Last updated on November 30th, 2025 at 10:47 am
ಬೆಂಗಳೂರು, ನ. 30: ಉಸಾರ್ ತತ್ತ್ದ್ ಇತ್ತಿನ ಸ್ಯಾಂಡಲ್ ವುಡ್ ದ ಪೆರಿಯ ನಟೆ ಉಮೇಶ (80) ಮೇರ್ ತೀರ್ದೆರ್. ಉಸಾರ್ ತತ್ತ್ದ್ ಇತ್ತಿನ ನಟೆ ಉಮೇಶ್ ಮೆರೆನ್ ಬೆಂಗಳೂರ್ದ ಕಿದ್ವಾಯಿ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ನಡತೊಂದಿತ್ತ್ಂಡ್. ಆಂಡ ಮರ್ದ್ ಪಲಿಪಂದೆ ಇನಿ ತೀರ್ದೆರ್.
ಆಜಿ ದಶಕೊದಾತ್ ಕಾಲ ವೃತ್ತಿಜೀವನೊದ ಅನುಭವ ಇತ್ತಿನ ಕನ್ನಡ ಸಿನಿಮಾ ನಟೆ ಆದಿತ್ತೆರ್. ಮೇರ್ 350 ರ್ದ್ಲಾ ಎಚ್ಚ ಚಲನಚಿತ್ರೊಲೆಡ್ ಬಣ್ಣ ಪೂಜಿದೆರ್. ಉಮೇಶ್ ತನ್ನ ವಿಶಿಷ್ಟ ಸಂಭಾಷಣೆ, ಮುಖಭಾವ ಬೊಕ್ಕ ಹಾಸ್ಯ ಸಮಯಪ್ರಜ್ಞೆಗ್ ಪುದರ್ ಪೋತಿನಾರ್.1990 ಡ್ ಬುಡುಗಡೆ ಆತಿನ ಅನಂತ್ ನಾಗ್ ನಟನೆದ ಗೋಲ್ಮಾಲ್ ರಾಧಾಕೃಷ್ಣ ಹಾಸ್ಯ ಚಿತ್ರೊಡು ಉಮೇಶ್ ರೆನ “ಸೀತಾಪತಿ” ಪಾತ್ರವ ಕನ್ನಡ ಚಿತ್ರರಂಗೊದ ಎಡ್ಡೇನ ಹಾಸ್ಯ ಪಾತ್ರೊಲೆಡ್ ಒಂಜಿ ಪನ್ದ್ ಪುದರಾತ್ಂಡ್. ಆರೆನ “ಅಪಾರ್ಥ ಮಾಡ್ಕೊಂಡ್ಬಿಟ್ರೋ ಎನೋ” ಡೈಲಾಗ್ ಜನಸಾಮಾನ್ಯೆರೆಗ್ ಬಾರೀ ಇಷ್ಟ ಆದಿತ್ತ್ದ್, ಇತ್ತೆಲಾ ಕೆಲ ಟ್ರೋಲ್ ಪೇಜ್ಲೆಗ್ ಕಂಟೆಂಟ್ ಆದುಂಡು.