Last updated on September 22nd, 2025 at 10:48 am
ಬಂಟ್ವಾಳ, ಸೆ. 22: ಬಿ.ಸಿ ರೋಡ್ ಬಸ್ ಉಂತಡೆಡ್ ಬಸ್ಗ್ ಕಾತೊಂದಿತ್ತಿನ ಜನತ ಕಿಸೆರ್ದೊ 1 ಲಕ್ಷ ರೂ. ಕಾಸ್ ಕನ್ಡಿನ ಆರೋಪಡ್ ಕೇರಳ ಮೂಲೊದ ಆಂಜೊವುನು ಬಂಟ್ವಾಳ ನಗರ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನಾಯನ್ ಕೇರಳದ ತ್ರಿಶೂರ್ ಜಿಲ್ಲೆದ ನಝೀರ್ ಪುನ್ನಯ್ಯಾರ್ ಪನ್ದ್ ಗುರ್ತ ಪತ್ತ್ದೆರ್.
ಪೊಲೀಸೆರೆ ಪ್ರಕಾರ, ಕುಂದಾಪುರದ ರಂಗನಾಥ ಬೆಳ್ಳಾಲ ಮೇರ್ ತನ್ನ ಕಾರ್ ಮಾರ್ದ್ ತಿಕ್ಕಿನ 1.60 ಲಕ್ಷ ರೂ. ಕಾಸ್ಡ್ ಕುಡೊಂಜಿ ಸೆಕೆಂಡ್ ಹ್ಯಾಂಡ್ ಕಾರ್ ಗೆತೊನರೆ ಆಗಸ್ಟ್ 14 ತಾನಿ ಬಿ.ಸಿ. ರೋಡ್ಗ್ ಬತ್ತಿತ್ತೆರ್. ಆಂಡ, ದಾಕಲೆಲು ಸಮದಾಂತಿನೆರ್ದಾವರ ಗೆತೊಂದಿಜ್ಜಂಡ್. ಬೊಕ್ಕ ಆರ್ ಕೈಕಂಬಡ್ ಇಪ್ಪುನ ದೋಸ್ತಿನ ಇಲ್ಲಡ್ ಆನಿ ರಾತ್ರೆ ಉಂತುದಿತ್ತೆರ್.
ಆಗಸ್ಟ್ 15 ತಾನಿ, ಬೆಳ್ಳಾಲೆರ್ ಕೊಟ್ಟಿಗೆಹಾರಗ್ ಪೋಯೆರ ಬಿ.ಸಿ ರೋಡ್ ಬಸ್ ಉಂತಡೆಡ್ ಕಾತೊಂದುಪ್ಪುನಗ, ಆರೆನ ಪ್ಯಾಂಟ್ದ ಕಿಸೆಟ್ 1.60 ಲಕ್ಷ ರೂ. ಇತ್ತ್ಂಡ್. ಉಂದೆಟ್ 50,000 ರೂ.ದ ಮೂಜಿ ಕಟ್ಟ ಬೊಕ್ಕ 10,000 ರೂ.ದ ಒಂಜಿ ಕಟ್ಟ ಇತ್ತ್ಂಡ್. ಆರ್ ಬಸ್ ಸರ್ತಿ ಬೊಕ್ಕ, 1 ಲಕ್ಷ ರೂ. ( 50,000 ರೂ.ದ ರಡ್ಡ್ ಕಟ್ಟ) ಇಜ್ಜಂದಿನ ಗೇನೊಗು ಬೈದ್ಂಡ್.
ಆರ್ ಅಪಗನೇ ಬಂಟ್ವಾಳ ನಗರ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಅಪಗನೇ ಕಾರ್ಯಪ್ರವೃತ್ತೆರಾಯಿನ ಇನ್ಸ್ಪೆಕ್ಟರ್ ಅನಂತ ಪದ್ಮನಾಭೆರೆನ ಮುತಾಲಿಕೆದ ಪೊಲೀಸ್ ಕೂಟ ಆರೋಪಿನ್ ಕುಡ್ಲಡ್ ಪತ್ತ್ದ್ಂಡ್.
ಬೊಕ್ಕ ನಝೀರ್ನ್ ನ್ಯಾಯಂತಡೆಕ್ ಲೆತೊಂದು ಪೋತೆರ್.