Last updated on August 20th, 2025 at 02:55 pm
ಕುಡ್ಲ, ಆ. 20: ವಿಯೆಟ್ನಾಂಡ್ ನಡತಿನ ಮಿಸ್ ಟೀನ್ ಸೂಪರ್ ಗ್ಲೋಬ್ ಪಂತೊದ ಕೆಟಗರಿ 1ಡ್ ಭಾರತೊನು ಪ್ರತಿನಿಧಿತ್ದ್ 17 ವರ್ಸ ಪ್ರಾಯೊದ ತುಳುವೆದಿ ದಿಶಾ ರಾಣಿ ಕಡೀರ ರನ್ನರ್ ಅಪ್ ಅಜತ್ ಬೈದೆರ್.
ಅರುಣ್ ರತ್ನ ಪನ್ಪಿನಾರ್ ಸುರುಕು ಕುಡ್ಲಡ್ ಅಟ್ಟನೆ ಮಲ್ತಿನ ಅಡಿಶನ್ಡ್ ಅಜತ್ ಬತ್ತ್ದ್ ಬೊಕ್ಕ ಗೋವಾಡ್ ನಡತಿನ ಪಂತೊಡು ಕರ್ನಾಟಕೊನು ಪ್ರತಿನಿಧಿತ್ದ್ ಮಿಸ್ ಟೀನ್ ಸೂಪರ್ ಗ್ಲೋಬ್ ನ್ಯಾಶನಲ್ ಫರ್ಸ್ಟ್ ರನ್ನರ್ ಅಪ್ ಅಜತ್ ಬತ್ತ್ದ್ ‘ಎಕ್ಸ್ಟ್ರೀಮ್ ಟ್ಯಾಲೆಂಟ್ ಸ್ಟೈಲ್ ಐಕಾನ್ ಪ್ರಿನ್ಸೆಸ್ ಆಫ್ ಕರ್ನಾಟಕ’ ಪ್ರಶಸ್ತಿ ಗೆಂದ್ದಿತ್ತೆರ್.
ಇತ್ತೆ ವಿಯೆಟ್ನಾಮ್ ಡ್ ನಡತಿನ ಅಂತಾರಾಷ್ಟ್ರೀಯ ಪಂತೊಡು ಭಾರತೊನ ಪ್ರತಿನಿಧಿತ್ದ್ ಮಿಸ್ ಟೀನ್ ಸೂಪರ್ ಗ್ಲೋಬ್ ಇಂಟರ್ ನ್ಯಾಶನಲ್ ಫರ್ಸ್ಟ್ ರನ್ನರ್ ಅಪ್ ಆದ್ ಅಜತ್ ಬತ್ತ್ದ್, ‘ಸೂಪರ್ ಟ್ಯಾಲೆಂಟ್’ ಪ್ರಶಸ್ತಿ ಗೆಂದ್ದ್ ತುಳುನಾಡ್ಗ್ ಪೆರ್ಮೆ ಕನತ್ದೆರ್.
ಕುಡ್ಲದ ಬಿಜೈ ಕಾಪಿಕಾಡ್ದ ದಯಾನಂದ್ ಬೊಕ್ಕ ರೇಣುಕಾ ದಂಪತಿಲೆನ ಮಗಲ್ ದಿಶಾ ರಾಣಿ ಮೇರ್ ಕುಡ್ಲದ ಸೈಂಟ್ ಅಲೋಶಿಯಸ್ ಪದವಿ ಪೂರ್ವ ಕಾಲೇಜ್ದ ವಿದ್ಯಾರ್ಥಿನಿ. ನನ ದುಂಬಗ್ ಮಿಸ್ ಗ್ರ್ಯಾಂಡ್ ಇಂಡಿಯಾ ಅತ್ತ್ಂಡ ಮಿಸ್ ಯೂನಿವರ್ಸ್ ಪಂತೊಡು ಪಾಲ್ಪಡೆಪಿನ ಅಂಗಲ್ಪುನು ದಿಶಾ ರಾಣಿ ತೋಜಾದೆರ್.
ಬಾಲನಟಿಲಾ ಆದುಪ್ಪುನ ದಿಶಾರಾಣಿ ಒಂಜಿ ಪಿಚ್ಚರ್ಡ್ ಇತ್ತೆನೇ ನಟನೆ ಮಲ್ದೆರ್, ಆರ್ ನಟನೆ ಮಲ್ದಿನ ರಡ್ಡನೇ ಸಿನಿಮಾ ‘ಪಿಲಿ ಪಂಜ’ ಡಿಸೆಂಬರ್ಡ್ ಬುಡುಗಡೆ ಆವೊಂದುಂಡು. ಪ್ರಶಸ್ತಿ ಗೆಂದ್ದ್ ಪಿರಬತ್ತಿನ ಪೊಣ್ಣನ್ ಕುಡ್ಲ ವಿಮಾನ ಉಂತಡೆಡ್ ಮೋಕೆಡ್ ಎದುಕೊಂಡೆರ್.