Last updated on October 24th, 2025 at 09:16 am
ಕುಡ್ಲ, ಅ. 24: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಕುಡ್ಲದ ಸ್ಪೆಷಲ್ ಆ್ಯಕ್ಷನ್ ಫೋರ್ಸ್ (SAF ) ಸಿಬ್ಬಂದಿಲೆಗ್ 20 ದಿನೊತ ತುಳು ಭಾಷೆ ಕಲ್ಪುನ ಬೊಕ್ಕ ತುಳು ಸಂಸ್ಕೃತಿದ ಪೊಲಬು ಕೊರ್ಪುನ ಕಾರ್ಯಗಾರೊದ ಅಟ್ಟನೆ ಮಲ್ತೊಂದುಂಡು.
ಇಂಚಿಪ ಪೊಸತಾದ್ ಉಂಡು ಮಲ್ದಿನ ಸ್ಪೆಷಲ್ ಆ್ಯಕ್ಷನ್ ಫೋರ್ಸ್ದ ಸಿಬ್ಬಂದಿಲೆಗ್ ತುಳುನಾಡ ಸಂಸ್ಕೃತಿದ ಪೊಲಬು ಕೊರ್ಪಿ ದಿಟ್ಟಿಡ್ ಅಂಚೆನೇ ಭಾಷೆ ಕಲ್ಪಾನುನ ನಿಲೆಟ್ ಪೊಲೀಸ್ ಆಯುಕ್ತೆ ಸುಧೀರ್ ಕುಮಾರ್ ರೆಡ್ಡಿ ಮೇರ್ ವಿಶೇಷ ಉಮೇದ್ ತೋಜಾದಿನೆರ್ದಾವರ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ತುಳು ಭಾಷೆ ಕಲ್ಪಾವುನ ಬೊಕ್ಕ ಸಂಸ್ಕೃತಿದ ಪೊಲಬು ಕೊರ್ಪುನ ಕಾರ್ಯಗಾರೊದ ಅಟ್ಟನೆ ಮಲ್ದ್ಂಡ್. ಇನಿ, ಅಕ್ಟೋಬರ್ 24 ತ ಬಯ್ಯ 4 ಗಂಟೆಗ್ ಪೊಲೀಸ್ ಆಯುಕ್ತೆರೆ ಕಚೇರಿದ ಸಭಾಂಗಣೊಡು ಈ ಕಾರ್ಯಗಾರೊಡು ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರೊದ ಅಧ್ಯಕ್ಷೆ ಸದಾಶಿವ ಉಳ್ಳಾಲ ಮೇರ್ ಉದಿಪನ ಮಲ್ಪೆರಗುಲ್ಲೆರ್.
20 ದಿನೊತ ಈ ಕಾರ್ಯಗಾರೊಡು ತುಳು ಭಾಷೆ ಪಾತೆರುನೆತ ಒಟ್ಟುಗು ತುಳುನಾಡ ಸಂಸ್ಕೃತಿ ಬೊಕ್ಕ ಜಾನಪದ ಕರಿಪುಲೆನ ಅಂಚೆನೇ ವಿಶೇಷತೆಲೆನ ಬಗೆಟ್ ವಿಷಯ ತಜ್ಞೆರ್ ಒಲವು ಕೊರ್ಯೆರ ಉಲ್ಲೆರ್. ದಿನೋಲ ಬಯ್ಯ 5 ರ್ದ್ 6 ಗಂಟೆ ಮುಟ್ಟ ಈ ಕಾರ್ಯಗಾರ ನಡಪುಂಡು.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆ ತಾರಾನಾಥ ಗಟ್ಟಿ ಕಾಪಿಕಾಡ್ ಗುರ್ಕಾರ್ಮೆ ವಯಿತೊನುವೆರ್. ಪೊಲೀಸ್ ಆಯುಕ್ತೆರ್ ಬೊಕ್ಕ SAF ಡಿಐಜಿಪಿ ಸುಧೀರ್ ಕುಮಾರ್ ರೆಡ್ಡಿ, SAF ದ ಪ್ರಭಾರ ಪೊಲೀಸ್ ಉಪಾಧೀಕ್ಷಕೆ ಬೆಳ್ಳಿಯಪ್ಪ ಕೆ.ಯು ಒತ್ತುಪಾಲ್ ಇಪ್ಪುವೆರ್ ಪನ್ದ್ ಅಕಾಡೆಮಿದ ಪ್ರಕಟಣೆ ತೆರಿಪಾದ್ಂಡ್.