Last updated on October 17th, 2025 at 09:31 am
ಕಾರವಾರ, ಅ. 17: ಮೀನ್ ಪತ್ತೆರೆ ಪೋದಿಪ್ಪುನಗ ಒಂಜಿ ಮೀನ್ ಬಂಜಿಗ್ ಕಂತಿನೆರ್ದಾವರ ಜವನೆ ಒರಿ ತೀರ್ದಿನ ನಡಕೆ ಕಾರವಾರಡ್ ನಡತ್ದ್ಂಡ್. ಆಂಡ ಡಾಕ್ಟರ್ನ ನಾಮಾಸ್ರ್ದಾವರ ಜೂವ ಪೋತುಂಡು ಪನ್ದ್ ಇಲ್ಲದಕುಲು ಬೊಕ್ಕ ಮುಟ್ಟದ ಕಡಲಾಯೆರ್ ಆಕ್ರೋಶ ತೂಪಾದೆರ್. ತೀರ್ದಿನಾರೆನ್ ಕಾರವಾರ ತಾಲೂಕ್ದ ಮಾಜಾಳಿ ಗ್ರಾಮೊದ ದಾಂಡೇಭಾಗ ನಿವಾಸಿ 24 ವರ್ಸ ಪ್ರಾಯೊದ ಅಕ್ಷಯ ಅನಿಲ ಮಾಜಾಳಿಕರ್ ಪನ್ದ್ ಗುರ್ತ ಪತ್ತ್ದೆರ್.
ಅಕ್ಷಯೆ ಅಂಗಾರೆ ಓಡಡ್ ಮೀನ್ ಪತ್ತೆರೆ ಪೋದಿಪ್ಪುನಗ ಈ ನಡಕೆ ನಡತ್ದ್ಂಡ್. ಮೀನ್ ಪತ್ತೊಂದುಪ್ಪುನಗ ನೀರ್ರ್ದ್ ಸುಮಾರ್ 8 ರ್ದ್ 10 ಇಂಚ್ ಉದ್ದೊದ ಒಂಜಿ ಮೀನ್ ಒರರ್ದ್ ಒರಾನೆ ಓಡದುಲಯಿ ಲಾಗಿದ್ಂಡ್. ಈ ಮೀನ್ ಸೀದಾ ಅಕ್ಷಯನ ಬಂಜಿಗ್ ಕಂತ್ದಿತ್ತ್ದ್, ಆಯಗ್ ಗಾತಿದ ಗಡಿಯಾತ್ಂಡ್. ಅಪಗನೇ ಅಕ್ಷಯನ್ ಕಾರವಾರದ ಕ್ರಿಮ್ಸ್ ಆಸ್ಪತ್ರೆಗ್ ದಾಕಲ್ತ್ದಿತ್ತೆರ್.
ಆಸ್ಪತ್ರೆಡ್ ಗಡಿಕ್ ಕಟ್ಟ ಪಾಡ್ದ್, ಡಾಕ್ಟರ್ ಡಿಸ್ಚಾರ್ಜ್ ಮಲ್ತಿತ್ತೆರ್. ಆಂಡ, ಬೇನೆ ಕಮ್ಮಿ ಆವಂದಿನೆರ್ದಾವರ ಅಕ್ಷಯೆ ಕುಡ ಆಸ್ಪತ್ರೆಗ್ ದಾಕಲಾದಿತ್ತೆ. ಆಂಡ, ಗುರುವಾರ ಪುಲ್ಯ ಸುಮಾರ್ 5 ಗಂಟೆದ ಅಂದಾಜಿಗ್ ಅಕ್ಷಯೆ ಆಸ್ಪತ್ರೆಡೇ ತೀರ್ದೆ. ಮೀನ್ದ ಮುಸುಂಟು ಕಂತಿನೆರ್ದಾವರ ಅಕ್ಷಯನ ಪೊಟ್ಟೆಗ್ ಗಾತಿದ ಗಡಿ ಆತಿನನೇ ತೀರ್ಯೆರ ನೆವನ ಪನ್ದ್ ಅಂದಾಜಿ ಮಲ್ದೆರ್.
ಜವನೆ ತೀರ್ದಿನ ಸುದ್ದಿ ತೆರಿನನೇ ಪಾಕ ಜನ ಕಡಲಾಯೆರ್ ಬೊಕ್ಕ ಬೋಡಾಯಿನಕುಲು ಕ್ರಿಮ್ಸ್ ಆಸ್ಪತ್ರೆ ದಲ್ಪ ಸೇರ್ದ್ ಆಕ್ರೋಶ ತೂಪಾಯೆರ್. “ಡಾಕ್ಟರ್ನ ಗೋಸ್ಮರಿರ್ದಾವರನೇ ಅಕ್ಷಯೆ ತೀರ್ದೆ. ಕಾಲಿ ಕಟ್ಟ ಪಾಡ್ದ್ ಡಿಸ್ಚಾರ್ಜ್ ಮಲ್ದೆರ್. ಸಿಟಿ ಸ್ಕ್ಯಾನ್ ಮಲ್ತ್ದ್ ಮೀನ್ ಪೊಟ್ಟೆಗ್ ಕೊಲ್ತ್ದ್ಂಡ್ ಪನ್ದ್ ನಾಡ್ಪತ್ತುವೆರ್ನ್ಡ ಎನ್ನ ಮಗೆ ಬದ್ಕೆದೆ”. ಪನ್ದ್ ತೀರ್ದಿನ ಜವನನ ಅಮ್ಮೆ ಅನಿಲ್ ಮಾಜಾಳಿಕರ್ ಮೇರ್ ಆರೋಪ ಮಲ್ದೆರ್. ಕೊರೊಡಾಯಿನ ಪೊರ್ತುಡು ಮರ್ದ್ ಕೊರಂದಿನೆಕ್ ಬೈದ್ಯೆರೆ ಮಿತ್ತ ಕಠಿಣ ಕ್ರಮೊಕು ಆರ್ ಆಗ್ರಹ ಮಲ್ದೆರ್.