Last updated on December 16th, 2025 at 03:41 pm
ಒಡಿಪು, ಡಿ. 16: ಪೊರ್ತುದ ಕುಂದೆಲ್ ಅತ್ತ್ಂಡ ಆಫೀಸ್ಡ್ ರಜೆ ತಿಕ್ಕುಜಿ ಪನ್ಪಿ ನೆವನಗ್ ಸಂಬಂಧೊದಕ್ಲೆನ ಇಲ್ಲದ ಲೇಸ್ಲೆಗ್ ಪೋವಂದೆ ಕುಲ್ಲುನು ಇತ್ತೆ ಇತ್ತೆ ಮಾಮೂಲಿ. ಒರೊರ ತನ್ಕುಲೆ ಒಪ್ಪಪುಟ್ಟಿನಕ್ಲೆನ ಮದಿಮೆದಂಚಿನ ಲೇಸ್ಲೆಗ್ಲಾ ಅನಿವಾರ್ಯವಾದ್ ಕೆಲ ಜನ ಬರಂದೆ ಇತ್ತಿನ ಉದಾರ್ಮೆಲುಲಾ ಉಲ್ಲ. ಆಂಡ ಒಡಿಪುಡ್ ಒಂಜಿ ಬಾರೀ ಅಪರೂಪದ ನಡಕೆ ನಡತ್ದ್ಂಡ್. ನಿಶ್ಚಯಗ್ ಬರ್ಯೆರ ರಜೆ ಇಜ್ಜಂದಿನೆರ್ದಾವರ ಆನ್ಲೈನ್ಡೇ ಎಂಗೇಜ್ಮೆಂಟ್ ನಡತ್ದ್ಂಡ್.
ಬೆಂಗಳೂರು ದಕ್ಷಿಣ ಜಿಲ್ಲೆ ಮಾಗಡಿ ತಾಲೂಕ್ದ ಚಕ್ರಬಾವಿ ಗ್ರಾಮೊದ ಜವನೆ ಸುಹಾಸ್ ಎಸ್. ಬೊಕ್ಕ ಒಡಿಪು ನಿವಾಸಿ ಕಾತ್ಯಾಯಿನಿ ಮೊಕ್ಲೆನ ನಿಶ್ಚಯೊಗು ದಿನ ದೀದಾದಿತ್ತ್ಂಡ್. ಆಂಡ ಇತ್ತೆ ಕೆನಡಾಡ್ ಬೇಲೆ ಮಲ್ತೊಂದುಪ್ಪುನ ಸುಹಾಸ್ಗ್ ತನ್ನ ನಿಶ್ಚಯೊಗೇ ಬರ್ಯೆರ ರಜೆತ ಸಮಸ್ಯೆ ಆತ್ಂಡ್. ಅಂಚಾದ್ ಆನ್ಲೈನ್ಡೇ ಒಡಿಪುದ ಸರಸ್ವತಿ ಸಭಾಭವನೊಡು ನಿಶ್ಚಯ ಮಲ್ತ್ದೆರ್. ಕ್ಯಾಮರಾಗ್ ಉಂಗುರ ತೋಜಾದ್ ಜವನೆ ಬೊಕ್ಕ ಜವನ್ದಿ ಉಂಗುರ ಪಾಡೊಂದೆರ್. ಬತ್ತಿನಕುರು ಆರತಿ ಮಲ್ತ್ದ್ ಮೊಕಲೆಗ್ ಆಶೀರ್ವಾದ ಮಲ್ತ್ದೆರ್. ನಿಶ್ಚಯ ನಡತಿನ ಪೊರ್ತುಗು ಒಡಿಪುಡು ಕಾಂಡೆ ಆದಿತ್ತ್ಂಡ, ಕೆನಡಾಡ್ ಮಧ್ಯರಾತ್ರೆ ಆದಿತ್ತ್ಂಡ್ ಪನ್ಪಿನ ಕುಡೊಂಜಿ ವಿಶೇಷ.