Last updated on September 3rd, 2025 at 01:22 pm
ಕುಡ್ಲ, ಸೆ. 03: ಅಪ್ರಾಪ್ತ ಪೊಣ್ಣನ ಮಿತ್ತ್ ಅತ್ಯಾಚಾರ ಮಲ್ತ್ದ್, ಅವೆತ ವೀಡಿಯೋ ಮಲ್ತ್ದ್, ಅವೆನ್ ಸಾಮಾಜಿಕ ಬಲೆತ್ತಾನೊಡು ಪಟ್ಟೊಂಡಿನ ಪ್ರಕರಣೊಡು ಒರಿ ಅಪ್ರಾಪ್ತೆ ಆಣ್ ಸೇರ್ದ್ ಎಣ್ಮ ಜನನ್ ಬಜ್ಪೆ ಪೊಲೀಸೆರ್ ಕೈದ್ ಮಲ್ದೆರ್.
ಕೈದಾತಿನಕ್ಲೆನ್ ಕಾರ್ತಿಕ್, ರಾಕೇಶ್ ಸಲ್ಡಾನಾ, ಜೀವನ್, ಸಂದೀಪ್, ರಕ್ಷಿತ್, ಶ್ರವಣ್ ಬೊಕ್ಕ ಸುರೇಶ್ ಪನ್ದ್ ಗುರ್ತ ಪತ್ತ್ದೆರ್. ಅಪ್ರಾಪ್ತೆ ಆಣನ್ ಬಾಲಾಪರಾಧಿ ಗೃಹೊಗು ಕಡಪುಡ್ದೆರ್.
ರಡ್ಡ್ ತಿಂಗೊಲುಗು ದುಂಬು ನಡತಿನ ಈ ನಡಕೆ ಇಂಚಿಪ ಬೊಲ್ಪುಗು ಬೈದ್ಂಡ್. ಪೊಲೀಸೆರ್ ಕೊರ್ತಿನ ಒಲವುದ ಪ್ರಕಾರ, ಕಾರ್ತಿಕ್ಗ್ ಇನ್ಸ್ಟಾಗ್ರಾಮ್ಡ್ ಫಸ್ಟ್ ಪಿ.ಯು.ಸಿ. ಕಲ್ತೊಂದುಪ್ಪುನ ಒರ್ತಿ ಪೊಣ್ಣನ ಗುರ್ತ ಆದಿತ್ತ್ಂಡ್, ಅವ್ವು ಮೋಕೆಗ್ ತಿರ್ಗ್ದ್ಂಡ್. ಜೂನ್ಡ್ ಆಯೆ ಆ ಪೊಣ್ಣನ್ ಅಡ್ಯಾರ್ ಫಾಲ್ಸ್ ಕೈತಲ್ದ ಕಾಡ್ಗ್ ಲೆತೊಂದು ಪೋದು ಅತ್ಯಾಚಾರ ಮಲ್ತ್ದೆ ಪನ್ದ್ ವರದಿ ಆತ್ಂಡ್.
ಅಲ್ಪನೇ ಇತ್ತಿನ ಆಯನ ದೋಸ್ತಿ ರಾಕೇಶ್ ಸಲ್ಡಾನಾ ಲಾ ಪೊಣ್ಣನ ಮಿತ್ತ್ ಅತ್ಯಾಚಾರ ಮಲ್ತ್ದೆ. ಕಾರ್ತಿಕ್ ಇಂದೆನ್ ತನ್ನ ಮೊಬೈಲ್ಡ್ ರೆಕಾರ್ಡ್ ಮಲ್ತಿತ್ತ್ದ್, ಬೊಕ್ಕ ಈ ವಿಡಿಯೋನ್ ತನ್ನ ದೋಸ್ತಿಲೆಡ ಪಟ್ಟೊಂದಿತ್ತ್ದ್, ಆ ವೀಡಿಯೋ ವೈರಲ್ ಆತ್ಂಡ್.
ಈ ವಿಚಾರ ತೇರಿನೇ ಸಂತ್ರಸ್ತೆದಿ ಆಗಸ್ಟ್ 17ತಾನಿ ಬಜ್ಪೆ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಲ್. ಪೊಲೀಸೆರ್ ಪೋಕ್ಸೋ ಕಾಯ್ದೆದಡಿಟ್ ಪ್ರಕರಣ ದಾಕಲ್ತೊಂದು ಆರೋಪಿಲೆನ್ ಕೈದ್ ಮಲ್ದೆರ್.