Last updated on August 11th, 2025 at 12:06 pm
ಬೆಂಗಳೂರು, ಆ. 11: ಇನಿರ್ದ್ ಪದಿನಾಜನೇ ವಿಧಾನಮಂಡಲೊದ ಏಳನೇ ಅಧಿವೇಶನ ಸುರು ಆವೊಂದುಂಡು. ಸರ್ಕಾರ ಬೊಕ್ಕ ವಿಪಕ್ಷೊಲೆನ ನಡುಟು ಮಲ್ಲ ಕೊಲಲೊಗು ಈ ಅಧಿವೇಶನ ಮಿತ್ತರ್ಮೆ ಆಪಿನ ಸಾಧ್ಯತೆ ಉಂಡು.
ಇನಿರ್ದ್ ಆಗಸ್ಟ್ 22 ಮುಟ್ಟ ಅಧಿವೇಶನ ನಡಪರೆಗುಂಡು. ಸರ್ಕಾರೊನು ಕಟ್ಟ್ದ್ ಪಾಡ್ಯೆರ ವಿಪಕ್ಷೊಲು ಅಟ್ಟನೆ ಮಲ್ತೊಂದ.
ಐತಾರ ಬಿಜೆಪಿ-ಜೆಡಿಎಸ್ ಪ್ರಮುಖ ನಾಯಕೆರ್ ಸದನೊಡು ಪೊರ್ಮ್ಬಾಟೊದ ಬಗೆಟ್ ಚರ್ಚೆ ವಿಷಯೊಲೆನ ಪ್ರಸ್ತಾಪ ಮಲ್ತ್ದೆರ್. ಸರ್ಕಾರೊದ ವಿರುದ್ಧ ಒಟ್ಟಾದ್ ಪೊರ್ಮ್ಬಾಟ ಮಲ್ಪೆರ ರಡ್ಡ್ ಪಕ್ಷೊಲು ಚರ್ಚೆ ಮಲ್ತ್ದ ಪನ್ದ್ ಸುದ್ದಿ ಉಂಡು.
ಚಿನ್ನಸ್ವಾಮಿಡ್ ಕಾರ್ದಡಿಕ್ ಬೂರ್ದ್ ಸೈತಿನ ಪ್ರಕರಣ, ರಾಜ್ಯೊಡು ಫರ್ಟಿಲೈಜರ್ದ ಕುಂದೆಲ್ರ್ದಾವರ ಬೆನ್ನಿದಕ್ಲೆಗ್ ಆವೊಂದುಪ್ಪುನ ಸಮಸ್ಯೆ, ಧರ್ಮಸ್ಥಳ ಪ್ರಕರಣ, SCSP-TSP ಕಾಸ್ನ್ ಗ್ಯಾರಂಟಿ ಯೋಜನೆಗ್ ಗಲಸೊಂದಿನ ವಿಚಾರ, ವಿಪಕ್ಷೊದ ಶಾಸಕೆರೆಗ್ ಅನುದಾನ ಕೊರಂದೆ ಕಾಲಿ ಆಡಳಿತ ಪಕ್ಷೊದ ಶಾಸಕೆರೆಗ್ ಮಾತ್ರ ಅನುದಾನ ಕೊರ್ತಿನ ವಿಚಾರ, ಮೈಸೂರ್ಡ್ ತಿಕ್ಕಿನ ಡ್ರಗ್ಸ್ ಫ್ಯಾಕ್ಟರಿ ಸೇರ್ದ್ ರಾಜ್ಯೊಡು ಕಾನೂನು ಸುವ್ಯವಸ್ಥೆ ತೆಟ್ಟ್ದ್ ಪೋತಿನ ವಿಚಾರ, ಕಾಂಗ್ರೆಸ್ಡ್ ಸಿಎಂ ಕುರ್ಚಿದ ಲಡಾಯಿ, ರಾಹುಲ್ ಗಾಂಧಿನ ವೋಟ್ ಕಲ್ವೆದ ಆರೋಪಗ್ ಸಚಿವೆ ರಾಜಣ್ಣೆ, ಇಬ್ರಾಹಿಂ ಮೊಕಲೆನ ಪಾತೆರೊಲೆನ್ ವಿಪಕ್ಷೊಲು ತನ್ಕುಲೆಗ್ ಬೋಡಾಪಿಲೆಕ ಗಲಸೊನುನ ಸಾಧ್ಯತೆ ಉಂಡು.
ಆಂಡ ಈ ಮಾತೆತ ನಡುಟು ಪಾಕ ವರ್ಸೊರ್ದಿಂಚಿ ಕಾಲಿ ಪಾತೆರೊಡೇ ಇಪ್ಪುನ ತುಳು ಅಧಿಕೃತ ಭಾಷೆದ ವಿಷಯ ಈ ಸರ್ತಿ ಆಂಡಲಾ ಕೋಡಿ ಎತ್ತುಂಡಾ ಅತ್ತ್ ಕುಡ ಸಮಿತಿ, ಉಪಸಮಿತಿ, ಅಧ್ಯಯನ ಪನ್ಪಿನ ನಾಟಕೊಲೆನೇ ತೂವೊಡಾಪುಂಡಾ ಪನ್ದ್ ಕಾತ್ದ್ ತೂವೊಡಾತೆ.
ಒಂತೆ ಜನ ಶಾಸಕೆರ್ ದ.ಕ. ಜಿಲ್ಲೆದ ಪುದರ್ ಪಗಪುನ ವಿಷಯೊನು ಅಧಿವೇಶನೊಡು ಪ್ರಸ್ತಾಪ ಮಲ್ದಾಪುನ ಪಾತೆರ ಕೊರ್ದದಿತ್ತ್ದ್ ದಾದ ಆಪುಂಡು ಪನ್ದ್ ಕಾತ್ದ್ ತೂವೊಡಾತೆ.