Last updated on October 19th, 2025 at 08:34 am
ಒಡಿಪು, ಅ. 18: ನಿಟ್ಟೆದ ಅಭಿಷೇಕ್ ಆಚಾರ್ಯ ಆತ್ಮಹತ್ಯೆ ಪ್ರಕರಣ ಬೊಕ್ಕ ಡೆತ್ ನೋಟ್ ಬಗೆಟ್ ಒಡಿಪು ಎಸ್ಪಿ ಹರಿರಾಂ ಶಂಕರ್ ಸ್ಪಷ್ಟನೆ ಕೊರ್ದಿತ್ತ್ದ್, ಪ್ರಕರಣೊದ ಜಡ್ತೆ ಎಂಚ ನಡತೊಂದುಂಡು ಪನ್ದ್ ತೆರಿಪಾದೆರ್.
ಬೊಳ್ಮಣ್ದ ಸೂರಜ್ ಕಂಫರ್ಟ್ಸ್ ಲಾಡ್ಜ್ಡ್ 25 ವರ್ಸ ಪ್ರಾಯೊದ ಅಭಿಷೇಕ್ ಪನ್ಪಿನ ಜವನೆ ಆತ್ಮಹತ್ಯೆ ಮಲ್ತೊಂದಿತ್ತೆ. ನಿಟ್ಟೆ ಗ್ರಾಮೊದ ಅಭಿಷೇಕ್, ಲೇಡಿಘೋಶನ್ ಆಸ್ಪತ್ರೆಡ್ ಕೆಎಂಸಿ ಕಾಂಟ್ರಾಕ್ಟ್ ಬೇಸಿಸ್ಡ್ ಬಯೋಮೆಡಿಕಲ್ ಟೆಕ್ನೀಷಿಯನ್ ಆದ್ ಬೇಲೆ ಮಲ್ತೊಂದಿತ್ತೆರ್. ಈ ಆತ್ಮಹತ್ಯೆದ ಪಿರವು ಹನಿಟ್ರ್ಯಾಪ್ ಉಂಡು ಪನ್ದ್ ಸುದ್ದಿ ಇತ್ತ್ಂಡ್.
ಒಡಿಪು ಪೊಲೀಸ್ ವರಿಷ್ಠಾಧಿಕಾರಿಲು ಈ ಬಗೆಟ್ ಮಾಧ್ಯಮೊಲೆಗ್ ಒಲವು ಕೊರ್ತೆರ್. ಸುರುಟು ಉಂದು ಲವ್ ಫೈಲ್ಯೂರ್ ಪ್ರಕರಣ ಪನ್ದ್ ತೋಜಿದ್ ಬತ್ತ್ಂಡಲಾ, ಸೂಸೈಡ್ ನೋಟ್ಡ್ ಇಪ್ಪುನ ವಿಷಯೊಲೆನ ಬಗೆಟ್ ಪತ್ತ ಜಡ್ತೆ ಮಲ್ಪುವ ಅಗತ್ಯ ಉಂಡು ಪನ್ದ್ ತೆರಿಪಾದೆರ್. ತಾಂತ್ರಿಕ ಸಾಕ್ಷ್ಯೊಲೆನ್ ಒಟ್ಟು ಮಲ್ತ್ದ್, ಆತ್ಮಹತ್ಯೆದ ಪಿರವು ಇಪ್ಪುನ ನೈಜತೆನ್ ನಾಡ್ಪತ್ತೆರೆ ತೂವೊಂದುಲ್ಲ. ಇತ್ತೆನೇ ಒವ್ವೇ ತೀರ್ಮಾನೊಗು ಬರ್ಪುಜ, ಆತ್ಮಹತ್ಯೆಗ್ ಪ್ರಚೋದನೆ ಕೊರ್ತಿನಕುಲು ಏರೇ ಇತ್ತ್ಂಡಲಾ ಅಕ್ಲೆನ ಮಿತ್ತ್ ಕಾನೂನು ಕ್ರಮ ಗೆತೊನುವ ಪನ್ದ್ ಪಾತೆರ ಕೊರ್ತೆರ್. ಜಡ್ತೆ ಪಾರದರ್ಶಕವಾದ್ ನಡಪುಂಡು ಪನ್ದ್ ಆರ್ ಪನ್ಡೆರ್.
