Last updated on September 26th, 2025 at 12:14 pm
ಕುಂದಾಪುರ, ಸೆ. 26: ತಾರೆದ ತೋಟೊಡು ತಾರಾಯಿ ಕೊಯ್ದ್ ಕೊನೊಪುನ ಬೇಲೆ ಮಲ್ತೊಂದಿತ್ತಿನ ಕಾರ್ಮಿಕೆ ಒರಿ ಬರ್ಸದ ನೀರ್ ದಿಂಜಿದಿತ್ತಿನ ತೋಡುಗ್ ಕಾರ್ ಜಾರ್ದ್ ಬೂರ್ದ್ ತೀರ್ದಿನ ನಡಕೆ ಬೇಳೂರು ಗ್ರಾಮೊದ ಚಾಮ್ತಾಡಿ ಕೈಲೇರಿ ಕೈತಲ್ ಬುಧವಾರ ನಡತ್ದ್ಂಡ್.
ತೀರ್ದಿನಾರೆನ್ ಅಚ್ಲಾಡಿ ಅಂಬೇಡ್ಕರ್ ಕಾಲೋನಿದ ಶರತ್ (32) ಪನ್ದ್ ಗುರ್ತ ಪತ್ತ್ದೆರ್.
ಶರತ್ ಮೇರ್ ಬುಧವಾರ ತನ್ನ ಇಲ್ಲದ ಮುಟ್ಟದ ಅಚ್ಲಾಡಿಡ್ ಕಾಂಟ್ರಾಕ್ಟರ್ನ ಒಟ್ಟುಗು ತಾರೆ ತೋಟೊಗು ಬೇಲೆಗ್ ಪೋವೊಂದಿತ್ತೆರ್. ತಾರೆರ್ದ್ ತಾರಾಯಿ ದೆತ್ತ್ದ್ ಟೆಂಪೋಗ್ ದಿಂಜಾವೊದುಪ್ಪುನಗ, ಆರ್ ಒರರ್ದ್ ಒರಾನೆ ನಾಪತ್ತೆ ಆದಿತ್ತೆರ್. ಒರ್ಮೆಲಾ ನಾಡ್ಂಡಲಾ ತಿಕ್ಕ್ದಿಜ್ಜಂಡ್. ಬುಧವಾರ ಬಾರೀ ಬರ್ಸ ಇತ್ತಿನೆರ್ದಾವರ ತೋಡುಡು ನೀರ್ ದಿಂಜಿದ್ ಪರತೊಂದಿತ್ತ್ಂಡ್.
ಗುರುವಾರ ಮಧ್ಯಾಹ್ನ ಕೈಲೇರಿ ಮುಟ್ಟದ ತೋಡುಡು ಆರೆನ ಪುನ ತಿಕ್ಕ್ದ್ಂಡ್.
ಬುಧವಾರ ದೊರಿನ ಭಾರೀ ಬರ್ಸೊರ್ದಾವರ ತೋಡುಡು ನೀರ್ ದಿಂಜಿದಿತ್ತ್ಂಡ್, ಸುತ್ತಮುತ್ತದ ಸಾದಿಲುಲಾ ಕೆಸರ್ ಉಂತುದು ಪೋಯೆರಾವಂದಿಲೆಕ ಆದಿತ್ತ. ಟೆಂಪೋಗು ದಿಂಜಾಯೆರ ತಾರಾಯಿ ಕೊನೊನಗ ಶರತ್ ಆಕಸ್ಮಿಕವಾದ್ ಕಾರ್ ಜಾರ್ದ್, ಏರೆಗ್ಲಾ ತೆರಿಯಂದಿಲೆಕ ತೋಡುಗು ಬೂರ್ದು, ಮುರ್ಕ್ದ್ ತೀರ್ದೆರ್ ಪನ್ದ್ ಅಂದಾಜಿ ಮಲ್ದೆರ್.
ತೋಟ ತಾರ್ದ ಬರಿಟೇ ಇತ್ತಿನೆರ್ದಾವರ, ಬುಧವಾರ ರಾತ್ರೆ ಮುಟ್ಟಲಾ ತಾರ್ಡ್ ನಾಡುನ ಬೇಲೆ ನಡತಿತ್ತ್ಂಡ್. ಗುರುವಾರಲಾ ನಾಡುನ ಬೇಲೆ ಮಲ್ತ್ದ್, ಕಡೇಕ್ಲಾ ಪುನ ತಿಕ್ಕ್ದ್ಂಡ್. ಈಶ್ವರ್ ಮಲ್ಪೆ, ಅಗ್ನಿಶಾಮಕ ದಳೊ ಅಂಚೆನೇ ಅಲ್ಪದ ಸ್ವಯಂಸೇವಕೆರಾಯಿನ ನಾಗರಾಜ್, ಜೀವನ್, ಮಿತ್ರೆ ಸೇರ್ದ್ ಪಾಕ ಜನ ನಾಡೆರೆ ಸಕಾಯ ಮಲ್ತೆರ್.
ಕೋಟಾ ಪೊಲೀಸ್ ಸ್ಟೇಶನ್ ಸಬ್ ಇನ್ಸ್ಪೆಕ್ಟರ್ ಪ್ರವೀಣ್ ಕುಮಾರ್, ಎಎಸ್ಐ ರವಿ ಕುಮಾರ್ ಬೊಕ್ಕ ಸಿಬ್ಬಂದಿ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತಿತ್ತ್ದ್, ಪ್ರಕರಣ ದಾಕಲ್ತೊಂದೆರ್.