Last updated on October 1st, 2025 at 03:36 pm
ಅ. 1: ಅಕ್ಟೋಬರ್ 1 ತುಳು ಪತ್ರಿಕೋದ್ಯಮೊಗು ಒಂಜಿ ಮಾಮಲ್ಲ ದಿನ. ಕಡೀರ ತುಳು ಸಂಚಿಕೆ ಪ್ರಕಟ ಆತಿನ ಅಂಚೆನೇ ಕಡೀರ ಪತ್ತ ತುಳು ಪತ್ರಿಕೆ ಪ್ರಕಟ ಆತಿನಲಾ ಅಕ್ಟೋಬರ್ ಒಂಜೆತಾನಿ, ವರ್ಸ ಬೇತೆ ಬೇತೆ.
ನಮ್ಮ ದೇಶೊಗು ಸ್ವಾತಂತ್ರ್ಯ ತಿಕ್ಕುನೆಕ್ ದುಂಬು ತುಳುನಾಡ್ಡ್ ಒಂಜೇ ಒಂಜಿ ತುಳು ಪತ್ರಿಕೆ ಇತ್ತಿಜಿ. ಅಪಗ ಕುಡ್ಲಡ್ದ್ ಪಿದಡೊಂದಿತ್ತಿನ ‘ಕಂಠೀರವ’ ಬೊಕ್ಕ ಒಡಿಪುದ ‘ನವಯುಗ’ ಪುದರ್ ಪೋತಿನ ವಾರ ಪತ್ರಿಕೆಲು. ಆ ಪತ್ರಿಕೆಲೆನ್ ದೇಶಪ್ರೇಮಿಲು, ಸಾಹಿತ್ಯೊಡು ಆಸಕ್ತಿ ಇತ್ತಿನಕುಲು ಕೊಡಿಕಾರ್ಡ್ ಉಂತುದು ಗೆತೊನೊಂದಿತ್ತೆರ್. ನವಯುಗ ನ್ 1921 ಟ್ ಎ.ಬಿ. ಶೆಟ್ರ್ ಕುಡ್ಲಡ್ ಉಂಡುಮಲ್ತಿತ್ತೆರ್. ಬೊಕ್ಕ ಅವೆನ್ ಕುಡ್ಲಗ್ ಕೊನೊದು ಸರಾಗ್ ಅಚ್ಚಿಮಲ್ಪಾಯಿನಾರ್ ಕೆಮ್ತೂರು ಹೊನ್ನಯ್ಯ ಶೆಟ್ರ್, ಮೇರ್ ನವಯುಗ ಹೊನ್ನಯ್ಯ ಶೆಟ್ರ್ ಪನ್ದೇ ಪುದರಾತಿನಾರ್. ಮೇರೇ ಈ ನವಯುಗ ಪತ್ರಿಕೆಡ್ ಕಡೀರಾದ್ ತುಳು ಸಂಚಿಕೆ ಸುರು ಮಲ್ತಿನಾರ್. 1936 ನೇ ಅಕ್ಟೋಬರ್ 1 ತಾನಿ, ತುಳು ಭಾಷೆದ ಪ್ರಚಾರ ಎಚ್ಚ ಆವೊಡು, ತುಳುವೆರೇಗ್ ತುಳು ಭಾಷೆಗ್ ಪ್ರಚಾರೊದ ಅವಶ್ಯಕತೆ ತೆರಿಯೊಡು, ಸ್ವಭಾಷೆದ ಮಿತ್ತ್ ಅಭಿಮಾನ ಪುಟ್ಟೊಡು ಪನ್ಪಿ ದಿಟ್ಟಿಡ್ ತುಳು ಸಂಚಿಕೆ ಸುರು ಮಲ್ತ್ದ್ ಅವೆಟ್ ತುಳು ಕಬಿತೆ, ಕತೆಕುಲು, ತುಳುನಾಡ್, ತುಳುವ ಸಂಸ್ಕೃತಿ, ತುಳು ಭಾಷೆದ ಬೇತೆ ಬೇತೆ ವಿಷಯೊಲೆನ್ ಪ್ರಕಟ ಮಲ್ಪೆರ ಪತ್ಯೆರ್.
ಉಂದು ಸುರು ಆದ್ 34 ವರ್ಸ ಕರೀದ್ 1970 ನೇ ಅಕ್ಟೋಬರ್ 1 ತಾನಿ ಕಡೀರ ಸಂಪೂರ್ಣ ತುಳು ಪತ್ರಿಕೆ (ಮಾಸಿಕ) ‘ತುಳುವ ಸಿರಿ’ ನ್ ತನ್ನಾಲ್ಮೆ ಪೊರ್ಮ್ಬಾಟಗಾರೆ ಅಮ್ಮೆಂಬಳ ಬಾಲಪ್ಪೆರ್ ಸುರು ಮಲ್ತೆರ್.
ಇಂಚ ಕಾಕತಾಳೀಯೊನಾ, ಯೋಜನೆ ಪಾಡ್ದಾ ದಾದನಾ ತುಳು ಪತ್ರಿಕಾರಂಗೊಡು ಕಡೀರ ಪನ್ಪಿನ ರಡ್ಡ್ ವಿಷಯೊಲು ಅಕ್ಟೋಬರ್ 1 ಕ್ ಸುರು ಆತ. ಅಂಚಾದ್ ಈ ದಿನೊನು ‘ತುಳು ಪತ್ರಿಕಾ ದಿನೊ’ ಪನ್ದ್ ಆಚರಿಪುನವು ಸಮಂಜಸ ಪನ್ದ್ ತೋಜುಂಡು ಪನ್ಪಿನ ತುಳು ಅಭಿಮಾನಿಲೆನ ಅಭಿಪ್ರಾಯ.
ತುಳುವೆರೆಡ ಕಮ್ಮಿ ಆವೊಂದುಪ್ಪುನ ಸ್ವಭಾಷಾ ಅಭಿಮಾನೊನು ಕುಡ ಲಕ್ಕಾಯೆರ ಇಂಚಿನ ದಿನ ಕರಿಪುನ ಸಕಾಯ ಆವು.