ಇತ್ತೆ ಪೊಲೀಸೆರ್ ಆತ್ಮಹತ್ಯೆಗ್ ಪ್ರಚೋದನೆ ಕೊರ್ತಿನ ಆರೋಪಡ್ ನಾಲ್ವೆರ್ ಆರೋಪಿಲೆನ ಮಿತ್ತ್ ಎಫ್ಐಆರ್ ದಾಕಲ್ತೊಂದೆರ್. ನಾಲ್ವೆರೆಡ್ ಇತ್ತೆ ಮೂವೆರ್ ಆರೋಪಿಲೆನ್ ಗುರ್ತಪತ್ತ್ದಿತ್ತ್ದ್, ಅಕ್ಲೆನ ಮೊಬೈಲ್ ಫೋನ್ಲೆನ್ ವಶೊಕು ಗೆತೊಂದು ತಾಂತ್ರಿಕ ಪರೀಕ್ಷೆಗ್ ಕಡಪುಡ್ದೆರ್. ತೀರ್ದಿನ ಅಭಿಷೇಕ್ನ ಫೋನ್ ಲಾ ವಶೊಕು ಗೆತೊಂದಿತ್ತ್ದ್, ಅವೆಟುಪ್ಪುನ ಫೋಟೋಲು, ವಿಡಿಯೋಲು ಬೊಕ್ಕ ಮೆಸೇಜ್ಲೆನ್ ಸಾಕ್ಷ್ಯ ಆದ್ ದಾಕಲ್ತೊಂದೆರ್. ಎಚ್ಚಿನ ವೈಜ್ಞಾನಿಕ ಸಾಕ್ಷ್ಯೊಲೆಗ್ ಬೋಡಾದ್ ಫೋನ್ ನ್ ವಿಧಿವಿಜ್ಞಾನ ಪ್ರಯೋಗಾಲಯೊಗು ಕಡಪುಡ್ದೆರ್.
ಪ್ರಕರಣೊದ ಜಡ್ತೆದ ಮುತಾಲಿಕೆನ್ ಕಾರ್ಲದ ಸಕಾಯಕ ಪೊಲೀಸ್ ಅಧೀಕ್ಷಕೆ ಹರ್ಷ ಪ್ರಿಯಂವದ ಮೇರ್ ವಯಿತೊಂದಿತ್ತ್ದ್, ಅಭಿಷೇಕ್ ಪೋಷಕೆರೆನ್ ತಿಕ್ಕ್ದ್ ಎಚ್ಚಿನ ಒಲವು ಒಟ್ಟು ಮಲ್ತ್ದೆರ್. ಸೂಸೈಡ್ ನೋಟ್ಡ್ ಉಲ್ಲೇಖ ಮಲ್ದಿನ ಬೇತೆ ಜನೊಕುಲು, ತೀರ್ದಿನಾಯನೊಟ್ಟುಗು ಬೇಲೆ ಮಲ್ದಿನಕುಲು, ಬೊಕ್ಕ ಆರೋಪಿ ಪೊಣ್ಣನ ದೋಸ್ತಿಯರ್ಲು ಸೇರ್ದ್ ಪಾಕ ಜನೊನು ವಿಚಾರಣೆ ಮಲ್ತೊಂದುಲ್ಲೆರ್. ಈ ಪ್ರಕರಣೊದ ಗಾತಿನ್ ತೆರಿದ್ ವಿಶ್ವಕರ್ಮ ಒಕ್ಕೂಟ, ರಾಜಕೀಯ ಮುಖಂಡೆರ್ ಬೊಕ್ಕ ಬೇತೆ ಸಂಘಟನೆಲು ಸಮಗ್ರ ಜಡ್ತೆಗ್ ಕಾಯೆಸ್ ಮಲ್ತ್ದೆರ್.