Last updated on September 26th, 2025 at 10:39 am
ಕುಡ್ಲ, ಸೆ. 26: ಲಂಚ ಗೆತೊನ್ದಿನ ಪ್ರಕರಣೊಡು ಲೋಕಾಯುಕ್ತ ದಾಳಿ ಮಲ್ಪುನ ಪೊರ್ತುಡು ಪದ್ರಾಡಾತಿನ ಪುತ್ತೂರ್ ತಾಲೂಕ್ ತಹಶೀಲ್ದಾರ್ ಎಸ್.ಬಿ. ಕೂಡಲಗಿ ಸಂದಾದಿನ ನಿರೀಕ್ಷಣಾ ಜಾಮೀನ್ನ್ 3ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ (ವಿಶೇಷ) ನ್ಯಾಯಂತಡೆ ನಿರಾಕರಿತ್ದ್ಂಡ್.
ಜಾಗೆದ ಎನ್.ಒ.ಸಿ ಗ್ ಲಂಚ ಕೇನ್ದಿನೆನ್ ಫಲಾನುಭವಿ ಒರಿ ಲೋಕಾಯುಕ್ತಗ್ ತೆರಿಪಾದಿತ್ತೆರ್. ಆ.28 ದಾನಿ ಪುತ್ತೂರು ತಹಶೀಲ್ದಾರ್ ಕಚೇರಿಗ್ ಲೋಕಾಯುಕ್ತ ಅಧಿಕಾರಿಲು ದಾಳಿ ಮಲ್ತಿತ್ತೆರ್. ಆ ಪೊರ್ತುಡು ಕಚೇರಿಧ ಭೂ ಸುಧಾರಣಾ ಶಾಖೆದ ಪ್ರಥಮ ದರ್ಜೆ ಸಕಾಯಕೆ ಸುನೀಲ್ ಕುಮಾರ್ ದೂರುದಾರೆರ್ದ್ 12 ಸಾರ ರೂ. ಗೆತೊನುನಗ ಲೋಕಾಯುಕ್ತ ಬಲೆಕ್ ಬೂರ್ದೆ. ವಿಚಾರಣೆದ ಪೊರ್ತುಡು ತಹಶೀಲ್ದಾರ್ರೆಗ್ 10 ಸಾರ ರೂ. ಕೊರೊಡು ಪನ್ದ್ ಆಯೆ ಬಾಯಿ ಬುಡ್ದಿತ್ತ್ದ್, ಇರ್ವೆರೆ ಮಿತ್ತ್ಲಾ ಭ್ರಷ್ಟಾಚಾರ ನಿರ್ಬಂಧಕ ಕಾಯ್ದೆ 1988 (ತಿದ್ದುಪಡಿ ಕಾಯ್ದೆ 2018)ದ ಅಡಿಟ್ ಪ್ರಕರಣ ದಾಕಲ್ತ್ದಿತ್ತೆರ್. ಸುನೀಲ್ ಜಾಮೀನ್ದ ಮಿತ್ತ್ ಬುಡುಗಡೆ ಆತೆ. ಕೂಡಲಗಿ ನನಲಾ ದೆಂಗ್ತಪ್ಪಾದ್ ಕುಲ್ದೆ ಪನ್ದ್ ಲೋಕಾಯುಕ್ತ ಪೊಲೀಸ್ ಅಧೀಕ್ಷಕೆ ಕುಮಾರ ಚಂದ್ರೆ ತೆರಿಪಾದೆರ್.
ನಿರೀಕ್ಷಣಾ ಜಾಮೀನ್ ಕೇನ್ದ್ ಕೂಡಲಗಿ ಜಿಲ್ಲಾ ನ್ಯಾಯಂತಡೆಗ್ ಅರ್ಜಿ ಪಾಡ್ದಿತ್ತೆ. ಸೆ.25ತಾನಿ 3ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ (ವಿಶೇಷ) ನ್ಯಾಯಂತಡೆದ ನ್ಯಾಯಾಧೀಶೆರಾಯಿನ ಸುನೀತಾ ಎಸ್.ಜಿ. ಮೇರ್ ವಿಚಾರಣೆ ಮಲ್ತ್ದ್ ಜಾಮೀನಾ ಕೊರ್ಯೆರಾಪುಜಿ ಪನ್ತೆರ್. ಲೋಕಾಯುಕ್ತ ಸಂಸ್ಥೆದ ಪರವಾದ್ ವಿಶೇಷ ಸರಕಾರಿ ಅಭಿಯೋಜಕೆ ರವೀಂದ್ರ ಮುನ್ನಿಪ್ಪಾಡಿ ವಾದ ಮಂಡನೆ ಮಲ್ತಿತ್ತೆರ್.