Last updated on October 17th, 2025 at 08:18 pm
ಕಾರ್ಲ, ಅ. 17: ಕರಿನ ಗುರುವಾರ, ಅಕ್ಟೋಬರ್ 9 ದಾನಿ, ನಿಟ್ಟೆ ಗ್ರಾಮೊದ ಪರಪ್ಪಾಡಿ ನಿವಾಸಿ ಅಭಿಷೇಕ್ ಆಚಾರ್ಯ ಪನ್ಪಿನ 23 ವರ್ಸ ಪ್ರಾಯೊದ ಜಕ್ಕ್ಡ್ ಜವನೆ ಬೊಳ್ಮಣ್ದ ಸೂರಜ್ ಲಾಡ್ಜ್ಡ್ ಬಲ್ಲ್ ಪಾಡೊಂದು ಜೂವ ದೆತ್ತೊಂದೆ. ಒರ ಲವ್ ಫೈಲ್ಯೂರ್, ಕಾಸ್ದ ಪ್ರಾಬ್ಲಮ್ ಪನ್ದ್ ಮಾತಾ ಸುದ್ದಿ ಆಂಡಲಾ, ಅಭಿಷೇಕ್ ಬರೆದ್ ದೀತಿನ ಡೆತ್ನೋಟ್ ಮಾತ್ರ ಬೇತೆನೇ ಕತೆ ಪನೊಂದಿತ್ತ್ಂಡ್, ಜವನೆರೆ ಉಡಲ್ ಝಲ್ಲ್ ಪನ್ಪಿನ ಪೋಡಿಕಟ್ಟಾವುನ ವಿಷಯೊನು ಪನೊಂದಿತ್ತ್ಂಡ್.
ಮೋಕೆದ ಪುದರ್ಡ್ ನಾಲಿ ಕೊಯ್ಪುನ ಕತೆನ್ ಆ ಡೆತ್ನೋಟ್ ಪನೊಂದಿತ್ತ್ಂಡ್. ಎಂಚಿನಕುಲೆಗ್ಲಾ ಒರ ಆ ಡೆತ್ನೋಟ್ ಓದುನಗ ನಮ್ಮ ತುಳುನಾಡ್ಡ್ಲಾ ಇಂಚಿನ ಮಾತಾ ನಡಪುಂಡಾ ಪನ್ದ್ ಎನ್ನು, ಆ ನಮೂನೆದ ವಿಷಯೊಲು ಆ ಡೆತ್ನೋಟ್ಡ್ ಇತ್ತ.
ಅಭಿಷೇಕ್ ಡೆತ್ನೋಟ್ಡ್ ಪುದರ್ ಬರೆತಿನ ನಾಲ್ ಜನತ ಮೊಬೈಲ್ ಸೀಜ್ ಮಲ್ತ್ದ್ ಬೇತೆ ಬೇತೆ ತಾಂತ್ರಿಕ ಆಯಾಮೊಲೆಡ್ ಜಡ್ತೆ ಮಲ್ತೊಂದುಲ್ಲ ಪನ್ದ್ ಪೋಲೀಸೆರ್ ತೆರಿಪಾದೆರ್. ಈ ಜಡ್ತೆ ಏಪ ಕೋಡಿ ಎತ್ತುಂಡು ಪನ್ದ್ ನನನ ಕಾತ್ದ್ ತೂವೊಡಾತೆ.
ಡೆತ್ನೋಟ್ಡ್ ದಾದ ಇತ್ತ್ಂಡ್?
ಸ್ವಾಮಿ ಕೊರಗಜ್ಜ ಪನ್ದ್ ಬರೆದ್ ಡೆತ್ನೋಟ್ ಸುರು ಮಲ್ದಿನ ಅಭಿಷೇಕ್ ಸುರುಟು ತನ್ನ ಬಗೆಟ್ ಬರೆಯೊಂದೆ, ಬೊಕ್ಕ ಸೀದಾ ಎನ್ನ ಸಾವುಗು ಮೊಕುಲು ನೆವನ ಪನ್ದ್ ಲೇಡಿಗೋಷನ್ ವಾರ್ಡ್ ನರ್ಸ್ ನಿರೀಕ್ಷಾ, ಕುಲಶೇಖರ ನಂದಿನಿ ಡೈರಿಡ್ ಇಪ್ಪುನ ಗುರುಪುರ-ಕೈಕಂಬದ ರಾಕೇಶ್, ಕಂಕನಾಡಿದ ರಾಹುಲ್, ಕೈಕಂಬದ ತಸ್ಲಿಂ ಈ ನಾಲ್ ಜನತ ಪುದರ್ ಬರೆತೆರ್.
