Last updated on December 24th, 2025 at 11:02 am
ಮುಲ್ಕಿ, ಡಿ. 24: ಕರ್ನಾಟಕ ಜಾನಪದ ಅಕಾಡೆಮಿ ಬೆಂಗಳೂರು ರ್ದ್ ಕೊರ್ಪುನ 2025ನೇ ವರ್ಸೊದ ವಾರ್ಷಿಕ ಗೌರವ ಪ್ರಶಸ್ತಿಗ್ ಮಂಗಳೂರು ಬೊಕ್ಕ ಒಡಿಪು ಜಿಲ್ಲೆದ ಇರ್ವೆರ್ ಅಜತ್ ಬೈದೆರ್. ಮಂಗಳೂರು ಜಿಲ್ಲೆರ್ದ್ ಕೊರಗೆರೆ ಡೋಲು ಬೊಟ್ಟುನ ಸುಮತಿ ಕೊರಗ ಬೊಕ್ಕ ಒಡಿಪು ಜಿಲ್ಲೆದ ನಾಟಿಮರ್ದ್ ಕೊರ್ಪುನ ಪಂಡಿತೆರ್ ಗುಲಾಬಿ ಗೌಡ್ತಿ ಮೊಕಲೆಗ್ ಈ ಪ್ರಶಸ್ತಿ ತಿಕ್ಕ್ದ್ಂಡ್.
ಡೋಲು ಬೊಟ್ಟುನ ಸುಮತಿ ಕೊರಗ
ಮುಲ್ಕಿದ ಕಕ್ವ ಮೂಲೊದ ಸುಮತಿ ಕೊರಗ ಮೇರ್ 5ನೇ ಕ್ಲಾಸ್ ಮುಟ್ಟ ಕಲ್ತ್ದೆರ್. ಕುರುವೆ ನೇಯ್ಪುನ ಮೆರೆನ ಕುಟುಮೊದ ಕುಲಕಸುಬು. ಕಿನ್ನಿಗೋಳಿ ಕೈತಲ್ದ ಮೆನ್ನಾಬೊಟ್ಟುದ ಕೆಮ್ಮಡೆ ಶ್ಯಾಮ ಕೊರಗೆರೆನ್ ಮದಿಮೆ ಆತಿನ ಮೇರ್, ಇತ್ತೆ ಕಿನ್ನಿಗೋಳಿ ಡೆ ಉಲ್ಲೆರ್.
ಎಲ್ಯೆರ್ದೇ ಡೋಲು ಬೊಟ್ಟೆರೆ ಕಲ್ತಿನ ಸುಮತಿ, ಬೊಕ್ಕದ ದಿನೊಟು ಪುಗರ್ತೆರ ಡೋಲು ಕಲಾವಿದೆದಿಯಾದ್ ಪುದರಾಯೆರ್. ಮೇರ್ ಮುಂಬೈ, ಚೆನ್ನೈ ಬೊಕ್ಕ ಪುಣೆ ಸೇರ್ದ್ ದೇಶೊದ ಬೇತೆ ಬೇತೆ ರಾಜ್ಯೊಲೆಡ್ ತನ್ನ ಕಲಾ ಪ್ರದರ್ಶನ ಕೊರ್ತೆರ್.
ಕುಡ್ಲದ ‘ಕೊರಲ್ ಕಲಾ ತಂಡ’ದ ಪದುಕೆರಾದ್ ಸುಮಾರ್ 12 ವರ್ಸ ಕಾಲ ಡೋಲು ಕಲಾವಿದೆದಿಯಾದ್ ಸೇವೆ ಮಲ್ತ್ದೆರ್. ತನ್ನ ಸಮುದಾಯೊದ ಸಾಂಪ್ರದಾಯಿಕ ನಲಿಕೆ ಬೊಕ್ಕ ವೃತ್ತಿ ಕೌಶಲೊಲೆನ ಬಗೆಟ್ ಬೇತೆ ಬೇತೆ ಮಿತ್ತರ್ಮೆಲೆಡ್ ಪ್ರಾತ್ಯಕ್ಷತೆಲೆನ್ ಕೊರ್ದು ಜಾಗೃತಿ ಪುಟ್ಟಾಲೊಂದುಲ್ಲೆರ್.
ನಾಟಿ ಮರ್ದ್ ಕೊರ್ಪುನ ಗುಲಾಬಿ ಗೌಡ್ತಿ
ಒಡಿಪು ಜಿಲ್ಲೆದ ಹೆಬ್ರಿ ತಾಲೂಕ್ದ ಕಬ್ಬಿನಾಲೆ ಗ್ರಾಮೊದ ಮಲೆಕುಡಿಯ ಸಮುದಾಯೊದ 89 ವರ್ಸ ಪ್ರಾಯೊದ ಗುಲಾಬಿ ಗೌಡ್ತಿ ಮೇರ್ ಎಲ್ಯೆರ್ದೇ ನಾಟಿ ಮರ್ದ್ಡ್ ಆಸಕ್ತಿ ಬುಲೆಪಾವೊಂದಿನಾರ್. ಅಪಗದ ಕಾಲೊಡು ಶಿಕ್ಷಣದ ಅರಿಮೆದಾಂತೆ ಅಂಚೆನೇ ಬಡಪತ್ತ್ರ್ದಾವರ ಆರೆಗ್ ಶಾಲೆಗ್ ಪೋಯೆರೆ ಆತಿಜಿ . ಆಂಡ, ಕರಿನ 50 ವರ್ಸೊರ್ದಿಂಚಿ ಆರ್ ಕಾಡ ಪುಲಮರ್ದ್, ಬೇರ್, ಕೆತ್ತೆ ಬೊಕ್ಕ ಬೂರುಲೆನ್ ಒಟ್ಟು ಮಲ್ತ್ದ್ ಸಾಂಪ್ರದಾಯಿಕ ಮರ್ದ್ ಮಲ್ಪುನ ಮಕೇನ ಜನಸೇವೆ ಮಲ್ತೊಂದುಲ್ಲೆರ್.
ಅಂಚೆನೇ ಗುಲಾಬಿ ಗೌಡ್ತಿ ಮೇರ್ ಪೆದ್ಪಾವುನೆಟ್ ಪಾಕ ಅನುಭವ ಇತ್ತಿನಾರ್. ಉಗುರು ಸುತ್ತು, ಕುಜಲ್ ಪೋಪುನ, ಉಚ್ಚು ತುಚ್ಚಿನೆಕ್ ಸೇರ್ದ್ ಸುಮಾರ್ 15ರ್ದ್ಲಾ ಎಚ್ಚ ಸೀಕ್ಲೆಗ್ ಮೇರ್ ಸಾಂಪ್ರದಾಯಿಕ ಮರ್ದ್ ಕೊರ್ಪುನೆಟ್ ಪುಗರ್ತೆ ಪಡೆತೆರ್.