Last updated on October 9th, 2025 at 11:59 am
ಉಬಾರ್, ಅ. 09: ಕಾಸ್ದ ವಿವಾದೊಗು ಸಂಬಂಧಿತ್ದ್ ಉಬಾರ್ದ ಜವನನ್ ಒರಿಯನ್ ಮೂಜಿ ತಿಂಗೊಲು ಅಕ್ರಮವಾದ್ ಪತ್ತ್ರ್ದ್ ಪಾಡ್ದ್, ದಿನೋಲಾ ದೈಹಿಕ ಬೊಕ್ಕ ಮಾನಸಿಕ ಹಿಂಸೆ ಕೊರೊಂದಿತ್ತಿನ ಶಾಕಿಂಗ್ ನಡಕೆ ಬೆಂಗಳೂರ್ಡ್ ನಡತ್ದ್ಂಡ್. ದೇವನಹಳ್ಳಿ ಪೊಲೀಸೆರ್ ತಾಪುರ್ತೋಪು ಕಾರ್ಯಾಚರಣೆ ಮಲ್ತ್ದ್ ಮೂವೆರ್ ಆರೋಪಿಲೆನ್ ಪತ್ತ್ದಿತ್ತ್ದ್, ಕುಡೊರಿಯಗ್ ಬೇಪು ಪಾಡ್ದೆರ್. ಈ ನಡಕೆ ರಾಜಧಾನಿರ್ದ್ ಉಬಾರ್ ಮುಟ್ಟಲಾ ಭಾರೀ ಸಂಚಲನ ಉಂಡು ಮಲ್ದ್ಂಡ್.
ದಾದ ಉಂದು ಪ್ರಕರಣ?
ಬೆಂಗಳೂರ್ದ ಪ್ರೈವೇಟ್ ಸಂಸ್ಥೆ ಒಂಜೆಟ್ ಚೀಫ್ ಫೈನಾನ್ಸಿಂಗ್ ಆಫೀಸರ್ ಆದ್ ಬೇಲೆ ಮಲ್ತೊಂದಿತ್ತಿನ ಉಬಾರ್ ಮಠ ನಿವಾಸಿ, ಸಫಾ ನಗರೊದ ಮುಹಮ್ಮದ್ ಮುಸ್ತಫಾ (27) ಸಂತ್ರಸ್ತೆ ಜವನೆ. ಆರ್ ಪೊಲೀಸೆರೆಡ ಬರೆಪಾದಿನ ಒಯಿಲ್ಡ್, ಎನ್ನ ದೋಸ್ತಿ ಮುಹಮ್ಮದ್ ರಾಜಿನ ಓಟ್ಟುಗು ಇಂದಿರಾನಗರೊದ ಕೈತಲ್ ಇತ್ತೆ. ಜೂನ್ 25 ತಾನಿ ಅಡೆ ಬತ್ತಿನ ಕಾರ್ತಿಕ್ ಪನ್ಪಿನಾಯನ ಒಟ್ಟುಗು ರಾಜಿ ಎಂಕ್ ಬೇಲೆ ಉಂಡು ಪನ್ಡ್ದ್ ಪೋದಿತ್ತೆ ರಡ್ಡ್ ದಿನ ಆಂಡಲಾ ರಾಜಿ ಪಿರ ಬತ್ತಿಜ್ಜಂಡ್.
ಮನದಾನಿ ಕಾರ್ತಿಕ್ ಬೊಕ್ಕ ಲಕ್ಷ್ಮಣ್ ‘ರಾಜಿ ದಾನೆ ಬತ್ತ್ದಿಜೆ?’ ಪನ್ದ್ ಎನಡ ಪ್ರಶ್ನೆ ಮಲ್ತ್ದ್ , ‘ಈ ಎಂಕ್ಲೆನೊಟ್ಟುಗು ಬಲ’ ಪನ್ದ್ ಒತ್ತಾಯೊಡು ಕಾರ್ಡ್ ಲೆತೊಂದು ಪೋತೆರ್. ಅಲ್ಪರ್ದ್ ದೇವನಹಳ್ಳಿಗ್ ಎನನ್ ಲೆತೊಂದು ಪೋದು, ಒಂಜಿ ಫೈನಾನ್ಸ್ ಕಂಪೆನಿಡ್ ಪತ್ತ್ರ್ದ್ ಪಾಡ್ದೆರ್ ಪನ್ದ್ ಬರೆತೆರ್
ಮೂಜಿ ತಿಂಗೊಲ್ದ ನರಕ:
ಅಡೆಗ್ ಅಜಯ್ ಪನ್ಪಿನಾಯೆ ಬತ್ತ್ದ್, “ನಿನ್ನ ದೋಸ್ತಿ ರಾಜಿ ಎನರ್ದ್ 6 ಲಕ್ಷ ರೂ. ಕಡ ಗೆತೊಂದೆ. ಅವೆನ್ ಪಿರ ಕೊರಂದೆ ನಿನನ್ ಬುಡ್ಪುಜಿ” ಪನ್ದ್ ದೈಹಿಕವಾದ್ ಹಲ್ಲೆ ಮಲ್ತ್ದ್, ಕೆರ್ಪೆ ಪನ್ದ್ ಪೋಡಿಕಟ್ಟಾದೆ. ಎಂಕ್ಲಾ ಈ ಕಾಸ್ಗ್ಲಾ ದಾಲಾ ಸಂಬಂಧ ಇಜ್ಜಿ ಪನ್ದ್ ಮುಸ್ತಫೆ ಮುರಿಯ ದೀಂಡಲಾ, ಆರೋಪಿಲು ಕೇನ್ದ್ಜೆರ್.
