Last updated on September 16th, 2025 at 11:40 am
ಕುಡುಮ, ಸೆ. 16: ಧರ್ಮಸ್ಥಳದ ಸುತ್ತಮುತ್ತ ಪುನ ಕೌಂತಿನ ಪ್ರಕರಣೊಗು ಸಂಬಂಧಿತ್ದ್ ಮಲ್ಲ ಬುಲೆಚ್ಚಿಲ್ ನಡತ್ದ್ಂಡ್. ಧರ್ಮಸ್ಥಳಡ್ ಪುನ ಕೌಂತಿನ ಜಾಗೆ ತೂಪಾಯೆರ ಅಂಚೆನೇ ಒಕ್ಯೆರ ಇರ್ವೆರ್ ಊರುದಕುಲು ಸಂದಾದಿನ ರಿಟ್ ಅರ್ಜಿದ ವಿಚಾರಣೆಗ್ ಕರ್ನಾಟಕ ಹೈಕೋರ್ಟ್ ಒತ್ತೊಂದುಂಡು. ನ್ಯಾಯಮೂರ್ತಿ ನಾಗಪ್ರಸನ್ನ ಪೀಠ ರಿಟ್ ಅರ್ಜಿನ್ ಗೆತೊಂದು ಎಸ್ಐಟಿಗ್ ನೊಟೀಸ್ ಜಾರಿ ಮಲ್ದ್ಂಡ್. ಊರುದಕುಲೇ ಆಯಿನ ಪುರಂದರೆ ಬೊಕ್ಕ ತುಕಾರಾಮ್ ಪನ್ಪಿನ ಇರ್ವೆರ್ ಸಾಕ್ಷಿದಾರೆರ್, ನೇತ್ರಾವತಿ ಕಾಡ್ಡ್ ಚಿನ್ನಯ್ಯೆ ಪುನ ಕೌಂಪಿನೆನ್ ತೂತ ಪನ್ದ್ ಎಸ್ಐಟಿಡ ಒಯಿಲ್ ಬರೆಪಾದಿತ್ತೆರ್. ಆಂಡ, ಆ ಒಯಿಲ್ನ್ ಎಸ್ಐಟಿ ಪರಿಶೀಲನೆ ಮಲ್ಪಂದಿನೆರ್ದಾವರ ಔರ್ವೆರ್ಲಾ ಹೈಕೋರ್ಟ್ದ ಮೊಟ್ಟು ಬರ್ತ್ದೆರ್.
ಸರ್ಕಾರೊದ ಪರ ವಿಶೇಷ ಅಭಿಯೋಜಕೆ ಬಿ.ಎನ್. ಜಗದೀಶ್ ಹೈಕೋರ್ಟ್ ನೊಟೀಸ್ ಗೆತೊಂದಿತ್ತ್ದ್, ಗುರುವಾರ ಕೋರ್ಟ್ಗ್ ಸದು ಕೊರ್ಪುನ ಸಾಧ್ಯತೆ ಉಂಡು.
ಬೇಗೊಡೇ ಜಾಗೆ ಗುರ್ತ ಮಲ್ತ್ದ್ ಉತ್ಖನನ ಮಲ್ಪೆರ ಅರ್ಜಿದಾರೆರ್ ಬಿನ್ನೈತೊಂದೆರ್. ಆತೇ ಅತ್ತಂದೆ, ಕೋರ್ಟ್ ಕಮಿಷನರ್ ಅತ್ತ್ಂಡ ನಿವೃತ್ತ ನ್ಯಾಯಮೂರ್ತಿಯೆರೆನ ಮುತಾಲಿಕೆಡ್ ಜಡ್ತೆ ನಡಪಡ್ ಅಂಚೆನೇ ಜಡ್ತೆದ ಪ್ರತೀ ನಿಲವುದ ಒಲವುನು ಕೋರ್ಟ್ಗ್ ಕೊರ್ಯೆರ ಎಸ್ಐಟಿಗ್ ನಿರ್ದೇಶನ ಕೊರೊಡು ಪನ್ದ್ ಬಿನ್ನಯ ಮಲ್ದೆರ್. ಈ ಪ್ರಕರಣೊಡು ನನದ ವಿಚಾರಣೆ ಗುರುವಾರ ನಡಪರೆಗುಂಡು.