Last updated on August 30th, 2025 at 09:45 am
ಒಡಿಪು, ಆ. 30: ಸ್ಥಳೀಯ ಆರ್ಥಿಕತೆನ್ ಮಿತ್ತ್ ಕನಯೆರೆ ಅಂಚೆನೇ ಸಾರ್ವಜನಿಕ ಹಿತಾಸಕ್ತಿನ್ ಕಾಪುನ ಉದ್ದೇಶೊಡು, ಒಡಿಪು ನಗರಸಭೆ, ಒಡಿಪು ಬೊಕ್ಕ ಮಣಿಪಾಲಡ್ ಹೋಟೆಲ್ ಬೊಕ್ಕ ಅಂಗಡಿಲೆನ್ ರಾತ್ರೆ 11 ಗಂಟೆ ಮುಟ್ಟ ಓಪನ್ ದೀಯೆರ ಅವಕಾಶ ಕೊರ್ಪುನ ನಿರ್ಣಯಯೊನು ಅಂಗೀಕರಿತ್ದ್ಂಡ್.
ಶುಕ್ರವಾರ ನಗರಸಭೆ ಅಧ್ಯಕ್ಷೆ ಪ್ರಭಾಕರ ಪೂಜಾರಿ ಮೆರೆನ ಗುರ್ಕಾರ್ಮೆಡ್ ನಡತಿನ ಸಾಮಾನ್ಯ ಸಭೆಟ್ ಈ ನಿರ್ಧಾರ ಗೆತೊಂದೆರ್.
ಸಭೆಟಾ ಈ ವಿಷಯ ಪ್ರಸ್ತಾಪ ಮಲ್ತಿನ ಶಾಸಕೆ ಯಶ್ಪಾಲ್ ಸುವರ್ಣೆರ್, “ಕಾನೂನು ಬೊಕ್ಕ ಸುವ್ಯವಸ್ಥೆ ಕಾತೊನುನ ದಿಟ್ಟಿಡ್ ಒಡಿಪು ಬೊಕ್ಕ ಮಣಿಪಾಲಡ್ ಹೋಟೆಲ್ ಬೊಕ್ಕ ಅಂಗಡಿಲೆನ್ ರಾತ್ರೆ 10 ಗಂಟೆಗೇ ಮುಚ್ಚೆರೆ ಒತ್ತಾಯ ಮಲ್ತೊಂದುಲ್ಲೆರ್. ಉಂದು ಜಿಲ್ಲೆದ ಆರ್ಥಿಕತೆದ ಮಿತ್ತ್ ನಕಾರಾತ್ಮಕ ಪರಿಣಾಮ ಆಪಿನತ್ತಂದೆ, ಪ್ರವಾಸಿಗೆರ್, ಆಸ್ಪತ್ರೆಡಿತ್ತಿನಕ್ಲೆನ ಸಂಬಂಧಿಕೆರ್ ಬೊಕ್ಕ ವಿದ್ಯಾರ್ಥಿಲೆಗ್ ರಾತ್ರೆ ವನಸ್ ಬೊಕ್ಕ ಅಗತ್ಯ ಸೊತ್ತುಲೆನ್ ಗೆತೊನರೆ ತೊಂದರೆ ಆವೊಂದುಂಡು. ಆರ್ಥಿಕ ಬುಲೆಚ್ಚಿಲ್ ಬೊಕ್ಕ ಸಾರ್ವಜನಿಕೆರೆ ಅನುಕೂಲೊಗು ಅಂಗಡಿಲು ಬೊಕ್ಕ ಹೋಟೆಲ್ಲೆನ್ ರಾತ್ರೆ 11 ಗಂಟೆ ಮುಟ್ಟ ಓಪನ್ ದೀಯೆರ ಅವಕಾಶ ಕೊರೊಡು” ಪನ್ದ್ ಆರ್ ಒತ್ತಾಯ ಮಲ್ತೆರ್. ಆರೆನ ಈ ಪ್ರಸ್ತಾಪೊಗು ನಗರಸಭೆತ ಪದುಕೆರ್ ಸರ್ವಾನುಮತೊಡು ಬೆರಿತಾಂಗ್ ಕೊರ್ಯೆರ್.