Last updated on December 24th, 2025 at 08:22 am
ಕುಡ್ಲ, ಡಿ. 23: ಬೊಲ್ತೇರ್ ತಾಲೂಕ್ದ ನಾವೂರು ಗ್ರಾಮೊಡು ಕಂಡನ್ಯನ್ ಕೆರ್ತಿನ ಪ್ರಕರಣೊಡು ಅಪರೂಪೊದ ನ್ಯಾಯಾಂಗ ನಿರ್ಣಯ ಒಂಜೆನ್ ಕೋರ್ಟ್ ಗೆತೊಂದುಂಡು. ಕುಡ್ಲದ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆದ ನ್ಯಾಯಾಧೀಶೆರಾಯಿನ ಮೋಹನ ಜೆ.ಎಸ್. ಮೇರ್, ಆರೋಪಿ ಎಲಿಯಮ್ಮ ಪನ್ಪಿನಾರ್ ಕಂಡನ್ಯನ್ ಕೆರ್ತಿನ ಸಾಬೀತಾಂಡಲಾ, ಆರ್ ಅಪರಾಧಿ ಅತ್ತ್ ಪನ್ದ್ ತೀರ್ಪು ಕೊರ್ತೆರ್.
2022ತ ಜುಲೈ 5ತಾನಿ ಬೊಲ್ತೇರ್ ತಾಲೂಕ್ದ ನಾವೂರು ಗ್ರಾಮೊಡು, ಕಾಂಡೆ 5:30ತ ಅಂದಾಜಿಗ್ ಕಂಡನೆ ಯೋಹಾನನ್ ಪನ್ಪಿನಾರೆನ್ ಬೊಡೆದಿ ಎಲಿಯಮ್ಮ ಕೆರ್ದಿತ್ತೆರ್. ಈ ಬಗೆಟ್ ಬೊಲ್ತೇರ್ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್. ವಿಚಾರಣೆದ ಪೊರ್ತುಡು ಆರೋಪಿಯೇ ‘ಯಾನ್ ಕೆರ್ತಿನ ಅಂದ್’ ಪನ್ದ್ ನ್ಯಾಯಂತಡೆದ ಎದುರು ಒತ್ತೊಂದೆರ್. ಆಂಡಲಾ ಪ್ರಕರಣೊದ ಗಂಭೀರತೆನ್ ತೂಯಿನ ನ್ಯಾಯಂತಡೆ, ಸಂಪೂರ್ಣ ಸಾಕ್ಷಿ ವಿಚಾರಣೆಗ್ ಆದೇಶ ಮಲ್ದ್ಂಡ್.
ಸಾಕ್ಷಿ ವಿಚಾರಣೆದ ಪೊರ್ತುಡು, ಆರೋಪಿಗ್ ದೀರ್ಘಕಾಲೊದ ಮಾನಸಿಕ ಅಸ್ವಸ್ಥತೆ ಇತ್ತ್ದ್, ಆರೆಗ್ ‘ಡೆಲ್ಯೂಷನಲ್ ಡಿಸಾರ್ಡರ್’ ಪನ್ಪಿ ಸೀಕ್ ಇಪ್ಪುನ ದೃಢ ಆತ್ಂಡ್. ಕೆರ್ಪುನ ಪೊರ್ತುಡು ಆರೆಗ್ ಸಮ ಒವ್ವು ತಪ್ಪು ಒವ್ವು ಪನ್ಪಿ ಅರಿಮೆ ಇಜ್ಜಂಡ್ ಪನ್ದ್ ವೈದ್ಯಕೀಯ ಬೊಕ್ಕ ತಾಂತ್ರಿಕ ಸಾಕ್ಷ್ಯೊಲೆಡ್ ತೆರಿದ್ ಬೈದ್ಂಡ್. ಉಂದೆನ್ ಆಧರಿತ್ದ್, ಭಾರತೀಯ ದಂಡ ಸಂಹಿತೆದ ಅಡಿಟ್ ಆರೋಪಿಗ್ ಅಪರಾಧಿಕ ಹೊಣೆಗಾರಿಕೆ ಇಜ್ಜಿ ಪನ್ದ್ ನ್ಯಾಯಂತಡೆ ತೀರ್ಪು ಕೊರ್ತುಂಡು.
ತೀರ್ಪುದ ಒಟ್ಟುಗು, ಆರೋಪಿನ್ ನಿಮ್ಹಾನ್ಸ್ ಆಸ್ಪತ್ರೆಗ್ ಕಡಪುಡ್ದ್ ಮಾನಸಿಕ ಪರೀಕ್ಷೆ ಮಲ್ಪೆರೆ ಜೈಲ್ ಅಧೀಕ್ಷಕೆರೆಗ್ ನ್ಯಾಯಂತಡೆ ಸೂಚನೆ ಕೊರ್ತುಂಡು. ಆರೆನ್ ಬುಡುಗಡೆ ಮಲ್ಪೊಲಿಯಾ ಅಂಚೆನೇ ಆರೆರ್ದ್ ಸಮಾಜೊಗು ದಾಲ ಪಡಾಯಿ ಉಂಡಾ ಪನ್ಪಿನ ಬಗೆಟ್ ವರದಿ ಸಂದಾಯೆರ ಆದೇಶ ಮಲ್ದ್ಂಡ್.
ಈ ಸಂಕೀರ್ಣ ಪ್ರಕರಣೊಡು ಆರೋಪಿಪರ ವಕೀಲೆರಾಯಿನ ವಿಕ್ರಮರಾಜ್ ಎ. ಬೊಕ್ಕ ಜೀವನ ಎಂ. ಮೊಕುಲು ವಾದ ಮಂಡನೆ ಮಲ್ತ್ದೆರ್.