Last updated on August 19th, 2025 at 03:41 pm
ಉಬಾರ್: ಪೊಂಜೊವು ಒರ್ತಿನ ಕೆಕ್ಕಿಲ್ರ್ದ್ ಬಂಗಾರ್ದ ಚೈನ್ ಒಯ್ತೊಂದು ಪೋತಿನ ಪ್ರಕರಣೊಡು ಉಬಾರ್ ಸ್ಟೇಶನ್ ಪೊಲೀಸೆರ್ ಆರೋಪಿನ್ ಪತ್ತ್ದ್, ಒಟ್ಟು ರೂ.5.05 ಲಕ್ಷ ಮೌಲ್ಯೊದ ಸೊತ್ತುಲೆನ್ ವಶೊಕು ಗೆತೊಂದೆರ್.
ಉಬಾರ್ ಪೊಲೀಸ್ ಸ್ಟೇಶನ್ ಸೀಮೆದ ನೆಲ್ಯಾಡಿ-ಪಡುಬೊಟ್ಟು ಕೈತಲ್, ಜೂನ್ 4, 2025 ತಾನಿ ಬೈಕ್ಡ್ ಬತ್ತಿನ ಇರ್ವೆರ್ ಒರ್ತಿ ಪೊಂಜೊವುನ ಕೆಕ್ಕಿಲ್ರ್ದ್ ಬಂಗಾರ್ದ ಚೈನ್ ಒಯ್ತೊಂದು ಪದ್ರಾಡಾದಿತ್ತೆರ್. ಈ ಬಗೆಟ್ ಉಬಾರ್ ಸ್ಟೇಶನ್ಡ್ ಅ.ಕ್ರ. 48/2025, ಕಲಂ 309(4)(ಬಿ) BNS ಅಡಿಟ್ ಪ್ರಕರಣ ದಾಕಲಾದಿತ್ತ್ಂಡ್.
ಜಡ್ತೆ ಮಲ್ತಿನ ಪೊಲೀಸೆರ್ ಸುಳ್ಯ ತಾಲ್ಲೂಕು ಅಲೆಟ್ಟಿ ನಿವಾಸಿ ಅಬ್ದುಲ್ ರೆಹಮಾನ್ (31) ಪನ್ಪಿನಾಯನ್ ನೆಕ್ಕಿಲಾಡಿ ಡ್ ಕೈದ್ ಮಲ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್.
ಆರೋಪಿನ ಕೈರ್ದ್ ರೂ.4,54,000 ಮೌಲ್ಯೊದ ಬಂಗಾರ್ದ ಚೈನ್ ಅಂಚೆನೇ ಕೃತ್ಯೊಗು ಗಲಸ್ದಿನ ಪಲ್ಸರ್ ಬೈಕ್ ಸೇರ್ದ್ ಒಟ್ಟು ರೂ.5,05,000 ಮೌಲ್ಯೊದ ಸೊತ್ತುಲೆನ್ ವಶೊಕು ಗೆತೊಂದೆರ್. ವಶೊಕು ಗೆತೊಂದಿನ ಬೈಕ್ ಮೈಸೂರ್ದ ವಿಜಯನಗರ ಸ್ಟೇಶನ್ ಸೀಮೆದ ಟೂವೀಲರ್ ಕಲ್ವೆದ ಪ್ರಕರಣೊಗು ಸಂಬಂಧಿತಿನವು ಪನ್ದ್ ತೆರಿದ್ ಬೈದ್ಂಡ್.
ಈ ಕಾರ್ಯಾಚರಣೆನ್ ಪುತ್ತೂರು ಉಪವಿಭಾಗೊದ ಪೊಲೀಸ್ ಉಪಾಧೀಕ್ಷಕೆ ಅರುಣ್ ನಾಗೇಗೌಡೆರೆನ ಮಾರ್ಗದರ್ಶನೊಡು ಉಬಾರ್ ಎಸ್ಐ ರವಿ ಬಿ.ಎಸ್. ಮೆರೃನ ಮುತಾಲಿಕೆಡ್ ಸ್ಟೇಶನ್ ಅಧಿಕಾರಿಲು ಬೊಕ್ಕ ಸಿಬ್ಬಂದಿಲೆನ ಕೂಟ ಯಶಸ್ವಿಯಾದ್ ಮಲ್ದ್ಂಡ್.