮರನಾಥ್, ಸಾಯಿರಾಮ್ ಹಾಸ್ಪಿಟಲ್ದ ಅರವಿಂದ್, ಫರ್ನ್ ಕೌಚ್ದ ಮ್ಯಾನೇಜಿಂಗ್ ಡೈರೆಕ್ಟರ್ ಬೃಜೇಶ್ ಉಳ್ಳಾಲ್, ಪ್ರಭಾಕರ್ ಶೆಟ್ಟಿ, ಕೆನರಾ ಗ್ರೂಪ್ದ ಉತ್ತಮ್ ಶೆಟ್ಟಿ, ಜಯಕರ್ನಾಟಕದ ಕಿರಣ್, ನಳಿನಿ, ಜಯಕರ್ನಾಟಕ ಜನಪರ ವೇದಿಕೆದ ಸಂಸ್ಥಾಪನಾಧ್ಯಕ್ಷೆರ್ ಗುಣರಂಜನ್ ಶೆಟ್ಟಿ, ಬಂಟೆರೆ ಸಂಘೊದ ಗುರ್ಕಾರೆ ಅಶೋಕ್ ಶೆಟ್ಟಿ, ಎ. ಜೆ. ಭಂಡಾರ್ಲು, ನವೀನ್ ಭಂಡಾರ್ಲು, ತಮ್ಮಣ್ಣ ಶೆಟ್ಟಿ ಇಂಚ ಪಾಕ ಜನ ತುಳುಪರ ಬೆನ್ನಿ ಬೆನ್ಪುನ, ಬೇತೆ ಕ್ಷೇತ್ರೊಲೆಡ್ ಬೆನೊಂದುಪ್ಪುನ ತುಳುವ ನಾಯಕೆರ್ ಒತ್ತುಪಾಲಿತ್ತೆರ್.
ಈ ಪೊರ್ತುಡು ಜೈ ತುಲುನಾಡ್ ಬೆಂಗಳೂರು ಎಗ್ಗೆದ ಮಾಜಿ ಗುರ್ಕಾರ್ಲು ಧನಂಜಯ ಆಚಾರ್ಯ, ಸತೀಶ್ ಅಗ್ಪಲ, ಸುಧೀರ್ ಶೆಟ್ಟಿ ಬೊಕ್ಕ ಸುಕೇಶ್ ಅಮೀನ್ ಮೊಕಲೆಗ್ ಚಾವಡಿದ ಮಾನಾದಿಗೆ ಮಲ್ತೆರ್. ಒಟ್ಟುಗು ನಡತಿನ ಬೇತೆ ಬೇತೆ ಪಂತೊಲೆಡ್ ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್.
ಬತ್ತಿನ ಬಿನ್ನೆರೆನ್ ಅಕ್ಷಯ್ ಆಚಾರ್ಯ ಎದುಕೊಂಡೆರ್. ದಿಯಾ ಬೋಳಾರ್ ಸುಗಿಪುದ ಪದ ಪನ್ಡೆರ್, ಜೈ ತುಲುನಾಡ್ ಬೆಂಗಳೂರು ಎಗ್ಗೆದ ಗುರ್ಕಾರ್ಲು ನಿಧೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್.
ಅಕೇರಿಡ್ ಯಕ್ಷತರಂಗ ಬೆಂಗಳೂರು (ರಿ.) ಮುಲ್ಪದ ಜೋಕುಲೆರ್ದ್ ಕುಶಲವೆರೆ ಕಾಳಗೊ ಪನ್ಪಿ ತುಳು ಯಕ್ಷಗಾನ ಪ್ರದರ್ಶನ ನಡತ್ಂಡ್.
ಸತೀಶ್ ಹೊಸ್ಮಾರ್, ಸ್ವಸ್ತಿಕಾ ಶೆಟ್ಟಿ, ಅವಿನಾಶ್ ಕಡೇಶಿವಾಲಯ, ಬನಶ್ರೀ ಅವಿನಾಶ್, ಜಿತೇಶ್ ಲೇಸ್ ಸುದಾರ್ಮೆ ಮಲ್ತೆರ್.