Last updated on October 10th, 2025 at 09:31 am
ಮುಂಬೈ, ಅ. 09: ಬೇಲೆ ಆವೊಂದಿತ್ತಿನ ಕಟ್ವಾನೊರ್ದು ಸಿಮೆಂಟ್ ಇಟ್ಟಿಗೆ ಒಂಜಿ, ತರೆತ ಮಿತ್ತ್ ಬೂರಿನೆರ್ದಾವರ ಕುಡ್ಲ ಮೂಲೊದ ಜವನ್ದಿ ಒರ್ತಿ ತೀರ್ದಿನ ನಡಕೆ ಮುಂಬೈದ ಜೋಗೇಶ್ವರಿ ಪೂರ್ವದ ಠಾಕೂರ್ ಸಾದಿದ ಕೈತಲ್ ನಡತ್ದ್ಂಡ್. ತೀರ್ದಿನಾರೆನ್ ಕಿನ್ನಿಗೋಳಿ ಮೂಲೊದ ಇತ್ತೆ ಮುಂಬೈಡ್ ಬ್ಯಾಂಕ್ಡ್ ಬೇಲೆ ಮಲ್ತೊಂದಿತ್ತಿನ 22 ವರ್ಸ ಪ್ರಾಯೊದ ಸಂಸ್ಕೃತಿ ಅಮೀನ್ ಪನ್ದ್ ಗುರ್ತ ಪತ್ತ್ದೆರ್.
ಸಂಸ್ಕೃತಿ ಅಮೀನ್ ಮುಂಬೈದ ಕೋಟ್ಯಾನ್ ಕ್ಯಾಟರರ್ಸ್ದ ದನಿ ಅನಿಲ್ ಬೊಕ್ಕ ಪದ್ಮಾವತಿ ಅಮೀನ್ ದಂಪತಿಲೆನ ಒರ್ತಿಯೇ ಮಗಲ್. ಸಂಸ್ಕೃತಿ ಏಪೊಲ್ದ ಲೆಕ ಕಾಂಡೆ 9.30 ತ ಅಂದಾಜಿಗ್ ಬೇಲೆಗ್ ಪೋಯೆರ ಇಲ್ಲರ್ದ್ ಪಿದಡ್ದಿತ್ತೆರ್. ಆರ್ ತನ್ನ ಇಲ್ಲರ್ದ್ ಒಂತೆ ಮೀಟರ್ ದೂರೊಡು ನಡತೊಂದು ಪೋವೊಂದುಪ್ಪುನಗ ಕೈತಲ್ದ ನಿರ್ಮಾಣ ಹಂತೊದ ಕಟ್ವಾನೊರ್ದು ಸಿಮೆಂಟ್ ಇಟ್ಟಿಗೆ ಆರೆನ ತರೆತ ಮಿತ್ತ್ ಬೂರ್ದ್ಂಡ್. ಗಾತಿದ ಗಡಿ ಆದ್ ನೆತ್ತೆರ್ದ ಮಡುಟು ಬೂರ್ದಿತ್ತಿನ ಆರೆನ್ ಆರೆನ ಅಮ್ಮೆರ್ ಅನಿಲ್ ಅಪಗನೇ ಮುಟ್ಟದ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಅಡೆ ಎತ್ತೆರ ದುಂಬೇ ಸಂಸ್ಕೃತಿ ತೀರ್ದಿತ್ತೆರ್.
ಶದ್ದಾ ಲೈಫ್ ಡೆವಲಪರ್ಸ್ ಪನ್ಪಿ ಕಂಪೆನಿ ಶಿವಕುಂಜ್ದ ಈ ಕಟ್ವಾನೊದ ಬೇಲೆ ಮಲ್ತೊಂದಿತ್ತ್ದ್, ನಿರೆಕರೆತಕ್ಲೆನ ಪ್ರಕಾರ ಈ ನಡಕೆಗ್ ದುಂಬುಲಾ ಪಾಕ ಸರ್ತಿ ಕಟ್ವಾನೊರ್ದು ಕಲ್ಲ್ಲ್ ಬೂರೊಂದಿತ್ತಗೆ, ಆಂಡ ಇದಮುಟ್ಟ ಒವ್ವೇ ಪಡಾಯಿ ಆದಿಜ್ಜಂಡ್, ಕಟ್ವಾನೊದ ಬೇಲೆದ ಪೊರ್ತುಡು ಒವ್ವೇ ಸೇಫ್ಟಿ ಮೆಷರ್ಮೆಂಟ್ಸ್ ಅಕುಲು ಗೆತೊಂದಿಜೆರ್ ಪನ್ದ್ ನಿರೆಕರೆತಕುಲು ಆರೋಪ ಮಲ್ತ್ದೆರ್.