Last updated on October 10th, 2025 at 04:08 pm
ಕುಡ್ಲ, ಅ.10: ಕೇಂದ್ರ ಸರ್ಕಾರ ನಿಷೇಧ ಮಲ್ದಿನ ಫಿ.ಎಫ್.ಐ (PFI) ಸಂಘಟನೆದ ಪರವಾದ್ ಸಾಮಾಜಿಕ ಬಲೆತ್ತಾನೊಡು ಪ್ರಚಾರ ಮಲ್ತಿತ್ತಿನ ಆರೋಪಡ್ ಕಡಬ ತಾಲೂಕ್ ರಾಮಕುಂಜ ಗ್ರಾಮ ನಿವಾಸಿ 55 ವರ್ಸ ಪ್ರಾಯೊದ ಸೈಯ್ಯದ್ ಇಬ್ರಾಹಿಂ ತಂಙಳ್ ನ್ ಬಡಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ದ ಪೊಲೀಸೆರ್ ಕೋಡೆ, ಗುರುವಾರ (ಅ.9) ವಶೊಕು ಗೆತೊಂದೆರ್. ಈ ಪ್ರಕರಣೊಗು ಸಂಬಂಧಿತ್ದ್ ಪಿ.ಎಸ್.ಐ ಸಂದಾದಿನ ಒಯಿಲ್ದ ಆಧಾರೊಡು ಬಡಕಾಯಿ ಕುಡ್ಲ ಪೊಲೀಸ್ ಸ್ಟೇಷನ್ಡ್ ಅ.ಕ್ರ.113/2025 U/s 10 (a), (i), 13, 18 UAPA Act ದ ಪ್ರಕಾರ ಪ್ರಕರಣ ದಾಕಲಾದಿತ್ತ್ದ್, ಜಡ್ತೆ ನಡತೊಂದುಂಡು.
ಆರೋಪಿ ಇಬ್ರಾಹಿಂ ತಂಙಳ್ ನ್ ಕುಡ್ಲ ಪೇಂಟೆದ ಉರ್ವ ಸ್ಟೋರ್ ಕೈತಲ್ರ್ದ್ ವಶೊಕು ಗೆತೊಂದೆರ್. ಆಯನ ಮೊಬೈಲ್ ಫೋನ್ ನ್ ಜಡ್ತೆಗ್ ಕಡಪುಡ್ದೆರ್. ಇನಿ (ಅ.10) ಆರೋಪಿನ್ ಬೆಂಗಳೂರ್ದ 49ನೇ ಎಚ್ಚಿಗೆದ ಸಿವಿಲ್ ಬೊಕ್ಕ ಸತ್ರ ನ್ಯಾಯಂತಡೆ (CCH-50) ಬೊಕ್ಕ NIA ಪ್ರಕರಣೊಲೆನ ವಿಶೇಷ ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತ್ದ್, ನ್ಯಾಯಂತಡೆ ಆಯನ್ ಅಕ್ಟೋಬರ್ 24 ಮುಟ್ಟ ನ್ಯಾಯಾಂಗ ವಶೊಕು ಕೊರ್ತುಂಡು.
ದಾದ ಉಂದು ಪ್ರಕರಣ:
2022ತ ಸೆಪ್ಟೆಂಬರ್ 28ದಾನಿ PFI ಸಂಘಟನೆನ್ ಕೇಂದ್ರ ಸರ್ಕಾರ ಕಾನೂನುಬಾಹಿರ ಸಂಘಟನೆ ಪನ್ದ್ ಘೋಷಣೆ ಮಲ್ತ್ದ್ ಬ್ಯಾನ್ ಮಲ್ತಿತ್ತ್ಂಡ್. ಈ ನಿಷೇಧೊದ ನಡುಟುಲಾ, ಆರೋಪಿ ಇಬ್ರಾಹಿಂ ತಂಙಳ್ ಅಕ್ಟೋಬರ್ 9, 2025 ತಾನಿ ವಾಟ್ಸ್ಆಪ್ ಗ್ರೂಪ್ಡ್ PFI ಸಂಘಟನೆದ ಪರವಾದ್ ಪೋಸ್ಟ್ ಪ್ರಕಟ ಮಲ್ತ್ದ್, ಸ್ವಯಂಪ್ರೇರಿತೆ ಆದ್ ಪ್ರಚಾರ ಮಲ್ತ್ದ್ ಈ ಮುಕೇನ ಅಪರಾಧಿಕ ಬಲ ಪ್ರದರ್ಶನ ಮಲ್ತ್ದ್ ಸಾರ್ವಜನಿಕೆರೆನ್ ಪೋಡಿಕಟ್ಟಾದೆ ಪನ್ದ್ ಪೊಲೀಸ್ ಇನ್ಸ್ಪೆಕ್ಟರ್ (PSI) ಸಂದಾದಿನ ಒಯಿಲ್ದ ಆಧಾರೊಡು ಪ್ರಕರಣ ದಾಕಲಾತ್ಂಡ್.
ಪೊಲೀಸ್ ಇಲಾಖೆದ ಪ್ರಕಾರ, ಈ ನಡಕೆದ ಜಡ್ತೆಡ್ ಆರೋಪಿಯನ ಮೊಬೈಲ್ ಫೋನ್ಡ್ ಎಚ್ಚಿನ ಪುರಾಪುಲು ತಿಕ್ಕು ಪನ್ದ್ ಅಂದಾಜಿ ಮಲ್ದೆರ್. PFI ಸಂಘಟನೆದ ನಿಷೇಧೊರ್ದು ಬೊಕ್ಕ ಮಂಗಳೂರು ಜಿಲ್ಲೆಡ್ ಇಂಚಿನ ಪ್ರಚಾರೊಲೆನ ವಿರುದ್ಧ ಗಾತಿದ ಕ್ರಮ ಗೆತೊನೊಂದುಲ್ಲೆರ್.