Last updated on October 14th, 2025 at 01:19 pm
ಕುಡ್ಲ, ಅ. 14: ಫಾರಿನ್ ಕರೆನ್ಸಿ ತಿಕ್ಕುಂಡು ಪನ್ದ್ ನಂಬುದು ಪೊಂಜೊವು ಒರ್ತಿ 79 ಲಕ್ಷ ರೂಪಾಯಿ ಕಾಸ್ ಕಲೆವೊಂದಿನ ನಡಕೆ ಕುಡ್ಲಡ್ ನಡತ್ದ್ಂಡ್.
ಕಾಸ್ ಕಲೆವೊಂದಿನ ಪೊಂಜೊವುಗು, ಇಲ್ಲಗ್ ಬೇಲೆಗ್ ಬತ್ತಿತ್ತಿನ ಕುಡೊರ್ತಿ ಪೊಂಜೊವು ಒರ್ತಿರ್ದ್ ಯು.ಕೆ (ಲಂಡನ್) ಮೂಲೊದ ಮ್ಯಾಕ್ಸ್ ಅಲೆಂಗ್ಸಾಂಡರ್ ಪನ್ಪಿನಾಯನ ಆನ್ಲೈನ್ಡ್ ಫೇಸ್ಬುಕ್ ಮುಕೇನ ಗುರ್ತ ಆತ್ಂಡ್. ಬೊಕ್ಕ ಆ ಪೊಂಜೊವು ಬೊಕ್ಕ ಈ ಲಂಡನ್ದಾಯೆ ವಾಟ್ಸ್ಆಪ್ ಡ್ ಪಾತೆರ್ಯೆರ ಪತ್ತ್ದೆರ್. ಈ ಪೊರ್ತುಡು ಆಯೆ ಪೊಂಜೊವುಗು ಫಾರಿನ್ ಪೌಂಡ್ಸ್ ಲೆನ್ ಕೊರ್ಪೆ ಪನ್ದ್ ಪನ್ದಿತ್ತೆ. ಆತೇ ಅತ್ತಂದೆ ತೇದಿ 21-08-2025 ತಾನಿ ಗುರ್ತದಾಂತಿನ ಆಫ್ರಿಕನ್ ಒರಿಜಿನ್ ಆಂಜೊವು ಒರಿ ಪೊಂಜೊವುನ ಇಲ್ಲಗ್ ಬತ್ತ್ದ್ ತನ್ನ ಪುದರ್ ಸ್ಟೀವ್ ಪನ್ದ್ ಗುರ್ತ ಪನ್ಡ್ದ್, ಆಯೆ ಕನತಿನ ಕಿಞ್ಞ ಪೆಟ್ಯೆಡ್ ವಿದೇಶಿ ಡಾಲರ್ ಲು ಇಪ್ಪುನೆನ್ ತೋಜಾದೆ. ಬೊಕ್ಕ ಆಯೆ ಆ ಬಾಕ್ಸ್ನ್ ಪಿರ್ಯಾದಿದಾರೆದಿ ಪೊಂಜೊವುಗು ಕೊರ್ದು ಪೋತೆ.
ಉಂದೆನ್ ಮಾತಾ ಸತ್ಯ ಪನ್ದ್ ಎನ್ನ್ದ್ ತನ್ನ ಗುರ್ತದ ನೀರ್ಮಾರ್ಗ ಮೂಲೊದ ಕುಡೊರ್ತಿ ಪೊಂಜೊವುಗು ಮೇರ್ ಈ ವಿಚಾರ ತೆರಿಪಾದೆರ್. ಆರ್ಲಾ ವಿದೇಶಿ ಪೌಂಡ್ಸ್ ಆಸೆಗ್ ಸುಮಾರ್ 25 ಲಕ್ಷ ಕಾಸ್ನ್ ದೂರುದಾರೆದಿ ಪೊಂಜೊವುನ ಮುಕೇನ ಕಡಪುಡ್ದೆರ್. ಆತೇ ಅತ್ತಂದೆ ಕುಡೊರ್ತಿ ಪೊಂಜೊವುಲಾ 2 ಲಕ್ಷ ಕಾಸ್ ಕೊರ್ತೆರ್.
ಈ ಕಾಸ್ ಸೇರ್ದ್ ದೂರುದಾರೆದಿ ಪೊಂಜೊವು ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ ಬ್ಯಾಂಕ್ ರ್ದ್ ತೇದಿ:02-04-2025 ರ್ದ್ 14-08-2025 ಮುಟ್ಟ ಆಯೆ ಕೊರ್ತಿನ ಬೇತೆ ಬೇತೆ ಬ್ಯಾಂಕ್ ಅಕೌಂಟ್ಲೆಗ್ ಕಾಸ್ ಕಡಪುಡ್ದೆರ್. ಬೊಕ್ಕದ ದಿನೊಟು ಆಯೆ ನನಲಾ ಎಚ್ಚಿಗೆ ಕಾಸ್ ಕಡಪುಡ್ಯೆರೆ ಪಿರ್ಯಾದಿದಾರೆರೆನ್ ಒತ್ತಾಯ ಮಲ್ಪುನಗ ಡೌಟ್ ಬತ್ತ್ದ್ ತನ್ನ ಜೋಕುಲೆಡ ವಿಚಾರಿಪುನಗ ಪಿರ್ಯಾದಿದಾರೆರ್ ಮಂಗೆ ಆತಿನ ವಿಚಾರ ತೆರಿದ್ಂಡ್.
ಈ ರೀತಿ ಏರೋ ಗುರ್ತದಾಂತಿನಾಯೆ ಆನ್ಲೈನ್ಡ್ ವಿದೇಶಿ ಪೌಂಡ್ಸ್ ಲೆನ್ ಕೊರ್ಪೆ ಪನ್ದ್ ನಂಬಾದ್ ಆನ್ಲೈನ್ಡೇ ಒಟ್ಟು 79,19,850/- ರೂ ಕಡಪುಡೊಂದು ಆನ್ಲೈನ್ ದಗೆ ಮಲ್ತಿತ್ತ್ದ್, ಅಕ್ಲೆನ ಮಿತ್ತ್ ಕಾನೂನು ಕ್ರಮ ಗೆತೊನೊಡು ಪನ್ದ್ ಒಯಿಲ್ ಬರೆಪಾದೆರ್.