Last updated on November 25th, 2025 at 12:03 pm
ಬಜ್ಪೆ, ನ. 25: ಕರಿನ ಐನಾಜಿ ತಿಂಗೊಲುರ್ದಿಂಚಿ ತುಳುನಾಡ್ಡ್ ದಾಲ ಕೋಮು/ಕಡ್ಪುನ/ಕೆರ್ಪುನದಾಂತೆ ಶಾಂತಿ ಇತ್ತ್ಂಡ್. ಈ ನಡುಟು ಒಂಜಿ ದಾಳಿ ಕುಡ ಶಾಂತಿಭಂಗ ಆಪಿನ ಪೋಡಿಗೆ ಉಂಡು ಮಲ್ದ್ಂಡ್. ಸೋಮಾರ ಬಯ್ಯಡ್ ಬಜ್ಪೆ ಪೊಲೀಸ್ ಸ್ಟೇಶನ್ ಸೀಮೆಡ್ ಅಖಿಲೇಶ್ ಪನ್ಪಿನ ಜವನನ ಮಿತ್ತ್ ನಾಲ್ ಜನ ಕೂಡೊಂದು ತಲ್ವಾರ್ ದಾಳಿ ಮಲ್ತ್ದೆರ್. ಬೈಕ್ಡ್ ಬತ್ತ್ದ್ ದಾಳಿ ಮಲ್ತಿತ್ತ್ದ್ ತಲ್ವಾರ್ಡ್ ಮೊರಂಗೈಕ್ ಗಡಿಕುಲಾತ. ಗಡಿಕುಲಾತಿನ ಅಖಿಲೇಶ್ಗ್ ಬೆದ್ರದ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು.
ಒರಿ ಆರೋಪಿನ್ ಪತ್ತ್ದ್ ಪೊಲೀಸೆರೆಗ್ ಒಪ್ಯಾಯಿನ ಊರುದಕುಲು
ಒಟ್ಟು ನಾಲ್ ಜನ ಕೆಂಗುಡೆರ್ ಅಖಿಲೇಶ್ಗ್ ಆಕ್ದ್ ಪದ್ರಾಡಾಯೆರ ತೂತೆರ್. ಮೂವೆರ್ ಒಂಜೇ ಬೈಕ್ಡ್ ಬಲ್ತ್ದೆರ್. ಕುಡೊರಿ ಆರೋಪಿ ಸಿನಾನ್ ಬಲಿಪೆರ ತೂತೇ. ತಿಕ್ಕಿ ತಿಕ್ಕಿ ಗಾಡಿಲೆನ್ ಬಲವಂತವಾದ್ ಅಡ್ಡಕಟ್ಟ್ದೆ. ಆಂಡ ಏರ್ಲಾ ಉಂತಾದಿಜೆರ್. ಒರಿ ಬೈಕ್ ಬುಡೊಂದಿತ್ತಿನಾರ್ ಸಿನಾನ್ನ ಮರ್ಲ್ಗ್ ಪೋಡಿದ್ ಬೈಕ್ರ್ದ್ ಬೂರ್ದೆರ್. ಬೊಕ್ಕ ಸಿನಾನ್ನ್ ಊರುದಕುಲು ಪತ್ತ್ದ್ ನಾಲ್ ಪೊಲಿ ಕೊರ್ದು ಪೊಲೀಸೆರೆಗ್ ಒಪ್ಯಾದೆರ್.
ಬಜ್ಪೆ ತಲ್ವಾರ್ ದಾಳಿ ಬಗೆಟ್ ಪೊಲೀಸೆರ್ ದಾದ ಪನ್ಡೆರ್?
ನಾಲ್ ಜನ ಒಂಜೇ ಬೈಕ್ಡ್ ಬೀಸತ್ತಿ ಪತೊಂದು ಪೋವೊಂದಿತ್ತೆರ್. ಅವೆನ್ ತೂಯಿನ ಅಖಿಲೇಶ್ ಅಕ್ಲೆನ ಫೋಟೊ ದೆತ್ತ್ದೆರ್. ಅಂಚಾದ್ ಅಕುಲು ಆರೆನ ಮಿತ್ತ್ ದಾಳಿ ಮಲ್ತ್ದೆರ್. ಅಖಿಲೇಶ್ಗ್ ಕಿಞ್ಞ ಕಿಞ್ಞ ಗಡಿಕುಲಾತ. ನಾಲ್ ಜನ ಬಾರ್ರ್ದ್ ಪರ್ದ್ ಬರ್ಪಿನ
ದೃಶ್ಯ ಸಿಸಿಟಿವಿಡ್ ಕೈದಾತ್ಂಡ್. ಉಂದು ಪರ್ತಿನ ಅಮಲ್ಡ್ ಆತಿನ ಲಡಯಿಯಾ ಅತ್ತ್ ಬೇತೆ ದಾಲ ನೆವನ ಉಂಡಾ ಪನ್ಪಿನ ದಿಟ್ಟಿಡ್ ಜಡ್ತೆ ಮಲ್ತೊಂದುಲ್ಲ ಪನ್ದ್ ಕುಡ್ಲ ನಗರ ಪೊಲೀಸ್ ಆಯುಕ್ತೆ ಸುಧೀರ್ ಕುಮಾರ್ ರೆಡ್ಡಿ ತೆರಿಪಾದೆರ್.
ಬಜ್ಪೆ ಬೊಕ್ಕ ಬೆದ್ರ ಪೊಲೀಸೆರ್ ಆರೋಪಿಲೆನ್ ಪತ್ತೆರೆ ಜತ್ತ್ದೆರ್. ಒರಿನ ಮೂವೆರ್ ಏರ್ ಪನ್ದ್ಲಾ ತೆರಿದ್ಂಡ್. ಆರೋಪಿಲೆನ್ ಪತ್ತಿಬೊಕ್ಕನೇ ನೆವನ ದಾದ ಪನ್ದ್ ತೆರಿಯೊಡಾತೆ.