ನೇರೆಂಕಿ ಗರೋಡಿಡ್ ಅರ್ಥಪೂರ್ಣವಾದ್ ನಡತ್ಂಡ್ ದೈವಾರಾಧನೆದ ಬಗೆಟ್ ಕಾರ್ಯಾಗಾರ

Last updated on August 25th, 2025 at 08:25 pm

ರಾಮಕುಂಜ, ಆ. 25: ಪರನೇರೆಂಕಿ ಏಲ್ಸಾರ ಪಟ್ಟೊದ ಶ್ರೀ ಚಕ್ರವರ್ತಿ ಕೊಡಮನ್ದಾಯ ದೈವಸಾನ ಬೊಕ್ಕ ಶ್ರೀ ಬೆರ್ಮೆರ್ ಬೈದೆರ್ಲೆನ ಗರೋಡಿ ನೇರೆಂಕಿಗುತ್ತುಡು ಕೋಡೆ 2025 ಆಗಸ್ಟ್ 24ನೇ ಐತಾರದಾನಿ ಅಪರೂಪಡ್ ಅಪರೂಪ ಪನ್ಪಿನ ಲೇಸ್ ‘ದೈವಾರಾಧನೆದ ಬಗೆಟ್ ಕಾರ್ಯಾಗಾರ’ ದೈವಾರಾಧನೆದ ಮಾತಾ ವರ್ಗೊಲೆನ ಒತ್ತುಪಾಲ್‌ಡ್ ಅರ್ಥಪೂರ್ಣವಾದ್ ನಡತ್ಂಡ್.

ಕಾಂಡೆ 9:30 ಗಂಟೆಗ್ ಪುತ್ತೂರು ಮಾಸ್ಟರ್ ಪ್ಲಾನರಿದ ಆಡಳಿತ ಮೊಕ್ತೇಸರೆರ್ ಆನಂದ ಎಸ್‌. ಕೆ. ಬೊಕ್ಕ ರೇಖಾ ಆನಂದ ಮೊಕಲೆನ ಕೈರ್ದ್ ತುಡರ್ ಅರ್ಲಾದ್ ಸುರು ಆಯಿನ ಉದಿಪನ ಲೇಸ್‌ದ ಗುರ್ಕಾರ್ಮೆನ್ ಕಡಬ ಉಪತಹಸೀಲ್ದಾರ್ ಗೋಪಾಲ ಮೇರ್ ವಯಿತೊಂಡೆರ್.

ಕಾಂಡೆ 10:30ರ್ದ್ ಸುರು ಆಯಿನ ಕಾರ್ಯಾಗಾರೊಡು ಬಲ್ನಾಡ್‌ದ ಶಶಾಂಕ್ ನೆಲ್ಲಿತ್ತಾಯೆರ್, ಮುಕ್ಕಾಲ್ದಿ ಗಂಗಾಧರ ನೇಜಿಕಾರ್, ಪೆರಿಯ ದಲ್ಯದಾರ್ ಸುಂದರ ಮಡ್ಯೆಲೆರ್, ಮಾಡಾವುದ ಪೆರಿಯ ದೈವ ನರ್ತಕೆರ್ ನೇಮು ಪರವೆರ್, ಕಡಬದ ಪೆರಿಯ ದೈವ ನರ್ತಕೆರ್ ಮುತ್ತ ಅಜಲೆರ್, ಕಲ್ಲ್‌ಗುಡ್ಡೆದ ಪೆರಿಯ ದೈವ ನರ್ತಕೆರ್ ಕಿಟ್ಟು ಅಜಲೆರ್, ವಿಶ್ವ ಪರವೆರ್, ಓಬಯ್ಯ ಪರವೆರ್ ತನ್ಕುಲೆ ಪಾಕ ವರ್ಸೊದ ಅನುಭವೊಡು ಪಡೆಯೊಂದಿನ ಗೇನೊದ, ತೂತಿನ ಇಸಯೊಲೆನ ಮುಕೇನ ಸೇರ್ದಿನ ಜನಮಂದೆಗ್ ಗೇನ ಪಟ್ಟಿಯೆರ್. ಕಾರ್ಯಾಗಾರೊಡು ಕೈಲ್ ಕಡ್ತಿ ಬೊಕ್ಕ ಸೂತಿಕ ಬತ್ತ್ಂಡ ಕೈಲ್‌ನ್ ದಾದ ಮಲ್ಪೊಡು ಪನ್ಪಿನ ಸೂಕ್ಷ್ಮಾತಿ ಸೂಕ್ಷ್ಮ ಇಸಯೊರ್ದು ಪತ್ತ್‌ದ್ ಮದ್ಯಸ್ಥೆರ್ ಏರ್, ಮುಂಡಾಸ್ ಕಟ್ಟುನು ಎಂಚ, ದೈವೊಗು ಮಾತೆರ್ಲಾ ಪೂ ಪಾಡೊಲಿಯಾ, ಚಾಕಿರಿದಕುಲು ಕುಜಲ್ ಬುಡ್ದು ಕಲೊಟು ಉಂತೊಲಿಯಾ, ದೈವೊದ ಮದಿಮಾಯೆ ಇಂಚ ಪಾಕ ಇಸಯೊಲೆನ ಬಗೆಟ್ ಪಾತೆರಕತೆ, ಪ್ರಶ್ನೋತ್ತರ ನಡತ್ಂಡ್.

ಕಾರ್ಯಾಗಾರೊಡು ಸುಂದರ ಮಡ್ಯೆಲೆರ್ ದೈವೊದ ಕಲೊಟು ಇಪ್ಪುನಗ ಸಮ ಮುಂಡಾಸ್ ಎಂಚ ಕಟ್ಟೊಡು ಪನ್ದ್ ಪ್ರಾತ್ಯಕ್ಷಿಕೆ ತೂಪಾಯೆರ್.

ಮದ್ಯಾನರ್ದ್ ಬೊಕ್ಕ ನಡತಿನ ಸಮಾರೋಪಡ್ ಶಶಾಂಕ್ ನೆಲ್ಲಿತ್ತಾಯೆರ್ ದೈವಾದಾನಧನೆದ ಬಗೆಟ್ ಪಾತೆರ್ಯೆರ್ ಮಿತ್ತರ್ಮೆಡ್ ಆನಂದ ಎಸ್. ಕೆ., ನೇರೆಂಕಿ ಗರೋಡಿದ ಕಾರ್ಯಾಧ್ಯಕ್ಷೆರ್ ಕಿರಣ್ ಪಾದೆ, ಗಂಗಾಧರ ನೇಜಿಕಾರ್, ಸುಂದರ ಮಡ್ಯೆಲೆರ್, ನೇಮು ಪರವೆರ್, ಮುತ್ತು ಅಜಲೆರ್, ಕಿಟ್ಟು ಅಜಲೆರ್ ಒತ್ತುಪಾಲ್ ಇತ್ತೆರ್.