Last updated on October 13th, 2025 at 02:09 pm
ಕೊಲ್ಲಂ, ಅ. 13: ಗೂವೆಲ್ಗ್ ಲಾಗಿನ ಪೊಂಜೊವುನು ಬದ್ಕಾವುನ ಪೊರ್ತುಡು, ಗೂವೆಲ್ಗ್ ಲಾಗಿನ ಪೊಂಜೊವು, ಅಗ್ನಿಶಾಮಕದಳೊದ ಸಿಬ್ಬಂದಿ ಸೇರ್ದ್ ಮೂವೆರ್ ತೀರ್ದಿನ ನಡಕೆ ಕೇರಳದ ಕೊಲ್ಲಂದ ನೆಡುವತೂರುಡು ನಡತ್ದ್ಂಡ್. ತೀರ್ದಿನಕ್ಲೆನ್ ಅಗ್ನಿಶಾಮಕದಳಒದ ಸಿಬ್ಬಂದಿ ಸೋನಿ ಎಸ್. ಕುಮಾರ್ (36), ಗೂವೆಲ್ಗ್ ಲಾಗಿನ ಪೊಂಜೊವು ಅರ್ಚನಾ (33) ಬೊಕ್ಕ ಪೊಂಜೊವುನ ದೋಸ್ತಿ ಶಿವಕೃಷ್ಣನ್ (22) ಪನ್ದ್ ಗುರ್ತ ಪತ್ತ್ದೆರ್.
ಮಾಧ್ಯಮೊಲೆನ ಒಲವುದ ಪ್ರಕಾರ ಪೊಂಜೊವು ಅರ್ಚನಾ ಬೊಕ್ಕ ಆಲೆನ ದೋಸ್ತಿ ಶಿವಕೃಷ್ಣನ್ನ ನಡುಟು ರಾತ್ರೆ ಲಡಯಿ ಆತ್ಂಡ್. ಈ ಪೊರ್ತುಡು ಅರ್ಚನಾ ಸೀದಾ ಪೋದು ಇಲ್ಲ ಮುಟ್ಟದ ಗೂವೆಲ್ಗ್ ಲಾಗಿದಲ್. ನಡಕೆದ ಬಗೆಟ್ ಅಗ್ನಿಶಾಮಕ ದಳೊಕು ಶಿವಕೃಷ್ಣನ್ ಒಲವು ಕೊರ್ತೆರ್. ಅಗ್ನಿಶಾಮಕದಳೊದ ಸಿಬ್ಬಂದಿ ಬನ್ನಗ ಅರ್ಚನಾ ಜೂವೊಡಿತ್ತೆರ್.
ಕಾರ್ಯಾಚರಣೆ ಸುರುಮಲ್ತಿನ ಅಗ್ನಿಶಾಮಕದಳೊತಕುಲು, ಅಕ್ಲೆನ ಸಿಬ್ಬಂದಿ ಸೋನಿನ್, ಪೊಂಜೊವುನ ರಕ್ಷಣೆಗ್ ಗೂವೆಲ್ಗ್ ಜಪ್ಪುಡಾದೆರ್. ಈ ಪೊರ್ತುಡು ಪೊಂಜೊವುನ ದೋಸ್ತಿ ಶಿವಕೃಷ್ಣೆ ಗೂವೆಲ್ದ ಕೈತಲ್ ಉಂತುದಿತ್ತೆರ್, ಈ ಪೊರ್ತುಡು ಅಗ್ನಿಶಾಮಕದಳೊದ ಸಿಬ್ಬಂದಿ ಗೂವೆಲ್ದ ಕುಂದದ ಕೈತಲ್ ಉಂತೊರ್ಚಿ ಪನ್ದ್ ಎಚ್ಚರ್ಗೆ ಕೊರ್ದಿತ್ತೆರ್. ಆಂಡ ಶಿವಕೃಷ್ಣನ್ ಕುಡ್ಚಿದಿತ್ತಿನೆರ್ದಾವರ ಅಕ್ಲೆನ ಪಾತೆರ ಕೇನ್ದಿಜೆ. ಅರ್ಚನಾ ನ್ ಮಿತ್ತ್ ಒಯ್ತೊಂದಿತ್ತಿಲೆಕನೆ ಗೂವೆಲ್ದ ಸುತ್ತ ಗಟನೆದ ಲೆಕ ಕಟ್ಟ್ದಿನ ಬಲ್ಲ್ದ ಮಿತ್ತ್ ಬಲ ಪಾಡಿನೆರ್ದಾವರ ಆ ಬಲ್ಲ್ ಕಡಿದ್ಂಡ್. ಐತ ತಾಂಗ್ಡ್ ಅಲ್ಪನೇ ಉಂತುದಿತ್ತಿನ ಶಿವಕೃಷ್ಣನ್ಲಾ ಗೂವೆಲ್ದುಲಯಿ ಬೂರ್ದೆ. ಮೂವೆರ್ ಒಟ್ಟುಗು ಗೂವೆಲ್ದುಲಯಿ ಬೂರ್ದಿತ್ತ್ದ್, ಒಟ್ಟುಗು ರಾಟೆಗ್ ಬೋಡಾದ್ ಕಟ್ಟ್ದಿತ್ತಿನ ಇಟ್ಟಿಗೆದ ಕುಂದಲಾ ಗೂವೆಲ್ದುಲಯಿ ಬೂರ್ದುಂಡು. ಉಂದೆರ್ದಾವರ ಮೂವೆರ್ಲಾ ತೀರ್ದೆರ್ ಪನ್ದ್ ತೆರಿದ್ ಬೈದ್ಂಡ್. ಅರ್ಚನಾ ಬೊಕ್ಕ ಶಿವಕೃಷ್ಣನ್ ಒಂತೆ ಸಮೆರ್ದಿಂಚಿ ಒಟ್ಟುಗೇ ಇತ್ತ್ದ್ ಅಕ್ಲೆನ ನಡುತ ಲಡಯಿಯೇ ಈ ನಡಕೆಗ್ ನೆವನ ಪನ್ದ್ ನಿರೆಕರೆತಕುಲು ಪನೊಂದುಲ್ಲೆರ್.