ಮುಸ್ತಫಾನ್ ಅದೆಟ್ ಪತ್ತ್ರ್ದ್ ಪಾಡ್ದಿನ ಆರೋಪಿಲು, ದಿನೋಲಾ ದೈಹಿಕ ಬೊಕ್ಕ ಮಾನಸಿಕ ಹಿಂಸೆ ಕೊರ್ತೆರ್. ಈ ಬೇಲೆಡ್ ಜೀವನ್ ಪನ್ಪಿನಾಯೆಲಾ ಇತ್ತೆ ಪನ್ದ್ ಮುಸ್ತಫೆ ತನ್ನ ಒಯಿಲ್ಡ್ ತೆರಿಪಾದೆರ್. ಜೂನ್ 25ರ್ದ್ ಅಕ್ಟೋಬರ್ 5ಮುಟ್ಟ 3 ತಿಂಗೊಲುರ್ದ್ಲಾ ಎಚ್ಚ ಕಾಲ ಮುಸ್ತಫೆ ಆರೋಪಿಲೆನ ವಶೊಟೇ ಬೇನೆ ತಿನ್ತೆರ್.
ಅಕ್ಟೋಬರ್ 5ತ ರಾತ್ರೆ 8 ಗಂಟೆಗ್ ಆರೋಪಿಲು ಮುಸ್ತಫಾಗ್ ‘ಡೆಡ್ಲೈನ್’ ಕೊರ್ದು, “ಕಾಸ್ ಬತ್ತಿಜಿಂಡ ನಿನನ್ ಕೆರ್ಪ” ಪನ್ದ್ ಪೋಡಿಕಟ್ಟಾದೆರ್. ಈ ವಿಷಯ ಎಂಚನಾ ಮುಸ್ತಫಾನ ಇಲ್ಲದಕ್ಲೆಗ್ ತೆರಿದ್ ಬೈದ್ಂಡ್. ಅಕುಲು ಅಪಗನೇ ಪೊಲೀಸೆರೆ ಸಕಾಯೊಡು, ಮುಸ್ತಫಾನ್ ಆರೋಪಿಲೆನ ವಶೊರ್ದು ಬುಡ್ಪಾದೆರ್.
ಮುಹಮ್ಮದ್ ಮುಸ್ತಫಾ ಬರೆಪಾದಿನ ಒಯಿಲ್ದ ಆಧಾರೊಡು, ದೇವನಹಳ್ಳಿ ಸ್ಟೇಷನ್ ಪೊಲೀಸೆರ್ ಬಿ.ಎನ್.ಎಸ್. ಸೆಕ್ಷನ್ 118(1), 127(4), 140(2), 351(2), 352, 3(5) ಅಡಿಟ್ ಪ್ರಕರಣ ದಾಕಲ್ತೊಂದೆರ್. ಅಜಯ್, ಕಾರ್ತಿಕ್ ಬೊಕ್ಕ ಜೀವನ್ನ್ ಅರೆಸ್ಟ್ ಮಲ್ತ್ದೆರ್. ನಾಲನೇ ಆರೋಪಿ ಲಕ್ಷ್ಮಣಗ್ ಬೋಡಾದ್ ನಾಡೊಂದುಲ್ಲೆರ್.
ಕಡತ ವಿಷಯೊಡು ಅಮಾಯಕೆ ಜವನನ್ ಕಿಡ್ನಾಪ್ ಮಲ್ತ್ದ್, ಮೂಜಿ ತಿಂಗೊಲು ಪತ್ತ್ರ್ದ್ ಪಾಡ್ದ್ ಹಲ್ಲೆ ಮಲ್ತಿನ ಈ ಪ್ರಕರಣ ರಾಜ್ಯೊಡು ಆತಂಕ ಉಂಡು ಮಲ್ದ್ಂಡ್. ಕಾಸ್ದ ವೈವಾಟ್ಡ್ ಬಾರೀ ಜಾಗ್ರ್ತೆ ಮಲ್ತೊನೊಡು ಪನ್ದ್ ಈ ನಡಕೆ ತೂಪಾವುಂಡು.