ಅಂಚೆನೇ ಮೊಕುಲು ಕಾಸ್ಗ್ ಬೋಡಾದ್ ಎಂಕ್ ಮಾನಸಿಕವಾದ್, ದೈಹಿಕವಾದ್ ಮಸ್ತ್ ಬೇನೆ ಮಲ್ತ್ದೆರ್. ಎನನ್ ಕೆರ್ಯೆರ ತೂತೆರ್ ಪನ್ದ್ ಮಾತಾ ಬರೆತೆರ್. ಇಂದೆತ ನಡುಟು ನಿರೀಕ್ಷಾ ಆಸ್ಪತ್ರೆಡ್ ಬೇತೆ ಪೊಣ್ಣುಲು ಕುಂಟು ಮಾಪುನ ಫೋಟೋ, ವೀಡಿಯೋ ಮಲ್ತ್ದ್ ಕಾಸ್ಗ್ ಕೊರೊಂದಿತ್ತಿನ ಆಘಾತಕಾರಿ ಆರೋಪಲಾ ಮಲ್ತ್ದೆರ್. ತನ್ನ ಒಟ್ಟುಗು, ಅಂಚೆನೇ ತನ್ನ ದೋಸ್ತಿನ ಒಟ್ಟುಗು ಅಶ್ಲೀಲ ಫೋಟೋ ದೀವೊಂದು ಕಾಸ್ ಪೀಂಕವೊಂದಿತ್ತಲ್ ಪನ್ದ್ಲಾ ಬರೆತೆರ್. ತನ್ನ ಮೆಗ್ಯನ್ ಕೆರ್ಪ ಪನ್ತಿನ, ತನ್ನ ಅಶ್ಲೀಲ ಫೋಟೋ ಪತೊಂದು ಮಕ್ಕರ್ ಮಲ್ಪುನ, ಮಾತೆರ್ಲಾ ಸೇರೊಂದು ಆಕುನ ಇಂಚ ಪಾಕ ವಿಷಯೊಲೆನ್ ಈ ಡೆತ್ನೋಟ್ಡ್ ಬರೆತೆರ್. ಓದುನಕುಲು ಎಂಚಿನಕುಲಾಂಡಲಾ ಒರ ಕಣ್ಣನೀರ್ ಬರಂದೆ ಉಪ್ಪಂದ್, ಆತ್ ಬೇನೆ ತಿನ್ತಿನೆನ್ ಅಭಿಷೇಕ್ ಬುಡ್ಪಾದ್ ಬುಡ್ಪಾದ್ ಬರೆತೆರ್.
ಅಭಿಷೇಕ್ನ ಇಲ್ಲದಕ್ಲೆನ ಬುಲಿಪುಲಾ ತೂವರೆ ಆಪುಜಿ, ಆರೆನ ಅಮ್ಮೆರ್ ಯಾನೇ ಇದಮುಟ್ಟ ಒಂಜಿ ಪೆಟ್ಟ್ ಆಕ್ದುಪ್ಪಯೆ ಪನ್ದ್ ಪನೊಂದು ಬೂಲ್ತೊಂದಿತ್ತೆರ್. ವಿಶ್ವಕರ್ಮ ಸಮಾಜೊದ ಮಾತೆರ್ಲಾ ಒಟ್ಟಾದ್ ನ್ಯಾಯ ತಿಕ್ಕೊಡೇ ಪನ್ದ್ ಒತ್ತಾಯ ಮಲ್ದೆರ್. ಈ ನಡುಟು ಅಭಿಷೇಕ್ ಬೊಕ್ಕ ನಿರೀಕ್ಷಾನ ಪನ್ಪಿನ ವಾಟ್ಸಾಪ್ ಚಾಟ್ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆದಿತ್ತ್ದ್, ಅವೆಟ್ ಆ ಪೊಣ್ಣು ಪಾತೆರ ಪಾತೆರೊಗು ಪೆದಂಬು ಪಾತೆರೊಂದು, ಈ ಸೈಯೊಡು, ನಿನನ್ ಕೆರ್ಪೆ ಪನ್ದ್ ಪನ್ಪಿನೆನ್ ತೂವೊಲಿ, ಅಂಚೆನೇ ಅಭಿಷೇಕ್ ಆನ್ಲೈನ್ಡ್ ಕಾಸ್ ಕಡಪುಡ್ದಿನವು ಪನ್ದ್ ಪನೊಂದುಪ್ಪುನ ಸ್ಕ್ರೀನ್ಶಾಟ್ಲ್ಲಾ ವೈರಲ್ ಆತ. ಮಾತೆರ್ಲಾ ಈ ಸಾವುಗು ನ್ಯಾಯ ತಿಕ್ಕೊಡು, ಇಂಚಿನ ಬ್ಲ್ಯಾಕ್ಮೇಲ್ ದಂಧೆ ಪೂರಾ ಉಂತೊಡು ಪನ್ದ್ ಒತ್ತಾಯ ಮಲ್ತೊಂದುಲ್ಲೆರ್.